Регион
Москва: Американските обвинување за кршење на нуклеарниот договор се неосновани

Русија ги отфрли американските обвинувања дека го крши договорот за уништувањето на нуклеарните ракети со мал и среден дострел како неосновани и најави сопствени приговори за САД во врска со споменатиот договор.
„Им посветивме внимание на искажувањата на официјални лица од САД во однос на наводните прекршувања од страна на Русија на договорот за елиминација на ракетите со среден и краток дострел. Овие изјави се целосно неосновани, како што и сѐ она што во последно време се слуша во Москва во редица претензии на Вашингтон по други поводи. Во основа, не се дава апсолутно никаков доказ“, одговори руската дипломатија.„Се собраа многу приговори за САД во контекстот на Договорот за уништување на ракетите со среден и кус дострел (INF). Станува збор за американското производство и тестирање на проектили, за вооружени беспилотни летала кои спаѓаат во категоријата крстосувачки ракети кои се лансираа од копно, како што е дефинирано со INF“, се вели во соопштението на руското министерство за надворешни работи.Во Москва повикаа да се разгледаат сите меѓусебни побарувања за Договорот директно „во работен режим“, не прибегнувајќи кон „дипломатските мегафони“. „Во Вашингтон не сакаат да нѐ слушаат. Во овој случај, како и во други спорни прашања со нас, се слушаат само себеси“, велат во руската дипломатијата. Москва, исто така, ја истакнува и намерата на САД да размести во Полска и во Романија лансирни системи „МК-41“. „Овие лансери се способни за истрелувањето крстосувачки ракети со среден дострел, и нивната копнена верзија може да се разгледува како директно нарушување на INF“, соопшти руското министерство за надворешни работи. Русија така реагираше на американските обвинувања дека таа го прекршува договорот за контрола и намалување на нуклеарните стратешки потенцијали до 1988 година. НАТО во средата објави дека САД ги информирале амбасадорите на 27-те земји членки за својата оцена дека Русија ги крши обврските од тој договор. „Русија би требала да се врати на целото почитување на INF на начин кој може да се провери, и така конструктивно да придонесе кон решавањето на ова важно прашање и зачувувањето на Договорот“, се вели во соопштението на генералниот секретар на НАТО, Андерс Фог Расмусен.Договорот за уништување на ракетите со среден и кус дострел (INF) стапи на сила на 1-ви јуни 1988 година како договор меѓу САД и поранешниот Советски сојуз пред да стане мултилатерален договор по распадот на СССР. Договорот „ги обврзува двете страни да уништат во рок од најдоцна три години од стапување на договорот на сила сите балистички и крстосувачки ракети кои се истрелуваат од земја со дострел од 500 до 1.000 километри и оние со дострел меѓу 1.000 и 1.500 километри./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Вучиќ: Реков дека нема помилување и се чувствував лошо, ова се наши деца

Српскиот претседател Александар Вучиќ синоќа изјави дека можеби ќе помилува некои од уапсените студенти, иако пред неколку дена изјави дека нема да го стори тоа.
„Размислував за тоа пред неколку дена. Реков дека нема да има помилувања и се чувствував лошо. Ова се наши деца, можам да им помогнам. Можам да одам подалеку од мојот збор за да ги спасам животите на другите, бидејќи така како што размислуваат, нема да можат да најдат работа никаде. Ќе им остане дамка до крајот на животот“, рече Вучиќ, според Нова.рс.
Тој нагласи дека е претседател и на оние луѓе кои велат дека тој е дилер на дрога и дека неговиот татко не е негов татко. „Јас морам да се грижам за нив“, забележа тој, додавајќи дека тие паднале под влијание на „пропагандната телевизија на криминалец“.
Вучиќ се обрати во неделата, еден ден по масовниот студентски протест во центарот на Белград.
„Седум месеци терор се случуваат од група луѓе кои го зедоа законот во свои раце. Обвинителството мора да си ја заврши работата, доаѓа време за одговорност. Нема да потпишам помилувања, никаква аболиција“, рече тој во таа пригода.
Регион
Санторини и Миконос се најскапи: од денес, туристите плаќаат нов данок во Грција

Од денес, патниците на крузери ќе плаќаат данок од 20 евра ако патуваат до островите Санторини и Миконос, како и пет евра ако одат на други грчки острови, објави Министерството за финансии на таа земја.
„Како што диктира регулативата, оваа такса ќе се однесува на Санторини, Миконос и други острови во помала мера“, изјави претставник на Министерството за финансии, пренесуваат медиумите во регионот.
Грција минатата година донесе закон за да се обиде да го регулира пристигнувањето на големи бродови на популарните туристички дестинации и да ја олесни инфраструктурата.
Даноците ќе се наплаќаат од 1 јуни до 20 септември, а според регулативата, крузерите ќе ги плаќаат од сопствен буџет, а подоцна ќе ги вклучат во цената на билетот за патниците.
Патувањето со крузери станува сè попопуларно во последните неколку години, а приходите во овој сектор се зголемија за 22,4 проценти во текот на изминатата година.
Регион
Милановиќ: Лицемерни и неискрени ветувања за Украина за членство во ЕУ

Хрватскиот претседател Зоран Милановиќ денес изјави дека, за жал, Европската Унија со години убива некои земји, а за тоа недостига волја кај некои актери со одложување на нивните преговори.
„Тоа се Црна Гора, Албанија. Па во таа смисла легитимно е да се зборува за Украина во ЕУ, но можам да забележам дека тоа е земја чии територијални перспективи не се јасни. Таа е во војна, а што се однесува до општите услови за членство, не гледам дека ги исполнува. Тоа се фактите. Што ќе се случи потоа, ќе одлучи ЕУ“, рече Милановиќ.
Милановиќ им го кажа ова на новинарите откога го угости својот полски колега Петер Пелегрини одговарајќи на прашање за членството на Украина во Европската Унија.
„Искрено, мислам дека таквото ветување е лицемерно и неискрено. Ова е ставот кон Украина од првиот ден, од 2013 година. Многу зборував за тоа“, рече Милановиќ, а потоа продолжи да зборува за средствата за одбрана:
„Практично, ѝ дадовме на Украина 35 тенка подарок и ништо не добивме за возврат. Добивме трошки од Германија“.
„Способности, а не проценти, тоа е она што е важно“, рече Милаовиќ и продолжи:
„Разговарав со американскиот претседател Доналд Трамп кажувајќи му, без никаков сарказам, дека цените на оружјето треба да се намалат. Американците, Германците, Французите и Британците се како агенти за продажба на сопствените одбранбени индустрии. А ние, од друга страна, сме купувачи и купуваме неверојатно скапа стока кога ќе ја добиеме. Тоа се фактите и на оној што не му се допаѓа нека престане да живее во свет на фантазии“.
Тој исто така коментира за критиките дека словачкиот претседател Роберт Фицо е руски човек.
„Руски човек, што значи тоа? Го познавам. Тој не е руски човек, дури ни во однос на афинитетите, но во некои критични ситуации ќе се однесува како што се однесува“, рече Милановиќ.
Тој вели дека нема никаква врска со Русите, но не може да биде изненаден кога тоа доаѓа од луѓе што ги поминале своите кариери како руски пудлици.
„Дали е ова уреден начин на комуникација?“, праша претседателот на Хрватска и рече:
„Овие приказни дека сум руски човек се одвратни и доаѓаат од луѓе што треба да внимаваат што зборуваат“, објави хрватскиот портал „Дневник“.