Новата грчка левичарска влада, којашто вети дека ќе ги укине непопуларните штедења кои се услов за меѓународните кредитори, ќе побара подоцна во вторник, две седмици по изборната победа, парламентот да и’ изгласа доверба. 

Гласањето за довербата на владата предводена од коалицијата на радикалната левица Сириза, која има 162 пратеници во 300-члениот парламент со својот помал коалициски партнер малата десничарска партија Независни Грци, ќе се одржи околу полноќ и не се очекуваат никакви изненадувања.

Гласањето за довербата за владата ќе се одржи пред важниот вонреден состанок на министрите за финансии на земјите членки на еврозоната, кој ќе биде посветен исклучиво на грчките финансиски проблеми.

Грчкиот премиер Алексис Ципрас најави дека има намера да се откаже од непопуларните мерки за штедење кои се услов за меѓународната финансиска помош, на што се противат европските партнери предводени од Германија.

Високи изводи од грчкото министерство за финансии изјавија дека владата на Ципрас има намера на состанокот на еврогрупата да предложи преодна програма со којашто би ги покрила своите финансиски потреби додека со доверителите не договори замена на сегашната програма за помош условена со штедењето, а тој нов договор би требало да стапи на сила на 1-ви септември наместо на предвидениот датум 1-ви јуни.

Владиниот предлог се состои од четири делови, според грчкото министерство за финансии. Првиот предвидува задржување на 70 отсто од условите од меѓународната програма за финансиската помош, додека 30 отсто од мерките би биле укинати и заменети со 10 нови реформи коишто грчките доверители (Европската комисија, Европската централна банка и Меѓународниот монетарен фонд), ќе ги договорат со Организацијата за економска соработка и развој (OECD).

Вториот се однесува на примарниот суфицит кој во 2015 година би требало да изнесува 3 отсто од бруто домашниот производ (НДП), а владата на Ципрас сака да го намали на 1,5 отсто. ММФ, пак, бара суфицитот да изнесува дури 4 отсто од БДП-то, за Грција да може да си ги отплатува долговите.

Третиот предлог се однесува на замената на јавниот долг со обврзници поврзани за растот, додека отписот на дел од долгот веќе не се споменува, иако премиерот Ципрас и неговиот министер за финансии Јанис Варуфакис често го споменуваа во текот на нивната минатонеделна турнеја по Европа кога бараа поддршка за својот план. Грција во моментов е должна 317 милијарди евра, односно 175 отсто до БДП-то. Меѓународната програма за помош изнесува 240 милијарди евра, а и’ беа отпишани и 110 милијарди евра долгови кон приватните кредитори.

Владата во Атина, исто така, сака да ја ублажи и социјалната криза во земјата со мерките како што се зголемување на минималната плата и укинувањето на зголемувањето на данокот. Покрај тоа, ветува и остро справување со корупцијата и даночната евазија.

Ципрас вети и дека од Германија ќе побара отштета за Втората светска војна, како и враќање на заемот кој морала на нацистичките влади да им го даде грчката централна банка. Станува збор за сума којашто би одговарала, според Атина, на половината од грчкиот долг.

Германија во понеделникот објави дека нема никакви шанси на Грција да и’ ја плати отштетата за Втората светска војна, што го побара грчкиот премиер Алексис Ципрас.

Германија од крајот на војната во 1946 година, според договорот и’ ги исплатила репарациите на Грција, и активно го поддржала обновувањето на земјата, појасни во неколку наврати изминатите години Берлин. Германија и’ платила на Грција во 1960 година, 115 милиони тогашни германски марки (67 милиони долари) за штетата предизвикана од окупацијата во периодот од 1941 до 1944 година, кога стотици илјади луѓе во Грција починале од глад или биле убиени. Грчките влади, пак, смета дека овие исплати се несоодветни.

Германскиот вицеканцелар и министер за економија Зигмар Габриел во понеделникот потсети на „Спогодбата за конечно решение со обѕир на Германија“, попознат како „Спогодбата два плус четири“, којашто во септември 1990 година, непосредно пред обединувањето на Германија, го потпишаа тогашните Западна и Источна Германија и четирите земји сојузнички од Втората светска војна. Со тој документ, што го потпишала и Грција, повлечена е линија под можните идни барања кон Германија за воена отштета, потсети Габриел.

Кога станува збор за финансирањето, извори од грчкото министерство за финансии за домашните медиуми изјавија дека Грција сака поврат 1,9 милијарди евра заработка од Европската централна банка (ECB) и другите централни банки од еврозоната на грчките обврзници, како и правото да издаде уште околу 8 милијарди евра краткорочни долгови или трезорски записи, над веќе искористениот лимит од 15 милијарди евра. Минатата седмица беше споменувани и зголемување на тој лимит за нови 10 милијарди евра.

Атина сака и Европската централна банка да и’ одобри и поголем лимит итни заеми за ликвидноста (ELA). Тие заеми на грчките комерцијални банки од минатата седмица им ги одобрува грчката централна банка, со одобрување на ЕСВ, но тие се поскапи од редовното финансирање. Тие заеми за банките се неопходни, бидејќи ЕСВ повеќе не ги прифаќа грчките државни обврзници како осигурување за финансирањето, бидејќи тие се оценети со ниво „ѓубре“.

Грчката влада предвидува и користење на досега неискористените 11 милијарди евра од фондот за докапитализација на банките за да им помогне на грчките банки да ги покријат загубите од ненаплатливите кредити.

Европската комисија, меѓутоа, не верува премногу во можноста да биде постигнат договор со Грција оваа седмица.

„Не постојат премногу очекувања во врска со можноста да се постигне договор на состанокот на еврогрупата или на самитот на ЕУ. Состанокот на еврогрупата во средата ќе биде можност за првично разменување на мислењата со новата грчка влада“, изјави во вторникот портпаролката на Европската комисија, Мина Андреева. Додаде дека следниот состанок на еврогрупата е предвиден за една седмица, на 16-ти февруари.

Грција би требала најдоцна до 16-ти февруари да постигне договор со доверителите, бидејќи повеќе земји членки, меѓу кои и влијателната Германија, мораат таков договор да потврдат во своите парламенти. Сегашната програма, инаку, истекува на 28-ми февруари.

Андреева рече и дека досегашните контакти на претседателот на ЕК, Жан-Клод Јункер, и грчкиот премиер Алексис Ципрас не дале резултати. „Досегашните разговори не беа многу плодни. Работиме на тоа да ја задржиме Грција во Еврозоната“, додаде.

Доколку пропадне договорот со еврозоната, Грција би можела да се сврти кон Америка, Русија или Кина, се закани во вторникот грчкиот министер за одбрана Панос Каменос, инаку челник, на помалиот коалициски партнер во владата националистичката Независни Грци. Тој рече дека Атина мора да има план „Б“, доколку еврозоната ги одбие нејзините предлози.

„Сакаме договор. Доколку нема договор и доколку Германија остане ригидна и сака да ја разнесе Европа,наша обврска е да имаме план Б. А планот В е да се најде друг извор за финансирање. Тоа би можело да бидат САД, во најдобриот случај, би можела да биде Русија, би можела да биде Кина или некој четврти“, изјави Каменос за телевизијата Mega./крај/мф/сн

Извор: Макфакс