Папата Франциско денес го изрази своeто одушевување пред верниците затоа што првпат излезе во јавноста по пауза од шест месеци.

Утрово, во дворот на Сан Дамасо, 84-годишниот папа им рече на верниците дека е среќен што се гледаат повторно лице в лице, пренесува „Анса“.

Почитувајќи ја социјалната оддалеченост и проверувајќи ја температурата на влезот, публиката со одушевување го следеше обраќањето на папата посветено на темата молитва.

„Многупати молитвата е борба“, рече папата Франциско, кој е вакциниран против коронавирус.

За време на најтешката криза предизвикана од коронавирусот, кога Италија забележа повеќе од 40.000 новозаразени, папата ја извршуваше неделната служба преку видеоврска од библиотеката во Ватикан.

Германската влада денес ги смени правилата за влез во земјата – вакцинираните или оние што прележале Ковид-19 нема да мора да бидат тестирани или да одат во карантин, освен ако не доаѓаат од области со висок ризик, каде што преовладуваат разни видови на вирусот.

Според одлуката на владата, невакцинираните лица ќе може да го напуштат карантинот ако тестот покаже дека тие се негативни на коронавирус.

Воведени се нови правила за олеснување на патувањето во текот на летото, особено за семејствата во кои родителите биле вакцинирани, а децата не.

Правилата важат само за оние што примиле вакцини одобрени во Европската Унија.

Германскиот министер за здравство, Јенс Шпан, изјави дека очекува државата да почне со издавање дигитални сертификати за имунитет до крајот на јуни.

Од денес граѓаните на Србија имаат пристап до т.н. ковид-пасош, односно дигитален зелен сертификат – потврда за вакцинација против коронавирусот и резултатите од разни тестови на Ковид-19, објави денеска директорот на Српската национална канцеларија за ИТ-администрација, Михајло Јовановиќ.

Дигиталниот зелен сертификат е консолидиран сертификат кој докажува дека граѓаните биле вакцинирани против коронавирус или имаат резултати од тест на Ковид-19.

„Сертификатот е квалификуван сертификат со електронски печат и не може да биде фалсификуван или злоупотребен“, рече Јанковиќ.

Покрај личните податоци (име, презиме, единствен матичен број, пол и број на пасош), дигиталниот зелен сертификат содржи и податоци за вакцинацијата, бројот на примени дози и датумите на вакцинација, како и резултати од ПЦР, антиген и серолошки тест.

Постапката за преземање на овој електронски документ подразбира дека граѓаните се претходно регистрирани на порталот „е-Влада“, каде што, по проверка на личните податоци, ја оставаат својата е-адреса, на која системот по неколку минути испраќа сертификат.

Со читање на QR-кодот на дигиталниот зелен сертификат, достапни се статуси за вакцинација во две дози.

Другите два статуса се поврзани со резултатите од ПЦР и антиген-тест доколку се направени во последните 72 часа и се негативни.

Резултатот за серолошкиот тест значи дека тоа е направено во последните шест месеци за луѓе што не примиле вакцина или два месеци за вакцинирани доколку т.н. нивниот IgG-параметар е позитивен, објасни српската влада.

До вторник, 11 мај, во Србија им се дадени 3.850.413 дози од една од четирите достапни вакцини (на „Фајзер/Бионтек“, „спутник В“, на „Астра зенека“ и на „Синофарм“), а најмалку 1,67 милион граѓани примиле две дози вакцина.