Регион
Суботиќ ослободен од обвиненијата за шверц на цигари од Македонија во Србија

Српскиот бинзнисмен Станко Суботиќ, поранешниот директор на Сојузната царинска управа Михаљ Кертес и уште 13 лица ослободени се во петокот пред Специјалниот суд во Белград од обвинувањата за шверц на цигари во деведесеттите години.
Ова е втора пресуда за Суботиќ и неговите соработници, откако Апелациониот суд во Белград ја укина првата пресуда на Специјалниот суд, со која Суботиќ беше осуден на шест години затвор.
Иако обвинителството во завршниот збор бараше Суботиќ да биде осуден на осум години затвор и да му се одземе имотот, а Кертес на пет години затвор, судскиот совет одлучи да донесе ослободителна пресуда.
Повтореното судење на Суботиќ беше по обвинувањето дека тој бил на чело на групата која шверцувала цигари во 1995 и 1996 година од Македонија во Србија, со што, како што стои во обвинувањето, оштетувајќи го буџетот стекнале добивка од 28 милиони евра и шест милиони долари.
Обвинителството има право на жалба на оваа пресуда пред Апелациониот суд во Белград.
Суботиќ изјави дека ослободителната пресуда беше очекувана и ги обвини политичарите дека целата афера ја исконструирале за да го рекетираат.
„Оваа фарса беше исконструирана од политичари, првенствено од кабинетот на Коштуница, па до кабинетот на Тадиќ, со цел преку една страотна медиумска кампања да се прикрие намерата да бидам рекетиран и да ми се грабне имотот“, истакна Суботиќ.
Во образложението на пресудата се наведува дека одлуакта е донесена поради застареност на обвинувањето за кривично дело од 1995 година, но и поради тоа што со оригинална документација до Македонија било докажано дека компанијата „Суксес“, преку која наводно Суботиќ ги шверцувал цигарите, била под контрола на Војската на Сојузна Република Југославија. /крај/
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
(Видео) Невреме во Црна Гора: Сè беше забелено

Невремето што денес ја погоди околината на Колашин во Црна Гора донесе неочекувани сцени за првиот дел од август, сè е покриено како со бела покривка, пишуваат медиумите во регионот.
Сепак, според написите, не станува збор за снег, туку за град што падна низ целата област.
Според проценките, на некои места слојот на град достигнува и до 15 сантиметри.
Овој августовски пејзаж е вистинска реткост во овој дел и не се памети во поновата историја, пренесуваат медиумите.
Дел од скијачките патеки исто така беше покриен со град, а невремето предизвика значителни штети на планинските патишта, што претставува дополнителен предизвик за локалните жители и туристите.
Фото: принтскрин
Регион
Петгодишниот брат ја застрелал малолетната сестра со пушка: децата си играле во семејната куќа во БиХ

Викендов се случил инцидент во БиХ кога петгодишен брат ја застрелал својата малолетна сестра (4) за време на игра.
Обвинителството потврди за Hercegovina.info дека дежурниот обвинител, Јосип Аничиќ, бил информиран за инцидентот и наредил да се спроведе истрага на местото на инцидентот.
– Според моментално достапните информации, братот (5) и сестрата (4) си играле во семејната куќа кога дошло до пукање од воздушна пушка – изјави портпаролката на обвинителството, Петруњела Матијевиќ, за Hercegovina.info, пренесува Srpskainfo.
Таа додаде дека полицајците, по наредба на обвинителот, се во фаза на испрашување на сведоците, со цел да утврдат како пушката се нашла на дофат на децата и кој ја оставил таму.
Според информации на медиумите во регионот, девојчето е добро и стабилно и без сериозни последици.
Фото: Принтскрин
Регион
Поранешниот хрватски премиер, Иво Санадер, излезе од затвор

Иво Санадер, поранешен лидер на ХДЗ и премиер на Хрватска, е ослободен од затвор пред да ја отслужи целата казна. Санадер беше условно ослободен од затворот Липовица откако отслужи две третини од казната, објавија хрватските медиуми.
Како што објасни адвокатот Драган Црнковиќ, исполнети се сите законски услови за поранешниот премиер да биде ослободен. Тој рече дека покрај неговата возраст, една од причините наведени во барањето за ослободување е неговата здравствена состојба, но тоа не се главните причини, забележува тој, туку и фактот дека тој го почитува член 59 од Кривичниот законик. Тој истакнува дека на 15 август 2023 година отслужил половина од казната.
Ќе биде должен да се јавува во полиција секој месец и нема да му биде дозволено да го менува местото на живеење и привременото живеалиште.
На прашањето на новинарите дали тоа значи дека ќе има ограничено движење, тој одговори негативно.
„Не знам, може да го запали автомобилот, да оди во Сплит. Само ако има намера трајно да го промени местото на живеење и живеалиштето, мора да добие дозвола“, објасни адвокатот Црнковиќ.
Фото: ЕПА