Албанскиот премиер Еди Рама во вторникот порача дека на Балканот владее мир и дека со договорот меѓу Србите и Албанците од Косово повеќе не постојат гранични прашања, пренесува агенцијата Бета.

Говорејќи на состанокот посветен на западен Балкан, Рама изјавил дека во регионот сé повеќе има уверување дека Европската унија (ЕУ) во однос на приемот на нови членки „сé повеќе се поставува тактички а сé помалку стратешки, додека од јасни причини и цели, Кина и Русија се многу повеќе стратешки сили, отколку самата ЕУ“.

Албанскиот премиер потсетил дека за состојата на Балканот говори и неговата посета на Белград, прва посета на албански премиер на Србија по цели 68 години.

Рама укажува на значењето на Берлинската конференција за иднината на регионот и нагласил дека сите земји од западен Балкан сакаат да бидат дел од ЕУ и да ги извршат своите задачи на патот кон Унијата, но потсетува  дека и од страна на Унијата треба да се направи нешто повеќе.

Според него, во ЕУ постои „замор од проширувањето, но и замор од трпеливоста кон Балканот“.

Државниот секретар во италијанското министерство за надворешни работи, Бенедето дела Ведова на состанокот истанал дека во европската јавност не се дава предност на проширувањето.

„Поради тоа што ние во ЕУ имаме потешкотии со јавното мислење, мораме стратешки да гледаме и проширувањето мора да биде стратешка цел за мирот, стабилноста и економскиот раст на западен Балкан“, изјавил Дела Ведова.

„За безбедноста и благосостојбата на ЕУ, проширувањето е вистинскиот пат, а тоа е и дел од програмата на италијанското претседателство со ЕУ“, објаснил италијанскиот дипломат.

Хрватскиот пратеник во Европскиот парламент (ЕП), Андреј Пленковиќ изјавил дека проширувањето полека исчезнало од фокусот на интересите на ЕУ, потенцирајќи дека во идина мора да се има различен и поединечен пристап кон пристапувањето на секоја земја во ЕУ./крај/мф/бс