Имигрантите и бегалците кои пристигнуваат во Грција мора да го наведат податокот за својата крајна дестинација за да може да го продолжат својот пат кон другите земји на Европската унија, откако Македонија претходно во четвртокот повторно ја отвори својата јужна граница за имигрантите, но само за оние кои изјавуваат дека сакаат да бараат азил во Австрија или во Германија, по одлуките на земјите од ткн балканска рута за сопирањето на миграцискиот прилив.

Претходно во средата Србија и Хрватска објавија дека на имигрантите ќе им го оневозможат влегувањето на нивните територии, доколку не наведат дека имаат намера да побараат азил во Австрија или во Германија.

„Од денеска крајната дестинација на имигрантите ќе биде регистрирана во официјалните документи“, рекол за Reuters неименуван висок грчки полициски функционер, без да појасни која е причината за таквата одлука.

Сé уште не е познато дали на бегалците ќе им биде забрането продолжувањето на патувањето, во зависност од крајното одредиште, но се очекува дека повеќето ќе бараат како крајна дестинација да им биде запишана Австрија и Германија.

Владите на земјите членки на ЕУ повеќепати ја критикуваа Грција, главната земја за влез за имигрантите кои успеваат да го минат Егејското Море, наведувајќи дека грчките власти сториле малку во врска со управувањето на приливот од стотиците илјади луѓе кои главно од земјите на Блискиот исток и од азиските држави преку Турција стигнуваат во оваа земја членка на Унијата./крај/мф/сн

Извор: Макфакс