Почувствував потреба и обврска да се изјаснам, барем накратко, по снимките што можеше да ги види целата јавност на Република Србија синоќа во 21 часот од состаноци на кои присуствуваа претставници на различни политички партии, невладини организации, оние кои се кријат зад студентските пленуми, некои професори учествуваа на тие состаноци. Сите заедно планирале јасно, директно и недвосмислено државен удар, насилство како вовед за граѓанска војна и атентат на претседателот на Република Србија, Александар Вучиќ“, изјави денеска претседателката на српското Собрание Ана Брнабиќ.

Таа рече дека најшокантно за неа лично е улогата на Универзитетот во Белград.

„Ќе го цитирам тој дел од снимката. Марија Васиќ, професорка која учествуваше на таков состанок и ниту еднаш не ги предупреди студентите дека тоа што го прават е брутално насилство, дека планира државен удар, дека планира воен удар, дека ќе резултира со масовно крвопролевање, бидејќи таму зборуваат за носење чекани, разно оружје. Таа активно учествува во планирањето пуч и граѓанска војна и вели: „Дали имаме информации дека Универзитетот во Белград е во контакт со синдикатот на војската? Мила Пајиќ: „Не, немаме“. Професорката: „Така, белградскиот универзитет соопшти дека армискиот синдикат контактирал со нив и дека армијата ќе биде подготвена и ќе дојде на нивен повик во случај на акција“, изјави Брнабиќ.

Таа рече дека нејзиното денешно прашање е „која е улогата на белградскиот универзитет во планирањето на државен и воен удар.

„Ректорот Ѓокиќ (Владан) и проширената ректорска управа треба што поскоро да одговорат на овие прашања на српската јавност. Не попладнево, не вечерва, не утре, туку веднаш. Кој учествуваше во ова и кој и потврди на Марија Васиќ дека се во контакт со синдикатите во српската војска, дека преговараат со Армијата како Белградски универзитет и дека Белградскиот универзитет гарантира дека армијата ќе излезе на улица и ќе реагира? Која е улогата на Универзитетот во Белград во планирањето на државниот удар и воениот удар?“ праша Брнабиќ.

Таа праша и дали поради тоа е формирана таканаречената експертска работна група, која во својот извештај практично информираше, како подготовка за 15 март, дека барањата не само што не се исполнети, туку и дека е невозможно да се исполнат.

Најави дека ќе реагира обвинителството и сите надлежни органи.

Во сабота во Белград ќе се одржи голем протест, на кој граѓаните се поканети од студенти, што српската влада го смета за обид за насилно соборување на власта.

Српскиот парламент ги извести пратениците и вработените дека од денеска до 16 март на полноќ ќе бидат затворени зградите на Собранието од безбедносни причини.

Во известувањето е наведено дека генералниот секретар на Собранието врз основа на безбедносната проценка на Министерството за внатрешни работи, а со цел да се избегне каков било, макар и минимален простор за потенцијални провокации и конфликти, донел одлука за затворање на зградите на Собранието, поточно Домот на Народното собрание и зградата на Народното собрание, пренесува ФоНет.

Одлуката е донесена „само од безбедносни причини, со цел да направиме се што е во наша моќ најавениот митинг на 15 март во Белград, пред Народното собрание, да се одвива без никакви инциденти“, се наведува во соопштението, во кое се повикуваат сите да направат се за протестот во сабота да помине мирно и без никакви инциденти.

Адвокатот Стефан Јањиќ, пратеник и генерален секретар на Србија центар, изјави дека Српската напредна партија (СНС) на Александар Вучиќ, преку „незаконската одлука на генералниот секретар на Народното собрание, Срѓан Смиљаниќ“ да им забрани на пратениците да влезат во зградата на Парламентот, штотуку извршила еден вид државен удар во Србија.

„Никој не може да им забрани на пратениците да влезат во Собранието, особено не на назначеното лице кое е одговорно за организирање на работата на стручните служби и за набавка на тоалетна хартија. Јасно е дека наредбата за прекршување на Законот за Народно Собрание ја издаде Ана Брнабиќ, која ги спроведува налудничавите идеи на Александар Вучиќ. Овој чин го означи завршувањето на таканаречениот државен удар „одозгора“, специфичен облик во кој највисокиот носител на државната власт ја узурпира власта на незаконски и неуставен начин. Диктатурата ќе биде нејзина последица“, нагласи Јањиќ, пренесува „Ал џезира“.

Во сабота во Белград ќе се одржи голем протестен митинг, на кој граѓаните се поканети од студенти, што српската влада го гледа како желба за насилно рушење на државните институции.

Србија веќе четири месеци е блокирана од студентските протести поради смртта на 15 лица на железничката станица во Нови Сад на 1 ноември минатата година. Студентите бараат казна за одговорните како и поголемо владеење на правото во државата.

Студенти од градовите низ Србија пеш одат кон Белград на големиот протест в сабота. Тие не се сами во својата потрага. По нив следат и средношколци, просветни работници и работници од различни сектори.

Доналд Трамп Јуниор, најстариот син на американскиот претседател, синоќа објави поткаст на платформата Rumble, на кој го угости Александар Вучиќ. Српскиот претседател зборуваше за протестите, кои со месеци траат во Србија. Тој посочи дека зад нив стојат невладини организации, кои се финансирани од странство.

„Можете ли да замислите дека сите невладини организации, кои учествуваа во организирањето на овие настани во Србија, беа платени однадвор, од САД, од УСАИД, Националната фондација за демократија и некои други организации“, рече тој.

„И не велам дека ги користеа овие пари само за тоа. Тие ги користеа парите за сè. Но и за тоа“, додаде тој. Тој предупреди дека САД трошат стотици милиони долари на работи што немаат никаква корист за американските граѓани.

Синот на Трамп рече дека УСАИД потрошила 14 милиони долари за јавни набавки, а Вучиќ одговори дека Агенцијата потрошила уште повеќе пари за финансирање невладини организации, кои станале инструменти во секаков вид политичка криза.

„И тие секогаш ја избираа страната што беше анархолиберална, која беше таканаречена зелена, но само таканаречена, и секогаш против лидерите што ќе ги зачуваат суверенитетот и независноста на земјата и нацијата“, се пожали тој. На прашањето дали српската влада се обидела да открие каде одат парите, Вучиќ рече дека тие сакаат да го сторат тоа, но дека се соочуваат со „лавина критики, дури и од некои извори во американската држава“.

„Можете да прашате сè, сите во светот, освен невладините организации кои се благословени од некого и заштитени од либералниот свет, затоа што, ако ги допрете, ако ги прашате – дождлив или сончев ден, сте ја направиле најстрашната грешка и ќе бидете распнати од нив. И тоа е нешто што ни се случува сега, но ние ќе си ја завршиме работата“, рече тој.

На синот на Трамп му порача дека ќе биде многу изненаден од резултатите од истрагата.