На боиштата во Сирија и во Ирак во моментов има повеќе од 30 државјани на Србија, а досега 10 од нов загинале, изјави во средата во Белград српскиот министер за полиција Небојша Стефановиќ.

„Според податоците со коишто располагаме, десет лица загинале“, изјави Стефановиќ на меѓународната конференција за странските терористички борци, спречување на радикализмот и борбата против тероризмот во балканскиот регион, на која учество во средата во српската престолнина Белград учествуваше и македонската министерка за внатрешни работи, Гордана Јанкулоска,

Јанкулоска во своето излагање рече дека од летото 2012 година македонските безбедносни служби регистрирале дека на боиштата во Сирија и во Ирак на страната на радикалните исламистички групи учествувале околу 100-ина македонски државјани, од кои е познато дека 15 таму загинале.

Српскиот министер за полиција, Небојша Стефановиќ, во продолжението на своето излагање го осуди неодамнешниот напад врз полициската станица во Зворник, во Босна и Херцеговина, оценувајќи дека „регионот на западен Балкан станува сé попримамливо поднебје за регрутација на терористите“ и истакна дека „Србија е сигурен партнер на меѓународната заедница во борбата против ова современо зло“.

Претседателите на Србија и на ентитетот Република Српска, Томислав Николиќ односно Милорад Додик истовремено со одржувањето на споменатата конференција во Белград имаа средба по повод терористичкиот напад во Зворник во кој беше убиен еден полицаец, а од заедничката прес-конференција порачаа дека „сите држави на Балканот мора да воспостават поцврста и поконкретна соработка“, особено во сферата на работата на безбедносните и разузнавачките агенции.

„Иако ниту Србија, ниту Република Српска, не влијаат врз светските настани (…) очигледно е дека не можеме да бидеме жртви и дека мораме да бидеме подготвени на сé“, изјави српскиот претседател Николиќ.

Додик од своја страна, пак, најави дека Република Српска по инцидентот во Зворник ќе развива „нова стратегија на безбедносните структури“, односно дека ќе „соработува со безбедносните органи на Федерацијата БиХ, Хрватска и Србија, бидејќи борбата против тероризмот не може да биде изолирана“./крај/мф/сн

Извор: Макфакс