Претседадателот на српскиот собраниски одбор за одбрана и безбедност Момир Стојановиќ изјавил дека во Србија наскоро би можел да биде изграден центар кој ќе згрижува 400 илјади азиланти, направен во соработка со Европската унија (ЕУ), пишуваат српските медиуми.

„Со оглед на тоа што ЕУ нема решение за големиот проблем со мигрантите, една од можностите е да финансираат изградба на голем центар за мигранти. Се шпекулира дека ЕУ сака таков центар некаде на Балкан, а големи се шансите тоа да биде токму во Србија. Исто така, се зборува дека локацијата на центарот би била некаде на југот на Србија и дека таквиот град за азиланти и можел да биде од монтажен тип“, изјавил Стојановиќ за српскиот весник Блиц, додавајќи дека сепак Србија не би требало да се согласи на ова.

„Се надевам дека нема да има притисок врз нас да се согласиме на изградба на таков центар, доколку само една петтина од тие луѓе останат во Србија, тоа би бил голем економски и безбедносен проблем“, навел Стојановиќ.

Од друга страна, пак, српскиот министер за социјални прашања, Александар Вулин, ги негира овие сознанија, истакнувајќи дека изградбата на ваков центар ниту е во план, ниту, пак, е возможна.

„Србија нема капацитет за нешто такво, ниту, пак, би влегла во таков проект. Ние ги исполнуваме своите меѓународни обврски кон барателите на азил и кон лицата кои доаѓаа од реадмисија. Србија не гради никакви трајни центри за сместување на мигрантите и нема да ги гради“, рекол Вулин.

Весникот Блиц додава дека дневно има повеќе од илјада мигранти, а најновите процени говорат дека во Србија во моментов има околу 70 илјади мигранти, кои минуваат низ пет центри за баратели на азил./крај/мф/бс