Поради напишан коментар под вест на црногорскиот портал „Вијести“, со кој наводно била загрозена безбедноста на црногорскиот премиер Мило Ѓукановиќ, 28-годишен подгоричанец заработил кривична пријава, пренесуваат црногорските медиуми.

Лука Вукојевиќ во спорниот коментар напишал дека ќе го убие премиерот Мило Ѓукановиќ за да ја спаси нацијата. Неговиот коментар бил објавен под вест со наслов „Порака до буржуите: Нè ограбивте, но нема да нè угнетувате“.

Вукојевиќ под овој текст го напишал следниот коментар: „Ќе се жртвувам. За нацијата. Запамтете што ви кажувам. Ќе ме знаете по име и презиме. Ќе го убијам премиерот. Така ќе го завршам мојот живот, но и со 20 години затвор. Барем да направам нешто за своите деца, кога изборите не помагаат. Се надевам дека некој постхумно ќе ми крене споменик. Не можам веќе“.

Откако полицијата добила информација дека на 14-ти мај бил објавен коментар со ваква содржина, започнала акција за да најде кој е авторот.

„Во акцијата за идентификување и пронаоѓање на осомничениот подгоричанец се вклучија и останатите органи за борбата против организираниот криминал и корупција. За случувањата беше известено и Основното државно обвинителство во Подгорица, кое утврди дека во постапката на Вукојевиќ има елементи на кривично дело“, соопштиле од црногорското МВР, пишува весникот „Дан“./крај/мф/бс