Регион
Грција ќе регрутира 800 нови граничари откако Турците ги турнаа мигрантите на границата

Грчкиот министер за цивилна заштита, Михалис Хрисохоидис, најави дека ќе бидат регрутирани уште 400 граничари за да ја штитат границата покрај 400-те претходно објавени од владата, пишува „Прототема“.
Министерот Хрисохоидис го објави ова за време на посетата на пограничниот регион Еврос, каде што беше пречекан од локалниот потпретседател на општината, Димитрис Петровиќ, кој преку Фејсбук му се заблагодари на министерот за зголемувањето на контингентот на граничарите
„Вработувањето на повеќе од 400 граничари во Еврос беше наше постојано барање и му благодариме на министерот“, рече Петровиќ.
Според „Катимерини“, министерот Хрисохоидис се сретнал со други локални претставници во регионот за да разговара за плановите на националната влада за проширување на граничната ограда и во Еврос. Весникот наведува дека министерот разговарал и за паричен надоместок за сопствениците на земјиштето во областа каде што ќе се гради новата ограда.
Заменик-градоначалникот Петровиќ изјави за грчките медиуми дека граничарите и продолжувањето на граничната ограда ќе отворат работни места во регионот и може да ги поттикнат младите да останат во областа наместо да бараат работа на друго место.
Претходно овој месец, грчкиот заменик-министер за миграција и азил, Јоргос Кумуцакос, предупреди дека Турција под раководство на Реџеп Таип Ердоган може да ослободи уште еден бран мигранти подоцна овој месец ако ЕУ воведе санкции за активностите на Турција на Медитеранот.
Кумуцакос исто така тврди дека притисокот врз мигрантите по должина на границата почнал повторно да се зголемува откако во голема мера се смирил поради ограничувањата поставени по должината на граничната област од страна на Турција по избувнувањето на пандемијата на коронавирус.
Во февруари, Ердоган намерно ги отвори портите кон Европа, а грчките власти тврдат дека најмалку 50.000 мигранти се обиделе да ја преминат границата пред таа да биде затворена во март.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Еди Рама вети бесплатни нови куќи за оние кои во пожарите ги загубија своите домови

По катастрофалните пожари кои деновиве зафатија делови од Албанија, уништувајќи домови и имоти, премиерот Еди Рама излезе со силно и директно ветување до сите настрадани граѓани. Во објава на социјалните мрежи, тој најави дека државата целосно ќе ги обесштети сите што претрпеле штета, вклучително и бесплатна обнова на секој уништен дом.
„Кој и да го изгубил својот дом, ќе го обновиме бесплатно, кој и да изгубил добиток, ќе го рефинансираме еден по еден“, напиша Рама на социјалните мрежи.
Оваа мерка, како што појасни министерот за одбрана Пиро Венгу, ќе се спроведува преку општините. Ќе се формираат посебни комисии за проценка на штетите на куќи, инфраструктура, бизниси и земјоделски култури, по што ќе следува обештетување од општинските фондови за цивилна заштита, поддржани од државниот буџет.
Регион
Шестмина припадници на полицијата се повредени за време на синоќешните протести во Србија

Министерот за внатрешни работи на Србија, Ивица Дачиќ изјави дека за време на синоќешните протести имало драстично нарушување на јавниот ред и мир и брутален напад врз полицијата, и дека, според досегашните податоци, повредени се шестмина припадници на полицијата.
„Шест полицајци се повредени, според информациите што ги имаме во моментов, а 38 лица се приведени. Секој можеше да види во преносот во живо дека имало брутален напад врз полицијата, дека демонстрантите дошле со намера да ги нападнат полицајците, да ги повредат“, рече Дачиќ.
Тој изјави дека вечерта немало поддржувачи на Српската напредна партија, што, како што рече, не ги спречило демонстрантите да ги нападнат просториите на таа партија низ цела Србија, и додаде дека на некои места биле нападнати и просториите на Социјалистичката партија на Србија.
Регион
Пронајдени се лицата кои исчезнаа во Грција

Никола Стефановиќ (31) и Марта Илиќ (19), кои исчезнаа во Грција, се пронајдени, како што потврди за Блиц нивниот пријател Милан Атанасковиќ, со кого го напуштиле Лесковац.
Двајцата биле пронајдени во Сер.
– Тие свртеле погрешно, се наоѓаат на 125 километри од местото каде што се упатија. Ја поминале ноќта во парк, дури денес нашле ви-фи и ме контактираа – изјави тој за „Блиц“.
Претходно српските медиуми објавија за нивното исчезнување.
„Тие отидоа со нас во Грција, требаше да прстојуваме стан до стан на истото место. Никола е пријател на татко ми, го замолил да оди пред него, да го следи, не го знаел патот. Сè беше во ред низ Србија и Северна Македонија, влеговме во Грција“, вели Јелена Стојиљковиќ за „Блиц“.
Откако направиле пауза на бензинска пумпа во Грција, го продолжиле своето патување.
Кога стигнале до втората рампа на автопатот кон Олимпик бич, Никола и Марта исчезнале.