Регион
Српската државна изборна комисија ја оспорува кандидатурата на „шегобиецот“ Љубиша Прелетачевиќ – Бели
Српската државна изборна комисија (РИК) во неделата пред истекот на рокот за поднесувањето на кандидатурите за претседателските избори во Србија ги оспори потписите на српскиот политичар и лидер на граѓанското движење „Само јако“, Лука Максимовиќ, попознат како Љубиша Прелетачевиќ – Бели, кој на локалните избори минатата година во земјата преку пародија кампања успеа да добие 13 мандати во локалното собрание на општината Младеновац, пренесуваат српските медиуми.
Прелетачевиќ во неделата пред истекот на рокот бил повикан во РИК бидејќи во дел од собраните потписи не стоела одредницата „Група граѓани“, пред описот на неговото движење „Бели – само јако“. Конечната одлука на РИК ќе се знае во понеделникот после пладне, пишува N1.
Народниот фаворит и шегобиец Бели, по повод случајот не се огласи во медиумите, но на својот Фејсбук профил напиша дека очекува „работите да се решат на убав и фин начин“. „Напнато е, ве сакам сите. Без загриженост, ќе решиме се убаво и фино“, напиша Прелетачевиќ.
Лидерот на граѓанското движење кое започна во Младеновац минатата година со паролата „Сарму пробо ниси“, во Белград во неделата пристигна во бела лимузина и ги предаде потписите за претседателската кандидатура, а целото случување беше пренесувано во живо на Фејсбук.
Политичарот под псеводоним, кој на минатите локални избори успеа да добие 13 мандати во локалното Собрание на Младеновац, за своето алтер-его (Љубиша Прелетачевиќ – Бели) вели дека не е ништо друго, туку типичен српски политичар: гласен, нечесен и неискрен; се занимава со некои матни работи и не почитува закони./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Сијарто: Фокусот на унгарското претседателство со ЕУ ќе биде проширувањето на Унијата на Западен Балкан
За време на претстојното претседавање со ЕУ, Унгарија планира да се фокусира на прашања кои се важни за централна Европа, како што се борбата против илегалната миграција, проширувањето на Унијата кон Западен Балкан и енергетската безбедност, изјави денеска унгарскиот министер за надворешни работи, Петер Сијарто.
Кога станува збор за проширувањето на ЕУ, Сијарто на прес-конференција со својот чешки колега Јан Липевски рече дека регионот на Западен Балкан не заслужува да чека 14 години и 11 месеци за членство, што, како што вели, го поткопува кредибилитетот на политиката на Унијата, објави унгарската агенција МТИ.
„Тоа е ситуација што треба да се реши, така што унгарското претседателство (со Унијата) има јасна агенда да им помогне на земјите од Западен Балкан да го забрзаат пристапниот процес“, рече Сијарто.
Посочи дека ефектите од миграцијата директно се чувствуваат во Централна Европа од 2015 година и неопходна е сериозна регионална соработка за да се запре мигрантскиот прилив.
„Чешката, словачката и полската полиција ни помогнаа и ни помагаат на јужните граници на Унгарија да ги задржиме илегалните мигранти кои и се закануваат на Европа надвор од границите. Потребни се континуирани заеднички напори на четворицата централноевропски премиери за да се држи под контрола прашањето за квотите и да не се дозволи илјадници или десетици илјади илегални мигранти да се шетаат неконтролирано“, додаде Сијарто.
Шефот на унгарската дипломатија нагласи дека централна Европа „ќе продолжи да се спротивставува на притисоците поврзани со квотите“. Сијарто се осврна и на енергетската безбедност, наведувајќи дека Унгарија и Чешка планираат нуклеарен развој и затоа ќе продолжат да се борат против негативната дискриминација поврзана со нуклеарната енергија во Брисел.
Нуклеарната енергија е одржлив начин за производство на енергија, тоа е безбеден, еколошки и евтин метод за производство на големи количини електрична енергија“, заклучува Сијарто.
Регион
Ана Брнабиќ за 2 јуни распиша локални избори во 66 единици на локалната самоуправа
Претседателката на српското собрание Ана Брнабиќ распиша избори за 2 јуни во 66 единици на локалната самоуправа, бидејќи Националното собрание неодамна со две третини ги усвои измените на Законот за локални избори.
Изборите во овие локални самоуправи ќе се одржат на ист ден со изборите за советници во Градското собрание на Белград, односно на 2 јуни годинава.
„Среќна сум што испративме силна порака од парламентот до сите наши граѓани дека како нивни избрани сме способни да разговараме и да постигнеме договор и покрај сите наши разлики“, рече Брнабиќ по објавата.
Регион
(Видео) Уапсени Срби во Атина, поранешни членови на „Пинк Пантер“: осомничени се за украден накит вреден 315.000 евра
Двајца Срби, кои во минатото биле членови на организацијата „Пинк Пантер“, се уапсени во Атина под сомнение дека ограбиле две познати златарници во центарот на грчката престолнина, соопшти атинската полиција.
Според соопштението на грчката полиција, уапсените оперираат најмалку од минатиот декември, а се претпоставува дека имале соодветна мрежа за канализирање на украдени предмети, бидејќи оствариле добивка од над 315.000 евра.
По претресот во нивните домови, меѓу другото, пронајден е алат користен при кражбата, три рачни часовници, накит, 190 евра, лажна возачка дозвола, три мобилни телефони, лични предмети, како и дополнителен мотоцикл и автомобил што служеле за превоз.