Хрватската пратеничка во Европскиот парламент (ЕП), Ружа Томашиќ го обвинила претседателот на Србија, Томислав Николиќ дека се обидува да го уништи хрватскиот идентитет во Војводина, пренесува Танјуг.

Според Томашиќ, Николиќ се обидел да го уништи хрватскиот јазик и културен идентитет во автономната покраина преку донацијата на кирилични учебници за децата кои го учат буњевскиот јазик.

„Иживувањето на политичкиот врв на Србија над Хрватите во Војводина продолжува. Донацијата на Николиќ од кирилични читанки и граматика на буњевски говор на учениците во Суботица е последна манифестација на политиката на уништувањето на хрватскиот јазик и културниот идентитет на подрачјето на Војводина“, навела Томашиќ.

Таа додала дека секој има право да се изјасни национално или регионално, но дека „повеќедецениската политика на Србија константно фаворизира една малцинска групација на сметка на друга“.

„Големосрпската политика на четничкиот војвода, а денес претседател на Србија, може да ги зачуди само бескрајно наивните и оние кои ја преспаа последната деценија“, изјавила хрватската европратеничка.

Хрватскиот претседател Иво Јосиповиќ исто така го осудил потегот на неговиот српски колега, велејќи дека тоа е „некоректен потег“.

„Тој потег не е коректен и се надевам дека ќе се исправи. Од друга страна, сметам дека не треба само да критикуваме нешто што е направено во друга земја, туку да видиме и што сме пропуштиле ние и каде е нашиот проблем“, рекол Јосиповиќ.

Српскиот претседател го почитува буњевското малцинство и го поддржува неговиот културен и образовен напредок, изјавила неговата советничка Станислава Пак.

„Тие коишто го спроведуваа геноцидот во нашето опкружувањ не печатеа книги. Нема потреба да се грижите за Буњевци, државата Србија одлично за грижи за нив“, порача Пак како одговор на критиките на Томашиќ и Јосиповиќ./крај/мф/бс