Српскиот министер за надворешни работи и вицепремиер, Ивица Дачиќ, изјави во средата дека Србија инсистира на разјаснување на условите за пристапните преговори со Европската унија (ЕУ), спротиставувајќи се на она што го нарече постојано поставување нови услови.

„Не велиме дека ќе водиме војна со ЕУ, но мораме да се разјасниме“, изјави шефот на српската дипломатија Ивица Дачиќ на прес-конференцијата по средбата со колегата од Замбија, оценувајќи на прашање на новинарите дека Србија „иако не е моќна, не може да биде удирана со шлаканици“ со зачестените поставувања на нови услови за отворање на пристапните поглавја за преговорите со ЕУ.

Коментирајќи ги условите кои Германија ги поставила за отворање на поглавјата и на прашањето да ја објасни својата претходна изјава дека Србија не прифаќа нови услови, Дачиќ рече дека Белград не ја прифаќа таквата практика.

„Не сакаме со нас да се разговара на тој начин. Не прифаќаме никаква практика да имаме официјален став дека нови услови нема, а да се покаже дека тие постојат“, порача српскиот министер за надворешни работи.

„Траба да се разговара, односно ЕУ треба да разговара со Германија што ќе правиме натаму“, додаде Дачиќ запрашувајќи каква врска има „Паркот на мирот“ на мостот во Косовска Митровица, кој го раздвојува албанскиот од мнозинскиот српски дел од градот на северот од поранешната српска јужна покраина, со Бриселската спогодба и „како тој се појави на врвот на германските услови“, пренесува Танјуг.

Дачиќ потсети дека дополнително се поставуваат 11 точки кои ги усвоил германскиот парламент, што е услов Берлин потврдно да одговори на отворањето на некои од поглавјата. Меѓу тие услови се прашањето за отворањето на мостот и „Паркот на мирот“ во Митровица.

Предупредувајќи дека тоа не е опфатено со договорот од Брисел за нормализација на односите меѓу Белград и Приштина, Дачиќ оцени дека „очигледно станува збор за нови услови“.

Претходно белградските медиуми објавија дека Дачиќ изјавил оти Србија повеќе нема да ја прифаќа практиката на „подвижни цели“. „Таа практика Србија повеќе не ја прифаќа. Ние играме со отворени карти. Сите свои обврски ги извршивме и не дозволуваме некој да си поигрува со нас“, порачал Дачиќ кого го цитираше РТС./крај/мф/сн

Извор: Макфакс