Двегодишно момченце е брутално убиено во Зворник, во источна Босна, а за ова злосторство се осомничени вујкото и неговата невенчана сопруга, потврди во вторникот локалната полиција.

По момченцето кое имало само дваесет месеци полицијата на Босна и Херцеговина трагаше од 18-ти август, кога е пријавено неговото исчезнување.

„Со оперативните мерки на теренот полициските службеници дошле до сознанија дека лицата Ф.Д и М.С. најверојатно му го одземале живото на детето“, соопштиле од полициската управа во Бијелина, која ја покрива и областа на Зворник, пренесува агенцијата Hina.

Локалните медиуми, пак, објавија дека се уапсени Мијат Станкиќ и неговата невенчана сопруга Фатима Дурак.

Бањалучкиот дневен весник Независне новине пренесува, повикувајќи се на портпаролката на полицијата во Бијелина Александра Симојловиќ, дека Станкиќ и Дурак го признале злосторството и на иследниците им го покажале местото каде е закопано детето, но мотивите поради кои го извршиле ова страшно злосторство уште се непознати.

Убиеното момченце и неговото братче се деца на разведени родители, а социјалната служба грижата за нив ја доделила на бабата којашто живеела со нив во селото Каменица. Во нивното соседство живееле и вујкото и неговата партнерка, на коишто бабата им ги поверила на чување внучето.

Исчезнувањето на детето го пријавил таткото Слаѓан Реџиќ, кој ја предупредил полицијата на 16-ти август кога барал да се види со синот, но бабата и вујкото не му дозволиле, а детето било видено последен пат со Фатима Дурак./крај/мф/сн

Извор: Макфакс