Стотици имигранти и бегалци во вторникот тргнаа пешки по главниот автопат кој го поврзува југот на Грција со северниот дел и се упатија кон Македонија, откако со денови се блокирани со протестите на грчките земјоделци поради реформите на грчкиот пензиски систем поради што по неколку часови секој ден со своите трактори ги блокираат патиштата низ земјата. 

Поради блокадата на земјоделците, неколку десетици автобуси со бегалци не можат да стигнат до границата со Македонија. Најмалку 80 автобуси полни со имигранти, меѓи кои и голем број деца и жени, се запрени од грчката полиција на десетина километри од македонската граница, пренесуваат грчките медиуми.

Агенцијата Reuters емитуваше снимка на којашто нестрпливите бегалци пешки тргнуваат по автопатот извикувајќи „Македонија, Македонија…“. Хуманитарните здруженија и властите подигнаа шатори по должина на магистралата која води до границата, но тие се веќе пренатрупани, па мажите спијат надвор од нив палејќи огнови да се загреат.

На транспортниот јазол кај Кукуш блокадата ја прават повеќе од 800 трактори. Стотици трактори го блокираа и патот кон грчко-бугарската граница. Земјоделците не ги пропуштаат низ граничниот премин товарните возила, а во меѓувреме дозволија кон Бугарија да минуваат само приватни автомобили и автобуси. Секој ден се блокираат и граничните премини кон Турција.

Грчките земјоделци изјавуваат дека нема да се согласат на никакви отстапки, и оти ќе протестираат сé додека владата не го повлече контроверзниот предлог закон, кој произлегува од договорот со меѓународните доверители.

Протестот против владата што ја предводи коалицијата на радикалната левица Сириза на премиерот Алексис Ципрас последните седмици зачестија, поради предлогот за намалување на новите пензии за 15 отсто, што се однесува на пензионираните по 15-ти јуни 2015 година. Доверителите, исто така, бараат возраста за пензионирање да се подигне од 62 на 67 години.

Поради контроверзните планови за реформа на пензискиот систем, во понеделникот во Грција започна седмицата на штрајковите ширум земјата, во периодот кога меѓународните доверители за земјата која е преоптоварена со долгови започнаа со оцената на напредокот во сферата на спроведување на реформите коишто левата влада во Атина ги договори во замена за третиот пакет странска финансиска помош од 87 милијарди евра.

Штрајкот прво го започнаа адвокатите и нотарите, како и земјоделците коишто веќе блокираа неколку сообраќајни јазли, предизвикувајќи целосен прекин на сообраќајот, вклучително и кон Македонија. Во среда со 24-часовен штрајк ќе се приклучат и новинарите, а во четвртокот на работните места нема да се појават вработените во јавниот сектор, поморците и таксистите, со што Грција ќе биде парализирана со еден од најголемите штрајкови.

Портпаролката на грчката влада, Олга Геровасили, изјави дека владата е подготвена за дијалог со земјоделците, но без ултиматуми. „Целта на нашата влада е дијалог, дијалог и само дијалог. Тоа го немаше кај претходните влади. Истовремено, постојат групи луѓе кои сакаат да го попречат дијалогот со провокации“, истакна портпаролката.

Геровасили уверува дека владата нема да презема репресивни мерки за да ги отстрани блокадите на патиштата.

Исто така, истакна дека протестите нема да предизвикаат предвремени избори. „Целта на владата е да се стабилизира ситуацијата, евентуални избори би ја поткопал (ситуацијата). Во овој поглед нема никаква дискусија за промена на власта“, рече Геровасили и ги исклучи сценаријата за формирање влада со широко учество на парламентарните партии//крај/мф/сн

Извор: Макфакс