Регион
Нови избори во Хрватска доколку до вторник не се избере мандатар
Лидерот на независната листа Мост, која по изборите во ноември во Хрватска се наметна како трета политичка сила во земјата, Божо Петров во четвртокот порачал дека нема да дозволи одолговлекување на преговорите за формирањето на нова власт и дека доколку до вторник не биде познато името на новиот мандатар, тогаш повторно ќе се оди на избори, пренесуваат хрватските медиуми.
„Нема да има повеќе шамарања ниту пак одолговлекувања. Или до вторник ќе биде познат мандатарот или ќе одиме на избори“, изјавил Петров, додавајќи дека во петок ќе одржи состанок со Домољубната коалиција која е предводена од Хрватската демократска заедница (ХДЗ) околу клучните цели за соработка во наредните четири години. Лидерот на Мост додал дека на состаноците може да учествува и коалицијата којашто е предводена од страна на Социјалдемократската партија (СДП).
„Веќе нема рокови. Се надевам дека двете страни искрено мислат на тоа што го одговорија, а тоа ќе го видиме веќе утре“, рекол Петров. Тој обаснил дека ХДЗ први се согласиле на условите на Мост, и поради тоа прво со нив е закажан состанок, но дека и СДП потоа може да се придружи.
Независната листа Мост, која е најголемото изненадување на изборите и без која не е возможно формирање на нова власт, претходно како услов за продолжување на преговорите побара од водечките партии СДП и ХДЗ да се согласат на трипартиска влада, на чие чело би застанал непартиски премиер.
Хрватската претседателка Колинда Грабар-Китаровиќ најавила дека во вторник на 22-ри декември ќе го одржи четвртиот круг на консултации за мандатар, бидејќи на консултациите во понеделникот и вторникот повторно се покажало дека никој нема поддршка од 76 пратеници за состав на влада. Левата коалиција „Хрватска расте“, предводена од СДП на изборите освои 56 мандати, а во моментот располага со поддршка од 66 пратеници, додека десната „Домољубна коалиција“, на чие чело е ХДЗ има 59 пратеници. Мост, од кого најмногу зависи формирањето на влада, на изборите освои 19 мандати, но по судирите во оваа партија, во моментов има 15 пратеници./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Дете најдено живо по два дена од поплавите во Јабланица под урнатините на семејната куќа
Продолжува борбата на голем број спасувачи за пронаоѓање на живите исчезнати лица по катастрофалната поплава што пред два дена се случи во Јабланица и во околните населени места.
Според официјалните информации, досега животот го загубиле 18 лица, а по голем број се уште се трага.
Сепак се појави и една добра вест, спасувачите пронашле дете под урнатините на неговата семејна куќа. Успеале да го извлечат и итно бил пренесен во болница.
Момчето било пронајдено под плочата тешка два тона која се срушила одозгора.
Регион
Во Јабланица прогласена тридневна жалост: Загинаа 15 лица, се трага по уште исчезнати
Градоначалникот на општина Јабланица Дамир Шабановиќ деновите од недела до вторник ги прогласи за Денови на жалост во врска со трагичната смрт на сограѓанин во природна катастрофа што го зафати подрачјето на Јабланица, пренесува Ал Џезира Балканс.
Деновите на жалост се одбележуваат со спуштање на знамињата на половина копје на зградите на општината и јавните установи основани од општина Јабланица.
Културни, забавни и слични програми нема да се одржуваат на јавни места, а физичките и правните лица кои вршат угостителска дејност, како и локалните медиуми ќе го приспособат своето работење.
Досега на подрачјето на Јабланица и Коњица се пронајдени телата на 15 лица, а по 10 до 15 исчезнати лица се уште се трага.
Регион
Дрвја и кал во БиХ, местата зафатени од поплавите се непрепознатливи
По поплавите што вчера ја зафатија БиХ, најтешка е состојбата во општина Јабланица, каде што најголем број урнати згради и објекти се под вода, а истото е и во Трусина и Бутуровиќ Поље, јави телевизијата БХТ1.
Новинарка на телевизијата, која известува од терен, изјави дека овие места се непрепознатливи.
-Можеме да видиме само дрвја и вода, кал, се’ лебди на површината на водата, можеме да видиме загрижени жители, изјави таа и додаде дека веќе се започнати хуманитарни акции за помош на загрозените.
Според последните неофицијални податоци само на територијата на Јабланица како исчезнати се водат 48 лица, додека официјалните податоци велат дека по поројните поплави и свлечиштата кај Јабланица, Кониќ, Крешево и Кисељак, потврдена е смртта на 19 лица, а дека по многу други уште се трага.
Населението во погодените подрачја има потреба од итна помош, а најитни се конзервираната храна и вода во шишиња.
Патната комуникација е отежната, а на места и целосно прекината.
Во страшните поплави кои зафатија делови од Босна и Херцеговина, една од жртвите е и 29-годишна трудница од Јабланица. Брачна двојка е пронајдена гушната во одроните во Доња Јабланица, а според првичните информации почина и уште еден брачен пар од овој крај.