Грчкиот министер за енергетика Панос Скурлетис изјави дека „попрво би побарал избори, а потоа партиски конгрес“, бидејќи во редовите на владејачката крајно лева коалиција Сириза  има сериозни несогласувања поради усвоениот трет пакет за финансиска помош, пренесуваат грчките медиуми.

Најновите услови за финансиското спасување на Грција се толкуваат како неповолни од страна на најрадикалното лево крило на Сириза, кое минатиот петок одби да го поддржи третиот пакет за финансиска помош во парламентот и се закани дека ќе се отцепи од партијата.

Според Скурлетис, еден од најблиските советници на премиерот и лидер на Сириза Алексис Ципрас, поделбата на партијата треба да биде разгледана.

„Треба да има јасна политичка слика. Треба да знаеме дали владата има или не мнозинство”, изјави за телевизискиот канал ERT.

Инаку во однос на новата спасувачка програма, Ципрас за неа доби поддршка во парламентот од опозициските конзервативни партии и само така пакетот финансиска помош успеа да биде одобрен.

На крајот од јуни грчката владата ги затвори банките на три седмици, бидејќи испаничените клиенти повлекоа милијарди евра, и наметна контрола врз капиталот преку строго ограничување на повлекување од банкарскиот систем. Иако сега веќе релаксирани, овие мерки остануваат во сила, притеснувајќи го бизнисот и зголемувајќи го ризикот невработеноста да се порасне и над сегашното ниво од 25 отсто.

Ципрас, кој дојде на власт на крајот од јануари преку предвремените избори, остана без коментар по прашањето за предвремените избори, но неговите министри отворено разговараат за предностите и негативностите од предвремени избори доколку партијата се подели, пишува Reuters./крај/мф/бс