Регион
Францускиот суд ја одложи одлуката за екстрадиција на Харадинај за 2-ри март
Апелациониот суд во францускиот град Колмар го одложи за 2-ри март носењето на одлуката по барањето на Србија за екстрадиција на поранешниот командант на Ослободителната војска на Косово (ОВК – UCK) и подоцнежен косовски премиер Рамуш Харадинај, пренесуваат во четвртокот белградските електронски медиуми.
Претседателот на опозициската партија Алијанса за иднината на Косово изјави дека не прифаќа да ѝ биде предаден на Србија, оценувајќи дека станува збор за „политички процес“, па одлуката на судот во Колмар за тоа дали тој ќе биде екстрадиран според барањето на Белград ќе биде донесена на 2-ри март.
Арјанит Кочи, адвокатот на Харадинај, пред почетокот на судската расправа, пред новинарите изјавил дека е уверен оти ќе биде отфрлено барањето на Србија, врз основа на чија меѓународна потерница неговиот клиент беше уапсен во Франција и оти тој слободен ќе може да се врати на Косово. Кочи, исто така, додал дека очекува „ова да биде последната расправа пред судот“, според белградските медиуми.
На расправата во судницата присуствувал голем број приврзаници на Харадинај, меѓу кои и оние кои носат маици со симболи на „Голема Албанија“, пренесува српската новинска агенција Танјуг.
Портпаролката на судот во Колмар, Сандра ди Роса, истакнала дека истражниот оддел на судот може да го наведе своето мислење, но дека одлуката за барањето за екстрадиција „најверојатно ќе биде донесена со одложување од неколку седмици“.
Жалбениот суд во Колмар во четвртокот одлучуваше по прашањето дали се исполнети условите за екстрадиција на Харадинај, коишто се предвидени со Европската конвенција за екстрадиција, но не го одредува рокот за носење на одлуката, а постапката за одлучување се води во согласност со процесните закони на Франција.
„Доколку апелациониот суд во Колмар даде негативно мислење за барањето на Србија, предавањето на Харадинај нема да биде можно“, додала портпаролката на судот ди Роси.
Во тој случај Харадинај би бил слободен да ја напушти Франција, а Србија не би имала право на жалба на таквата одлука.
„Но доколку, пак, апелациониот суд утврди дека се исполнети условите за екстрадиција на Харадинај, конечната одлука за предавањето ќе го донесе владата на Франција“, појаснила гласноговорничката на судот во Колмар.
Рамуш Харадинај беше уапсен на 4-ти февруари на границата меѓу Франција и Швајцарија по потерница од Србија којашто го обвинува за воени злосторства извршени на територијата на нејзината поранешна јужна покраина Косово и Метохија во судирите од 1998/1999 година. Нему француските власти по пасењето му го одземаа пасошот, по што Србија на Франција ѝ упати официјално барање за негово предавање.
Истрагата против Харадинај во Србија е покрената во 2004 година, а неодамна беше проширена со нови обвиненија и нови докази кои се проследени до судот во Колмар., кои не биле опфатени со обвинението на Хашкиот трибунал по кое Харадинај е правосилно ослободен. Српското обвинителство против Харадинај поднесе 108 кривични пријави, во кои е осомничен за тероризам, здружување поради непријателска дејност и убивање цивили.
Станува збор за воени злосторства против цивили во ткн зона на одговорност Дукаѓини во 1998 и 1999-та во областа на Дечани во 1998 година, а сообвинети беа Идриз Баљај и Љах Браимај. Обвинителите на Трибуналот бараа казна од најмалку 20 години затвор, а на крајот од првото судење Харадинај и Баљај во 2008 година беа ослободени од вината, а Браимај беше осуден на шест години затвор.
Повторното судење на Харадинај и сообвинетите започна во август 2001 година, а по една година беа ослободени од вината, и Харадинај и двата негови соработници од ОВК. Во текот на овој судски процес неколку сведоци беа убиени или настрадале во неразјаснети несреќи на Косово или во странство./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Сијарто: Фокусот на унгарското претседателство со ЕУ ќе биде проширувањето на Унијата на Западен Балкан
За време на претстојното претседавање со ЕУ, Унгарија планира да се фокусира на прашања кои се важни за централна Европа, како што се борбата против илегалната миграција, проширувањето на Унијата кон Западен Балкан и енергетската безбедност, изјави денеска унгарскиот министер за надворешни работи, Петер Сијарто.
Кога станува збор за проширувањето на ЕУ, Сијарто на прес-конференција со својот чешки колега Јан Липевски рече дека регионот на Западен Балкан не заслужува да чека 14 години и 11 месеци за членство, што, како што вели, го поткопува кредибилитетот на политиката на Унијата, објави унгарската агенција МТИ.
„Тоа е ситуација што треба да се реши, така што унгарското претседателство (со Унијата) има јасна агенда да им помогне на земјите од Западен Балкан да го забрзаат пристапниот процес“, рече Сијарто.
Посочи дека ефектите од миграцијата директно се чувствуваат во Централна Европа од 2015 година и неопходна е сериозна регионална соработка за да се запре мигрантскиот прилив.
„Чешката, словачката и полската полиција ни помогнаа и ни помагаат на јужните граници на Унгарија да ги задржиме илегалните мигранти кои и се закануваат на Европа надвор од границите. Потребни се континуирани заеднички напори на четворицата централноевропски премиери за да се држи под контрола прашањето за квотите и да не се дозволи илјадници или десетици илјади илегални мигранти да се шетаат неконтролирано“, додаде Сијарто.
Шефот на унгарската дипломатија нагласи дека централна Европа „ќе продолжи да се спротивставува на притисоците поврзани со квотите“. Сијарто се осврна и на енергетската безбедност, наведувајќи дека Унгарија и Чешка планираат нуклеарен развој и затоа ќе продолжат да се борат против негативната дискриминација поврзана со нуклеарната енергија во Брисел.
Нуклеарната енергија е одржлив начин за производство на енергија, тоа е безбеден, еколошки и евтин метод за производство на големи количини електрична енергија“, заклучува Сијарто.
Регион
Ана Брнабиќ за 2 јуни распиша локални избори во 66 единици на локалната самоуправа
Претседателката на српското собрание Ана Брнабиќ распиша избори за 2 јуни во 66 единици на локалната самоуправа, бидејќи Националното собрание неодамна со две третини ги усвои измените на Законот за локални избори.
Изборите во овие локални самоуправи ќе се одржат на ист ден со изборите за советници во Градското собрание на Белград, односно на 2 јуни годинава.
„Среќна сум што испративме силна порака од парламентот до сите наши граѓани дека како нивни избрани сме способни да разговараме и да постигнеме договор и покрај сите наши разлики“, рече Брнабиќ по објавата.
Регион
(Видео) Уапсени Срби во Атина, поранешни членови на „Пинк Пантер“: осомничени се за украден накит вреден 315.000 евра
Двајца Срби, кои во минатото биле членови на организацијата „Пинк Пантер“, се уапсени во Атина под сомнение дека ограбиле две познати златарници во центарот на грчката престолнина, соопшти атинската полиција.
Според соопштението на грчката полиција, уапсените оперираат најмалку од минатиот декември, а се претпоставува дека имале соодветна мрежа за канализирање на украдени предмети, бидејќи оствариле добивка од над 315.000 евра.
По претресот во нивните домови, меѓу другото, пронајден е алат користен при кражбата, три рачни часовници, накит, 190 евра, лажна возачка дозвола, три мобилни телефони, лични предмети, како и дополнителен мотоцикл и автомобил што служеле за превоз.