Српскиот претседател Томислав Николиќ смета дека во Србија мора да има референдум за Косово, бидејќи како што потенцирал, „време е да се каже цврсто и јасно до каде може Србија да оди во поглед на решението“, пренесуваат српските медиуми.

Николиќ оценил дека најпрво би требало да биде основана Заедницата на српските општини и да „не се прифатат барањата кои ги смислила Приштина“.

„Не треба да се прифатат тие сугестии од Брисел и да се укинат сите паралелни институции на северот на Косово, бидејќи тоа значи дека ќе се откажеме од нашите принципи“, укажал Николиќ.

Според него, српскиот премиер Александар Вучиќ на почетокот на февруари ќе има тежок состанок во Брисел и дека тогаш „многу работи ќе бидат појасни“.

„Тогаш ќе му треба став од Собранието, што може да застапува, а што не може“, оценил Николиќ и напоменал дека референдумот е решение за Косово.

„Мора да има референдум, како што ќе одлучат граѓаните, така нека биде. Ако граѓаните речат да ја потпишам независноста на Косово, јас ќе си дадам оставка на функцијата на која се наоѓам“, рекол Николиќ, објаснувајќи дека народот на референдумот мора да одлучи дали ќе ги прифати сите услови на Европската унија (ЕУ).

Според Николиќ, од поранешните европски челници, Кетрин Ештон и Штефан Филе, тој никогаш не слушнал дека ќе постои услов да се признае независноста на Косово, но дека ова барање пристигнало сега од Брисел, преку еврокомесарот за соседска политика и пристапни преговори Јоханес Хан./крај/мф/бс