Свет
Хаг го обвинува CIA и Пентагон за воени злосторства во Авганистан
Обвинителката на Меѓународниот кривичен суд (ICC), Фату Бенсуда, соопшти дека во моментов поседува докази кои ѝ овозможуваат да претпостави дека американската Централна разузнавачка агенција (CIA) и американски војници во Авганистан, вршеле мачења и други воени злосторства во текот на сослушувањата.
„Во моментов достапните информации дават разумна основа да се верува дека за време на распитите на приведените…, припадници на вооружените сили на САД и на американската Централна разузнавачка агенција применувале методи коишто, според мислењето на комисијата, претставуваат воено злосторство, вклучувајќи тортура, сурово третирање и злоупотреба на човековото достоинство и насилство“, се вели во годишниот извештај, кој се однесува на прелиминарните истраги.
Во извештајот, исто така, се наведуваат и наводни воени злосторства извршени од страна американски војници во периодот од 1-ви мај 2003 до 31-ви декември 2014 година, врз најмалку 61 човек, и притоа се прецизира дека поголемиот дел од престапите можеле да бидат извршени во 2003 и 2004 година.
Бенсуда во својот извештај ги презентира и податоците за веројатните воени злосторства извршени од CIA. Се истакнува дека припадниците на CIA, наводно, применувале мачења, сурово однесување и применувале несоодветни мерки кон најмалку 27 приведени лица на територијата на Авганистан и во други земји членки на Трибуналот, поточно во Полска, Романија и Литванија, во периодот од декември 2002 до март 2008 година. Како и во случајот со американските војници, повеќето од претпоставените злосторства од страна на ICC се однесуваат на 2003 и 2004 година.
„Овие претпоставени злосторства не биле само малтретирања на неколку одделни поединци. Тие, напротив, претставуваат дел од одобрените методи на испрашување за да се добијат ‘веродостојни разузнавачки информации’ од приведените“, се наведува во извештајот, во кој се истакнува дека користењето на тие методи потоа било запрено.
ICC е суд од последната истанца, што значи дека само можел да подигне обвинение, доколку домашните власти неадекватно се занимавале со обвинувањата.
Овој наод значи важен чекор напред во десет години стариот труд на судот во врска со конфликтот во Авганистан и би можел да резултира со остра реакција на американската администрација којашто под новоизбраниот претседател Доналд Трамп ќе има помал меѓународен карактер.
Американските трупи извршија инвазија во Авганистан во 2001 година со која го соборија режимот на радикалното исламистичко движење Талибан кој му даваше засолниште на врвот на терористичката мрежа Ал Каеда. Првично беше планирано сите американски војници да бидат повлечени од земјата во 2014 година, но сегашната американска администрација одлучи да остави дел од контингентот за помош и обука на локалните безбедносни сили./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Шефот на НАТО: Кина сака добри односи со Западот и и помага на Русија, не може да ги има и двете
Кина мора да престане да ја поддржува руската војна во Украина ако сака да ужива во добри односи со Западот, изјави денеска генералниот секретар на НАТО Јенс Столтенберг, предупредувајќи го Пекинг со невообичаено остри зборови дека не може да ги има и двете. За време на посетата на Берлин, шефот на западната воена алијанса рече дека помошта на Пекинг е од витално значење за воените напори на Москва бидејќи ја зајакнува воената економија на Русија со споделување на врвна технологија, како што се полупроводниците.
„Минатата година Русија увезе 90 отсто од својата микроелектроника од Кина, која се користи за производство на проектили, тенкови и авиони. Кина исто така работи на Русија да и обезбеди подобрени сателитски способности“, рече Столтенберг. „Кина вели дека сака добри односи со Западот. Во исто време, Пекинг продолжува да го поттикнува најголемиот вооружен конфликт во Европа од Втората светска војна. Не може да ги има и двете“, предупреди тој.
Столтенберг ги предупреди западните сојузници да не станат зависни од Кина како што беа од Русија. „Во минатото направивме грешка што станавме зависни од руската нафта и гас. Не смееме да ја повториме таа грешка со Кина и да зависиме од нејзините пари, суровини и технологии. Зависноста не прави ранливи“, додаде тој.
Кина ги зајакна трговските и воените врски со Русија во последниве години, бидејќи САД и нивните сојузници воведоа санкции и на двете, но особено на Москва, поради нејзината инвазија на Украина. Рускиот претседател Владимир Путин изјави во четвртокот дека планира да отпатува за Кина во мај, но не прецизираше точно кога.
Свет
САД градат привремено пристаниште во близина на Газа за испраќање хуманитарна помош
Соединетите Држави почнаа да градат пристаниште во Газа, соопшти денеска Пентагон, проект кој треба да ја олесни испораката на хуманитарна помош на палестинската територија. Пристаништето треба да профункционира на почетокот на мај.
Во март, претседателот Џо Бајден објави дека американската војска ќе изгради привремено пристаниште на медитеранскиот брег на Газа за да добива хуманитарна помош по море.
Изградбата е дел од напорите да се спречи гладувањето во палестинската енклава, која веќе пет месеци се наоѓа во средината на израелската воена кампања против Хамас, која го опустоши Појас Газа и ги потопи нејзините 2,3 милиони луѓе во хуманитарна катастрофа.
„Можам да потврдам дека американските воени бродови, вклучително и УСНС Бенавидез, почнаа да градат привремено пристаниште…“ изјави за новинарите портпаролот на Пентагон, Патрик Рајдер.
ОН предупредија дека Газа е во опасност од глад и се пожалија на „огромни пречки“ при добивањето помош и нејзино дистрибуирање низ енклавата.
Агенциите за помош и администрацијата на Бајден го молеа Израел да ја олесни испораката на помош во Газа и да им дозволи на нивните конвои безбедно поминување на територијата.
Рајдер рече дека Пентагон следи некој вид минофрлачки напад во Газа што предизвика минимална штета во близина на областа каде што се гради пристаништето, но додаде дека американските сили сè уште не почнале да преместуваат ништо во областа и дека нема американски сили на теренот.
Свет
(Видео) Големи поплави во Танзанија, загинаа 155 луѓе
Во поплавите во Танзанија загинаа 155 луѓе, а најмалку 236 се повредени, изјави денеска премиерот Касим Мајалива. Во поплавите оштетени се повеќе од 10.000 куќи.
Премиерот додаде дека обилните дождови предизвикани од Ел Нино и придружени со силен ветер доведоа до поплави и лизгање на земјиштето во различни делови на земјата.
„Многу луѓе загинаа. Имаше штета на посевите, куќите, инфраструктурата како патишта, мостови и железници“, рече Мајалива.
Поплави ја погодија и Кенија, која се граничи со Танзанија на истокот на Африка, при што загинаа повеќе од 30 луѓе, пишува Си-ен-ен.
Во Кенија врне силен дожд од средината на март, а врнежите се интензивираа минатата недела. Кенискиот Црвен крст изврши повеќе од 188 спасувачки операции од март. Властите вчера затворија некои патишта во главниот град на Кенија, а неколку населби беа поплавени.