Германија, којашто стана крајната дестинација за стотици илјади имигранти во текот на 2015 година, по забрзана постапка ќе ги врати сите албански баратели на азил, околу 50.000 луѓе, објави во петокот во Тирана германскиот министер за внатрешни работи Томас де Мезиер.

„Сите баратели на азил, најмалку 50 илјади кои пристигнале од Албанија или имаат албански лични исправи, ќе бидат вратени“, изјавил Мезиер во изјавата за новинарите по средбата со албанскиот колега Самир Тахири.„Имајќи предвид дека Албанија е на листата ’сигурни земји’ (во коишто се почитуваат демократските стандарди –з.р.), сите барања за азил ќе бидат одбиени“, нагласил германскиот министер за внатрешни работи, додавајќи дека германските власти „ќе го забрзаат бројот на повратниците следните денови и седмици“.Иако бројот албански баратели на азил во Германија е во опаѓање, бројките и натаму се „загрижувачки“ со повеќе од 4.000 нови барања во октомври, додал Мезиер.По Сиријците, коишто бегаат од војната во нивната земја, во последните три месеца токму Албанците се најбројните баратели на азил во Германија, од август до октомври годинава ги имало речиси 20.000, се наведува во официјалниот документ на кој се повикува агенцијата AFP.„Шансите Албанците да успеат да добијат економски или политички азил се еднакви на нула“, потврдил албанскиот министер за внатрешни работи Самир Тахири./крај/мф/сн

Извор: AFP