Регион
Ердоган сигурен во победата: „Некој е во кујната, а ние на балконот“
Резултатите покажуваат дека актуелниот претседател Реџеп Таип Ердоган освоил 49,39 отсто од гласовите, а неговиот главен ривал Кемал Киличдароглу 45 отсто, јавува „Анадолија“.
Ниту Ердоган, кандидатот на Партијата на правдата и развојот (АКП), ниту Киличдароглу, кандидатот на опозициската Републиканска народна партија (ĆP), не успеаја да освојат повеќе од 50 отсто од гласовите потребни за победа во првиот круг и ќе имаат да се натпреваруваат во вториот круг, што ќе се одржи на 28 мај.
Киличдароглу, кој најави дека ќе победи во вториот круг, ги повика своите поддржувачи да бидат трпеливи и ја обвини партијата на Ердоган дека се меша во пребројувањето на гласовите и известувањето на резултатите.
Сепак, Ердоган постигна подобар резултат отколку што предвидуваа предизборните анкети и им се обрати на своите поддржувачи во самоуверено и борбено расположение.
„Веќе сме пред нашиот најблизок ривал со 2,6 милиона гласови. Очекуваме оваа бројка да се зголеми со конечните официјални резултати“, рече актуелниот турски претседател.
Својот говор го почна со зборовите „некој е во кујната, а ние на балконот“ мислејќи на неговиот главен противкандидат Кемал Киличдароглу, кој за време на изборната кампања објави видеа од неговата скромна кујна.
Ердоган говореше од истиот балкон на претходните избори, на кои победи поубедливо. Би-би-си објави дека Ердоган се чини дека води кампања за вториот круг од балконот користејќи го фактот дека освоил повеќе гласови од неговиот ривал во првиот круг.
Победата на Ердоган, веројатно, ќе му оди во прилог на официјален Кремљ, но ќе ја вознемири администрацијата на Бајден, како и многу лидери на европските и блискоисточните земји, кои имаа проблематични односи со него.
Третиот националистички претседателски кандидат од партијата на Сојузот на предците, Синан Оган, освои 5,3 отсто од гласовите и со неговата поддршка за еден од двајцата главни кандидати во вториот круг може да влијае на конечниот исход на претседателските избори.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Словенечкиот премиер најави построги безбедносни мерки по убиството
Словенечкиот премиер Роберт Голоб најави засилување на безбедносните мерки и измени во казнената политика по смртта на 48-годишен маж во Ново Место, кој почина по напад, пренесе „Индекс“.
Во телевизиско обраќање, Голоб рече дека државата ќе направи сè за да ја заштити безбедноста на граѓаните, но предупреди дека „репресивните мерки нема да бидат популарни“.
Тој најави двојно зголемено полициско присуство во југоисточниот дел на земјата и рече дека сите институции – полицијата, обвинителството и судството – ќе добијат поголеми овластувања.
„Овој сторител не стана таков преку ноќ. Тој е производ на систем што не функционирал. За да го смениме тоа, ќе биде потребна цела генерација“, изјави Голоб.
Премиерот ги повика сите политички лидери да покажат одговорност и да не ја користат трагедијата за собирање политички поени.
Регион
Курти не успеа да формира влада
Лидерот на Движењето „Самоопределување“, Албин Курти, соопшти дека актуелната влада ќе продолжи да функционира до одржување на нови парламентарни избори, откако денеска во косовското Собрание не доби доволен број гласови за формирање нов кабинет, пренесе „Фонет“.
„Им благодарам на сите пратеници кои го поддржаа предлогот за новата влада и на граѓаните за поддршката. Бидејќи 56 гласа беа за, 52 против, а четворица воздржани, новиот мандат не може да започне. Во меѓувреме, како актуелна влада продолжуваме кон новите парламентарни избори“, напиша Курти на „Фејсбук“, пренесе „Косев“.
По гласањето, претседателот на Собранието, Димал Баџа, изјави дека одговорноста сега преминува на претседателката Вјоса Османи, која најави консултации со сите партии. Доколку не биде формирана влада, Османи ќе распише нови избори во рок од 40 дена.
Опозициските партии веќе порачаа дека нема да се обидат да формираат влада, бидејќи немаат мнозинство.
Регион
„Ројтерс“: Нафтата за Србија заглави во Хрватска, американските санкции го блокираа танкерот на НИС
Американските санкции воведени против Нафтната индустрија на Србија (НИС), која е во мнозинска руска сопственост, ја спречиле клучната испорака на сурова нафта, што може да доведе до запирање на единствената рафинерија во земјата доколку не се обезбедат нови залихи, пренесе „Ројтерс“, цитира „Индекс“.
Според неименувани извори запознаени со ситуацијата, Србија има само уште неколку дена пред рафинеријата на НИС во Панчево да мора да го прекине процесот на преработка на сурова нафта. Од компанијата не дале коментар.
Претседателот Александар Вучиќ уште на 9 октомври предупреди дека рафинеријата, која снабдува голем дел од пазарот со горива, вклучувајќи бензин и авио-гориво, ќе има тешкотии по 1 ноември. Сепак, Вучиќ порача дека складиштата се полни и дека постојните резерви ќе бидат доволни до крајот на годината.
„Нема да има недостиг од сурова нафта, нејзини деривати ниту енергетска криза“, изјави тој минатата недела.
Испораката запрена во Хрватска
Како што наведува „Ројтерс“, танкерот Maran Helios, кој превезувал околу еден милион барели казахстанска сурова нафта (KEBCO) за НИС, пристигнал во хрватското пристаниште Омишал на 9 октомври — токму на денот кога стапиле во сила санкциите. Меѓутоа, товарот никогаш не стигнал до Србија.
Хрватскиот оператор „Јанаф“ соопштил дека до 8 октомври ја испорачал целата нафта што се наоѓала во неговиот систем и била во сопственост на НИС, и дека по тој датум немало нови испораки за Србија.
Ова, според агенцијата, укажува дека казахстанската нафта купена од НИС воопшто не била примена во системот. „Ројтерс“ не успеал да потврди дали товарот, кој бил истоварен во вторникот по две недели чекање пред пристаништето, е складиран во Омишал или препродаден на друг купувач.
Можна енергетска криза во Србија
Блокираната пратка на сурова нафта би била доволна за работа на рафинеријата во Панчево околу десет дена. Иако моменталните резерви се речиси целосни, нивното намалување ќе ја направи Србија сè позависна од увоз.
Русија и Србија, како што наведува „Ројтерс“, се обидуваат да најдат решение со кое би се укинале американските санкции што стапија на сила по истекот на последното изземање.
„За мене тоа не е прашање. Рафинеријата мора да работи, а бензинските пумпи мора да останат оперативни“, изјавила за „Ројтерс“ Надежда Кокотовиќ, поранешна раководителка на канцеларијата на НИС за односи со Европската унија.

