Претседателот на Турција, Реџеп Таип Ердоган, денеска ги повика граѓаните на таа земја утре да гласаат во вториот круг од претседателските избори. Неговиот ривал, кандидатот на опозицијата Кемал Киличдародглу, пак, му порача на народот да гласа за да ја  извлечат земјата од „темната јама на дводецениското владеење на Ердоган“.

Како што јави Ројтерс, Ердоган и Киличдароглу планираат да привлечат околу осум милиони гласачи кои не излегоа на гласање во првиот круг од изборите.

Првиот круг од претседателските избори се одржа на 14 мај, а Ердоган освои повеќе од 49 отсто, додека Киличдароглу близу 45 отсто.

За победа беа потребни 50 отсто плус еден глас.

Обраќајќи им се на поддржувачите во Истанбул за време на последниот предизборен митинг пред вториот круг, Ердоган апелираше на голем одѕив.

„Ќе одиме ли утре на гласање? Ќе излеземе рано сабајле да гласаме за некого? Секој што гласал во првиот круг нека гласа и во вториот“ рече Ердоган, додека публиката воодушевено извикуваше „да“ – додава Ројтерс.

Киличдароглу, кој е поддржан од шест опозициски партии, рече дека секој што ја сака Турција „мора да гласа“.

„Ако навистина сакате, сите заедно ќе излеземе од оваа темна јама. Ги повикувам луѓето да гласаат, без разлика на ставовите или начинот на живот. Ова е последна шанса. Секој што ја сака земјата треба да излезе на избори“, порача Киличдароглу на Твитер.

Третопласираниот Синан Оган, кој освои 5,2 отсто од гласовите во првиот круг, го поддржа Ердоган.

Избирачките места се отвораат утре во 08:00 часот, а се затвораат во 17:00 часот по локално време.

Право на глас имаат над 60 милиони гласачи, а неофицијални резултати се очекуваат веќе во недела доцна навечер.

Сопственикот на српската телевизија Пинк, Жељко Митровиќ, на „Твитер“ објави дека оценката на претседателот на  Србија, Александар Вучиќ е поважна од интересот на „ТВ Пинк“ и од неговиот личен интерес. Затоа и донел одлука за укинување на реалното шоу „Задруга“ што е можно поскоро.

Митровиќ, најави дека во наредните десетина дена ќе го откаже реалното шоу „Задруга“.

Претходно, медиумите во Србија објавија дека Вучиќ изјавил оти во разговор со сопственикот на телевизијата Пинк го замолил да ја разгледа можноста за укинување на реалното шоу.

Српскиот актер Сергеј Трифуновиќ изреагира на објавата на Жељко Митровиќ, сопственикот на телевизијата Пинк, дека ќе го укине контроверзното реално шоу „Задруга“.

Како што објави босанскиот медиум „Кликс“, Трифуновиќ кратко искоментирал на неговата објава: „Брате, доцна е. Предоцна. За сѐ“.

По масакрот во белградското основно училиште „Владислав Рибникар“, јавноста покрена петиција за укинување на реалните шоуа и одземање на лиценците за работа на телевизиите „Пинк“ и „Хепи“. Исто така, едно од барањата на протестот „Србија против насилството“ беше укинување на програмите кои промовираат насилство и неморал, како што се реалните шоуа.

На седницата на вонредното собрание на партијата во Крагуевац за претседател на Српската напредна партија е избран актуелниот министер за одбрана и потпретседател на српската влада, Милош Вучевиќ.

Претходно денеска, на вонредното собрание, Вучиќ, предлагајќи го Вучевиќ за свој наследник, рече дека „го познава како човек лојален на СНС, од добро семејство, но и посветен на идејата за независна и просперитетна Србија“.

Вучевиќ рече дека „голема е предноста кога ја наследуваш партијата по Вучиќ“.

„Ќе имам една голема предност во политиката, што покрај себе ќе имам таков политичар како што е Александар Вучиќ. Потешката околност е што не е лесно да се зачува и подобри и да се продолжи понатаму. Верувам дека заедно, како тим, раководството на партијата, ќе бидеме достојни на тој предизвик и свесни за тие обврски“, рече тој.

Тој рече дека ќе има можност да се консултира и со други членови на партијата, бидејќи не е проблем да се прашува, важно е да се разговара, да се разменат мислења. Вучевиќ рече дека СНС е подготвена да разговара со сите политички актери.

Потврди дека исто како и Вучиќ, нема да дозволи преодна Влада во Србија.

„Владата се формира само врз основа на мнозинството во Собранието, а тоа се добива со поддршка од граѓаните на избирачките места, односно на избори. За тоа нема дискусија и не оставаме ни милиметар простор за некој да замисли дека ќе ја преземе власта. Ја преземате власта кога ќе добиете мнозинска поддршка од гласачите“, рече тој.