Детското одделение за анестезија, реанимација и интензивно лекување  во велешката болница доби нов аспиратор за активна торакална дренажа.

Потребата децата со респираторни заболувања да се носат на лекување во скопските клиники веќе е минато, јави пораталот Лисица. Апаратот кој ќе ги подобри здравствените услуги во велешката болница е донација од Жито Маркети.

„Ќе биде сместен на интензивниот оддел во хирушките сали каде што најчесто ќе се користи заради тоа што најголме број на пациентите ќе бидат таму присутни“, рече др. Атанас Василев, директот на Општа болница Велес.

Средствата за набавка на овој апарат Жито Маркети  ги обезбеди преку  кампањата „Навика да добивам повеќе“ и картичката за лојалност која веќе ја имаат над 20 илјади потрошувачи.

„Со донацијата во Велес нашата кампања ги дава првите резултати. Се одлучивме донацијата да ја лоцираме во детското одделение откако бевме информирани дека аспираторот на ова одделение е од приоритетна важност и дека во голема мера ќе им помогне на малите пациенти“, рече Далибор Ѓошевски, генерален директор на Жито Маркети.

Освен дренажниот апарат, Жито денеска донираше и постелнина, кебиња и новогодишни пакетчиња за дечињата кои се лекуваатво болницата.

„Успешноста на една компанија не зависи само од нејзините финансиски парамнетри туку и од сопствената хуманост што ја манифестира во средината во која работи“, рече Стојанче Тодоров, маркетинг директор на Жито Маркети.

На новогодишните пакетчиња најмногу им се израдуваа децата. Не ги криеја ни своите желби за посреќна Нова Година.

„Сакам Дедо Мраз да ми донесе креветче и кукла“, „Највеќе  сакам возови“, „Сакам кукли, сакам велосипед, и голема елка со многу лампиони и светилки“, велат дечињата кои се лекуваат на детското одделение во велешката болница.

Ова не е прва донација на Жито Маркети. Од таму велат  општествено одговорни ќе бидат во  секоја општина каде што имаат  маркети. /крај/