Безредија со посериозни судири со полицијата избувнаа во саботата навечер во грчката престолнина Атина, по маршот во организација на левичарските организации и анархистички движења во сеќавање на полициското убиство на 15-годишниот Алексис Григоропулос на 6-ти декември 2008 година при што се уапсени најмалку 30 луѓе, пренесуваат тамошните медиуми, но засега нема информации за повредени.

Во Атина, како и во Солун и Патрас, во саботата попладнето беше одржан маршот кој е израз на протест против властите. Според последните информации на атинските медиуми, во главниот град на Грција на маршот кој попладнето мина мирно учествувале околу шест илјади луѓе.

Меѓутоа, вечерта започнал втор митинг во организација на анархистите, на кој според процените на електронските медиуми се собрале околу пет илјади луѓе. Најголемиот број од нив носат маски и капи со коишто ги покриваат лицата, а во рацете држеле палки.

Поворката тргнала од Атинскиот универзитет. На плоштадите Клафтмонас и Омонија анархистите започнале да ги палат контејнерите со ѓубре, да кршат излози на продавниците, автобуски постојки, и да фрлаат Молотови коктели и камења.

За спречување на поголеми инциденти, полицијата употребила солзавец и шок гранати, пишува интернет страницата на весникот Ethnos. „Центарот на Атина се претвори во бојно поле“, пишува весникот. Полицијата, исто така, е подготвена за ескалација на немирите и нивно омасовување па ги подготвила водените топови коишто не се употребени од 2012 година.

Во моментов толпата се движи во квартот Егзархија. Анархистите собираат камења и откорнуваат мермерни блокови од згради, најверојатно за да ги употребат доколку дојде до судири со полицијата, пренесува репортерот на телевизијата Skai./крај/мф/сн

Извор: Макфакс