Регион
Орешковиќ: Нашиот став во поглед на Србија не се промени, условите остануваат исти

Хрватскиот премиер Тихомир Орешковиќ изјавил дека ставот на Хрватска кога се работи за отворањето на поглавјето 23 од преговорите на ЕУ со Србија не е променет, пренесуваат српските медиуми.
Запрашан за тоа дали Хрватска ќе даде своја согласност, Орешковиќ рекол дека не знае дали до крајот на оваа недела ќе бидат отворени нови поглавја во преговорите со Србија. „Нашиот став не се промени. Ние бараме Србија да ги има истите услови кои ги имаа и Хрватска и другите членки на ЕУ. Во принцип тоа се трите основни услови кои ги баравме: Србија да не биде „мал Хаг“, прашањето на малцинството и соработката со судот во Хаг“, изјавил хрватскиот премиер во заминување.
Орешковиќ додал дека овие услови за Србија не ги поставила само Хрватска, туку и некои други членки на ЕУ. Холандското претседателство со ЕУ претходно наведе дека се уште го нема потребниот консензус на сите 28 земји членки на ЕУ околку нацртот на заедничките преговарачки позиции потребни за отворање на поглавјето 23 во пристапните преговори со Србија.
Иако Холандија планираше за време на своето претседателство со Унијата, кое завршува во четврток, да ги отвори поглавјата 23 и 24 со Србија, неофицијално објасниле дека консензусот не е постигнат поради две земји, од кои едната има суштински замерки, додека другата технички проблеми околу согласноста за отворањето на новите поглавја со Србија.
Пред состанокот на амбасадорите на земјите членки на ЕУ во четврток (КОРЕПЕР) во Брисел, и натаму е непознато дали британската служба за надворешни работи ќе го достави одобрението до својот претставник за да даде „зелено светло“ на нацрт преговарачките позиции за поглавјето 23 од преговорите со Србија./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Вучиќ: Успеавме да ги одложиме санкциите на САД врз српската нафтена индустрија

Српскиот претседател Александар Вучиќ денес изјави дека САД го одложиле воведувањето санкции против Нафтената индустрија на Србија (НИС) за осум дена со цел, како што рече, „за да покажат почит кон Србија“.
„Им благодарам, сакаа да покажат почит, да ни кажат дека нè слушаат и ја разбираат нашата позиција. Благодарам за тоа, но дали добивме нешто суштинско? За седум дена, ќе го имаме истото прашање, а јас сè уште нема да го имам одговорот“, рече Вучиќ во Обреновац, каде што учествуваше на граѓанскиот марш против блокадите.
Тој додаде дека ќе има реакција од Србија и од самата НИС и кон американската страна и кон другите партнери кога станува збор за нови понуди.
„Верувам дека ова е добро, но дали ќе биде доволно и дали ова е она што го сакаат Американците – ќе видиме“, рече Вучиќ.
Санкциите на САД против НИС требаше да стапат во сила на 1 октомври, но рокот сега е одложен барем до 9 октомври.
фото: принтскрин
Регион
Албанија продолжува со рекордни бројки на странски туристи

Албанија продолжува со рекордни бројки на странски туристи, која во периодот јануари – август ја посетиле околу девет милиони.
Албанскиот Институт за статистика објави податоци што потврдуваат дека влезот на странски државјани е за 5,2 отсто поголем ако се спореди со истиот период пред една година, кога беа регистрирани вкупно 8,5 милиони странски државјани.
Само во август бројот на странски државјани кои влегле на албанска територија е 2,3 милиони, што е зголемување од 9,9 отсто, во споредба со истиот месец минатата година.
Албанската економија имаше корист од странските туристи од 2,1 милијарди евра за само шест месеци, до кога ја посетиле 4,76 милиони странци. Овие бројки потврдуваат дека 2025 година ќе биде уште пооптимистичка во однос на туризмот во земјата, додека приходите се очекува да се зголемат за околу 7,7 отсто во споредба со лани.
Се очекува приливот на туристи да продолжи и есенва, со што ќе се продолжи туристичката сезона во земјата. Туроператорите известуваат дека резервациите се високи и за септември и за октомври.
Минатата година Албанија ја посетиле над 11,7 милиони туристи или 15,2 отсто повеќе од претходната година. Очекувањата за годинава се над 12 милиони туристи.
Регион
Жена убиена на свадба во центарот на Шибеник, ја погодила ракета

Жена е повредена кога пиротехничко средство – сигнална ракета – било испукано во близина на катедралата „Свети Јаков“ во Шибеник синоќа, и починала од повредите во болница, соопшти хрватската полиција.
Во соопштението од полициската управа Шибеник-Книн се додава дека е уапсен 52-годишен маж, пренесува Хина. Во тек е кривична истрага, соопшти полицијата.
Хрватските медиуми неофицијално известуваат дека несреќата се случила за време на свадбена прослава, кога осомничениот испукал ракета.