Регион
Новата партија Народно единство ќе добие мандат да ја формира новата грчка влада

Грчкиот претседател Прокопис Павлопуло ќе го даде мандатот за формирање нова влада на партијата Народно единство којашто во петокот ја формираа 25 одметнати пратеници на владејачката коалиција на радикалната левица Сириза, пишува весникот Kathimerini.
Челникот на новата крајно левичарска партија, Панајотис Лафазанис, еден од тврдите бунтовници од Сириза, кон средината на јули беше сменет од функцијата министер енергетика, кога заедно со уште 30 пратеници гласаше против предлог-законот за реформите, изјави во понеделникот дека ќе ги искористи ефикасно сите три дена коишто според уставот му стојат на располагање, за да се обиде да формира влада со други парти во парламентот.
Меѓутоа, Лафазанис признава дека постојат доволно сериозни разлики со другите партии во врска со најгорливиот проблем, односно поради гласањето за третиот пакет меѓународна финансиска помош за земјата постигнат со меѓународните доверители, а ко подразбира дополнителни мерки за штедење и реформи.
„Не постојат никакви можности за соработка“, пишува весникот цитирајќи го Лафазанис.
Пратеничката група на новата партија Народно единство што ја води Лафазанис стана третата по бројност во грчкиот парламент, зад левичарската Сириза и конзервативната Нова демократија. Според него, не постојат никакви шанси во овој момент да се добие поддршка до 151 пратеник во грчкиот парламент кој има 300 мандати, за да може да биде формирана коалициона влада.
Претходно, челникот на најголемата опозициска партија од десниот центар Нова демократија, Вангелос Меимаракис, не успеа да го искористи тридневниот рок за договор со евентуалните коалициски партнери.
Според грчкиот устав, трите најголеми партии добиваат по три дена секоја да се обидат да состават нова коалициска влада, доколку владата поднесе оставка во рамките на помалку од 12 месеци. Дури откако евентуално тие разговори не дадат резултат, а речиси сигурно е дека во случајов тоа ќе се случи, претседателот Прокопис Павлопулос именува вршител на должноста премиер и распишува избори.
Меѓутоа, според Kathimerini, претседателот може да ѝ предложи формирање влада и на неонацистичката партија Златна зора, чиишто челници се под истраги и за која во судот се води процес во кој може да биде прогласена за злосторничка организација одговорна за убиства, насилства и ширење омраза.
Премиерот Алексис Цирпас во четвртокот ја поднесе оставката на неговиот кабинет што отвори простор за одржување предвремени избори, со амбиција да ја зацврсти својата власт, само седум месеци по доаѓањето на власт со предвремените избори од 25-ти јануари. Неговите желби, како и на дел од домашната јавност и на меѓународната заедница, изборите да се одржат што поскоро на 20-ти септември, за да нема застој во исполнувањето на договорот за новата програма за финансиска помош на Грција во износ од 86 милијарди евра./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Украинско комбе се судри со руски камион во Словенија, петмина загинати

На автопатот кој ги поврзува Марибор и Љубљана, во близина на излезот Словенска Коњица, во правец на Љубљана, се случи тешка сообраќајна несреќа во која загинаа пет лица, а две се повредени. Несреќата се случила кога патничко комбе удрилo во камион. Сите жртви биле странски државјани, соопшти словенечката полиција, јавуваат медиумите во регионот.
Според досега утврденото, возачот на комбе со украински регистарски таблички, кое превезувало седум лица, поради несоодветна брзина, удрил во задниот дел од приколка која стоела во ред поради работи на автопат. Пет лица загинале во комбето на местото на несреќата.
Возачот, кој ја предизвикал несреќата, е полесно повреден, додека патничка е тешко повредена. Двајцата повредени се пренесени во болница, а тешко повреденото лице е пренесено со хеликоптер. Идентитетот на загинатите сè уште се утврдува.
Возачот на камионот, руски државјанин, не е повреден, но му е понудена психолошка помош поради сериозноста на несреќата, објавува Радиотелевизија Словенија. Несреќата се случила непосредно пред одморилиштето Тепање, на дел од автопатот каде што се во тек големи работи – се реновираат 13 километри пат, два тунела и три вијадукти. Полицијата потврди дека несреќата се случила пред работната зона каде што се формираат долги редици поради затворени ленти.
Фото: принтскрин
Регион
Млад човек се удави во Улцињ: трагедија во Црна Гора

Млад човек се удави во Улцињ денеска, во попладневните часови, јавуваат медиумите во регионот.
Според написите, давењето се случило на „Големата плажа“.
Засега нема информации за идентитетот на загинатиот.
Според последните извештаи било подигнато црвено знаме бидејќи имало големи бранови во морето.
Регион
Србија им препорачува на граѓаните да не патуваат во Хрватска на почетокот на август

Министерството за надворешни работи на Србија им препорача на граѓаните на Србија да се воздржат од патување во Хрватска во периодот од 1 до 10 август.
Во соопштението Министерството им советува на граѓаните што ќе бидат на територијата на Хрватска во тој период да избегнуваат собири и други јавни собири, кои може да носат ризик од инцидентни ситуации.
Во тој период – на 5 август, Хрватска ја одбележува годишнината од воено-полициската операција „Бура“. Прославата се одржува на денот кога завршила акцијата. Во Србија годишнината од „Бура“ е на 4 август, денот кога почнала, како ден на сеќавање на жртвите и протераните Срби.