Регион
Вулин: Ќе инсистирам на поостри казни за сите што предизвикуваат пожар
Министерот за внатрешни работи на Србија, Александар Вулин, посочи, за време на неговата посета на Пчињскиот округ, во кој се евидентирани повеќе од сто пожари во последните пет дена, дека ќе инсистира на заострување на казнената политика кон сите што предизвикуваат пожари.
Александар Вулин наведува дека од 25 јули до денес, Србија се соочила со повеќе од 850 пожари на отворено.
„Тоа покажува колку сме неодговорни, колку не мислиме, колку систематски немаме одговор за оние кои не се грижат за себе, но и за другите “, истакна Вулин.
Тој нагласи дека сите оние кои предизвикуваат пожари од негрижа мора да знаат дека ќе бидат пронајдени и дека ќе одговараат за се што направиле, и материјално и на кој било друг начин.
„Само во округот на Пчиња, од 2 август до денес се евидентирани повеќе од сто отворени огнови, а во гаснењето беа ангажирани 500 пожарникари и повеќе од сто возила, кои беа повлечени од цела Србија за да се реши проблемот настанат од неодговорните поединци, кои не размислуваа дека согорувањето на стрништата може да го запали целото село, лишувајќи некого од живот“, посочи министерот.
Како што е наведено во соопштението на Министерството за внатрешни работи, Вулин посочил дека во овој момент нема пожари во областа Пчиња кои се опасни, но и предупредил дека истите ќе ги има доколку поединци се однесуваат бескрупулозно.
„ Инсистирам на промена на казнената политика, и секако Секторот за вонредни ситуации и Министерството за внатрешни работи ќе сторат се за секогаш да бидат подготвени и способни да им помогнат и заштитат на сите наши граѓани“, нагласи Вулин.
Министерот додаде дека припадниците на Секторот за вонредни ситуации и Единицата за хеликоптери значително помагаат во гаснењето и локализирањето на пожарите во Северна Македонија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Нови детали за малата Данка: нејзината ДНК не била пронајдена на автомобилот со кој била удрена
Како што пренесува „Нова.рс“, на ниеден од предметите што биле земени за помош во истрагата не биле пронајдени биолошки траги од двегодишната Данка Илиќ од Србија.
Српскиот портал напиша дека досега се пронајдени повеќе од 400 траги во службеното возило за кое се сомневаат дека го користеле Дејан Драгојевиќ и Срѓан Јанковиќ кога, според нивното признание, го удриле девојчето. Обвинителството пред неколку дена ги доби резултатите од новите вештачења.
„Од внатрешноста на службениот автомобил во Бор се земени повеќе од 500 траги, како и траги од надворешната страна на автомобилот. Досега вештачењата покажаа дека нема трага од ДНК на Данка Илиќ ниту во самиот автомобил ниту на надворешните делови од возилото“, пишува „Нова.рс“ повикувајќи се на Вишото јавно обвинителство.
Медиумот потсетува дека осомничените работници на фирмата „Водовод“ од Бор, Јанковиќ и Драгијевиќ, биле на работна задача на 26 март кога во Бањско Поле исчезна двегодишно девојче. Според признанието на Драгијевиќ, девојчето го удриле со службеното возило, го задавиле и го фрлиле на дива депонија, од каде што два дена подоцна Дејан со својот татко (73) и сега починатиот брат Далибор (40) наводно го преселиле телото на друга, непозната локација.
Телото на двегодишната Данка сè уште не е пронајдено.
Регион
Се урна конструкција на рингишпил, повредени 13 деца, од кои едно е во животна опасност во Куршумлија
Во Куршумлија денеска се случила несреќа кога на локалниот саем се урнала конструкцијата на рингишпилот, пренесуваат српските медиуми.
Според написите, повредени се 13 деца, од кои едно потешко.
Станува збор за девојче, чиј живот е во опасност и има сериозни повреди на главата и ‘рбетниот столб.
Таа била итно префрлена во КЦ „Ниш“ на Одделот за неврохирургија.
Седум деца се во друга болница, каде што во тек е понатамошна дијагностика, а другите деца се полесно повредени, пишуваат тамошните медиуми.
Регион
Шји Џјинпинг: Србија е првата земја од Европа со која ќе изградиме заедница со заедничка иднина
Претседателот на Народна Република Кина, Шји Џјинпинг, изјави дека во денешните разговори со претседателот Вучиќ е постигнат значаен консензус и дека Србија ќе биде првата земја од Европа со која ќе изгради заедница со заедничка иднина.
„Заеднички објавивме дека ќе изградиме заедница меѓу Кина и Србија со заедничка иднина во новата ера, што ќе отвори ново поглавје во историјата на кинеско-српските односи. Пред осум години Србија стана првиот сеопфатен стратешки партнер на Кина во Централна и Источна Европа, а денеска станува првата европска земја во која ќе изградиме заедница со заедничка иднина“, рече Шји во говорот по размената на потпишаните меѓудржавни договори меѓу Србија и Кина во Палатата „Србија“.
Тој посочи дека како вистински пријатели и добри партнери Кина и Србија уживаат политичка доверба, која е силна како карпа.