Обвинетиот пред Меѓународниот кривичен суд за воени злосторства во поранешна СФРЈ и челник на опозициската Српска радикална партија (СРС), Воислав Шешељ му одговорил на судот дека не го прекршил налогот за пуштање на привремена слобода реагирајќи на судското барање да се врати во притворот, соопшти во средата во Белград неговата партија.

„….Тоа се гледа и од поднесокот на обвинителот Серж Брамерц кој не понудил ниеден аргумент врз основа на кој Воислав Шешељ би се вратил во притворот на Хашкиот суд на недоредено време“, се наведува во одговорот на стручниот тим на СРС за одбрана на Шешељ кој беше испратен до медиумите.

Застапниците на Шешељ истакнуваат дека според меѓународното обичајно право притворот се укинува секогаш кога нема опасност да се повтори кривичното дело за кое притворениот е обвинет, како и кога не постои опасност од бегство, и дека во неговиот случај кривичното дело за коешто се товари и не е возможно да биде повторено, ниту тој може да побегне од Србија, бидејќи му е одземен пасошот.

„Со личната карта, којашто ја доби по враќањето од Хаг, Шешељ доби и решение со коешто се утврдува дека таа не може да се користи како патна исправа на граничните премини меѓу Србија и државите во коишто инаку се минува со лична карта наместо со пасош“, појаснуваат правните советници на првиот српски радикал.

Според нив, Шешељ „со ниеден збор и ниту со еден гест не влијаел врз сведоците од процесот“ кој се води против него, „бидејќи тоа и не е можно, откако последниот сведок е сослушан на 7-ми јули 2010 година, а изнесувањето на завршните зборови е завршено на 20-ти март 2012 година“, од кога се чека изрекувањето на пресудата.

Обвинителството би морало, доколку имало какво и да е влијаени, со име и презиме да наведе за кој сведок станува збор и на кој начин врз него е влијаено, се напомнува во поднесокот кој во четврток ќе им биде предаден на претставниците на Хашкиот трибунал во Белград, а Шешељ по тој повод е одржи прес-конференција.

Апелациониот совет на Хашкиот трибунал минатата среда го повика Шешељ, доколку сака во рок од три дена да се изјасни за барањето на Обвинителството итно да биде примената одлуката на советот тој да биде вратен во Хаг, а претходно на 30-ти март Судскиот совет му наложи итно да ја отповика одлуката за привремено пуштање на обвинетиот и да му наложи да се врати во единицата за притвори на судот во Шевенинген.

Трибуналот од лекарскиот тим на Шешељ во Србија ја побара документацијата за неговата моментална здравствена состојба, но тој одби да му ја проследи на судот. Хашкото обвинителство потоа на 14-ти април побара на Шешељ итно да му биде наложено враќање од привремената слобода во притворот, а сега му е дадена можноста за тоа барање да се изјасни.

Воислав Шешељ на 12-ти ноември 2014 година, по речиси 12 години се врати во Србија, откако беше пуштен на привремена слобода поради лошата здравствена состојба, односно боледување од рак. Тој по враќањето во Белград порача дека не бега, но дека нема доброволно да се врати во Хаг./крај/мф/сн

Извор: Макфакс