Одредени меѓународни сили силно работат на тоа во Европската унија да доведат што е можно повеќе имигранти, изјави унгарскиот премиер Виктор Орбан, пренесе националната новинска агенција MTI.

Во парламентот на Унгарија, со ова премиерот Виктор Орабан во понеделникот одговори на прашањето на пратеник од националистичката партија Јобик за унгарско-американскиот милијардер Џорџ Сорос (Шорош), кого Орбан и претходно го обвинуваше дека ја поттикнува миграцијата од исламските земји во Европа.

Пратеникот на Јобик, Мартон Ѓонѓоши, спомена дека во 1980-те години Сорос ги финансирал стипендиите на речиси сите основачи на партијата Фидеш од којашто потекнува Орбан.

„Не ли сметате дека е лицемерно, опортунистички и нечесно да се свртите против поранешниот покровител?“, го запраша пратеникот унгарскиот премиер.

Орбан на тоа одговори дека демократската опозиција во комунистичкиот период примала донации од различни извори и оти тоа никогаш не било тајна.

„Одлично беше што Џорџ Сорос ги мобилизираше своите сили против комунизмот, помогна за неговиот пад и повлекувањето на советската војска“, изјави Орбан додавајќи дека тоа нема никаква поврзаност со сегашната мигрантска криза.

„Постојат одредени меѓународни сили кои работат на тоа да доведат во Унгарија и во другите земји од Европската унија што е можно повеќе мигранти. Без оглед на неговите заслуги од минатото, тоа што го прави денес е против унгарските национални интереси“, додаде Орбан./крај/мф/сн

Извор: MTI/Hina