Регион
Турција отвори уште едно поглавје во преговорите со ЕУ
Турција во четвртокот на пристапната конференција во Брисел ги отвори преговорите во поглавјето Финансии и буџетски одредби, што е само 16-то поглавје отворено во повеќе од десет години.
Турција ја поднесе кандидатурата за полноправно членство во Европската унија уште во 1987 година, а од 2005 година преговорите западнаа во ќорсокак, поради низата проблеми од двете страни, и незаинтересираноста на главните европски земји.
Турција ги отвори пристапните преговори во Европската унија на 3-ти октомври 2005 година, а досега отвори само16 од 35 преговарачки поглавја, од кои само едно е привремено затворено. ЕУ во декември 2006 година одлучи дека нема да ги отвори преговорите во осум поглавја и дека нема да затвори ниедно поглавје додека Турција не ги нормализира односите со Кипар.
ЕУ ѝ вети на Турција дека ќе ги забрза речиси замрените преговори во замена за склучување на договорот за запирање на миграцискиот бран кој нејзините земји членки.
Преговорите со Турција од почетокот се контроверзно прашање во ЕУ, каде нејзините најголеми членки истакнуваат дека тие преговори се водат без гарантиран исход.
Претседателот на Европската комисија, Жан-Клод Јункер при преземањето на должноста во 2014 година истакна дека во текот на неговиот мандат до 2019 година нема да има проширување.
Турските преговори за членство беа и една од темите во кампањата за референдумот во Велика Британија за членството во ЕУ. Приврзаниците на излегувањето истакнуваа дека турското членство ќе доведе до масовен прилив на доселениците на островот. Повеќе европски челници, во прв ред британскиот премиер Дејвид Камерон, но и германската канцеларка Ангела Меркел, истакнуваа дека турското членство „не е на дневниот ред“ и дека е „отворен исходот“ од тие преговори.
Од друга страна, турскиот министер за европски работи Омер Челик, изјави дека излегувањето на Велика Британија „ќе ја зајакне улогата на Турција во ЕУ“.
Турскиот претседател Реџеп Тајип Ердоган минатиот четврток остро критикувајќи ја Европската унија ја спомена можноста Турција да организира референдум за тоа дали ќе ги продолжи пристапните преговори со ЕУ, сличен на референдумот кој истиот ден се одржа во Велика Британија.
„Можеме да го консултираме народот, како што тоа го прават Британците“, рече Ердога. „Прашањето ќе гласи: Треба ли да ги продолжиме преговорите со ЕУ или да ги прекинеме“, рече турскиот претседател обвинувајќи ја ЕУ дека „не ја сака Турција бидејќи е муслиманска земја“.
„Зошто толку одолжувате?“, ја запраша Ердоган Унијата, додавајќи дека Анкара е разочарана од тоа што процесот со години стои во место./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Tлото на Балканот се тресе: По Хрватска, земјотреси и во Албанија и Грција
Два земјотреси, во растојание од една минута – во 19.19 и 19.20 часот – вечерва се регистрирани на територијата на Албанија.
Земјотресите се со интензитет од 2,1 степен според Рихеровата скала.
Епицентарот на првиот земјотрес бил на седум километри од Елбасан, додека вториот на 62 километри од Тирана.
Според информациите на ЕМСЦ, неколку минути претходно, земјотрес од 2,5 степени имало и во јужниот дел од Грција, а уште два од 2 и 2,3 степени се регистрирани предмалку на Крит.
Претходно денес, Хрватска ја погоди силен земјотрес од 4,7 степени, а беше почувствуван и во Босна и Херцеговина. По овој потрес, следеа неколку помали.
Регион
Не ги навредив Бугарите, туку ја критикував нашата влада, објасни хрватскиот претседател по изјавата на која реагираше Софија
Хрватскиот претседател Зоран Милановиќ изјави дека со изјавата дека Хрватска е „на дното на ЕУ по повлекувањето на европските пари, а само Бугарија е полоша“, не ги навредил Бугарите, туку ја исмејува хрватската влада која прави „будали и социјални случаи“ од нејзините граѓани.
Милановиќ претходно рече дека „Хрватска е дното на Европската унија и дека само Бугарија е полоша“, па секој ден се молат на Бога, Бугарија да остане последна и ништо да не и се случи, бидејќи во спротивно би била Хрватска“. По изјавата, според хрватските медиуми, Бугарите ја повикале хрватската амбасадорка во Софија, Јасна Огњеновац и изразиле незадоволство, пренесува порталот „Индекс“.
Бугарското Министерство за надворешни работи на хрватскиот амбасадор му пренело „длабоко разочарување од изјавата на претседателот Милановиќ“, каде што истакнале „дека изјавата е неприфатлива за Бугарија и не е во согласност со одличните билатерални односи меѓу Хрватска и Бугарија“.
Тие истакнаа и дека се надеваат дека „хрватската влада ќе се огради од таа изјава“.
„Не ги навредив Бугарите, туку исмевав некои елементи на хрватската влада кои не’ прават будали и социјален случај“, рече шефот на хрватската држава и додаде дека претходно ја критикувал земјата на тема повлекување европски пари.
„Дали можеме да кажеме дека Хрватска се моли Сингапур последен да подигне пари? Дали тоа звучи подобро? Но, Сингапур не е европска земја. Значи некој мора да биде последен. Тоа е Бугарија, а Хрватска е претпоследна“, рече Милановиќ и потсети дека тоа се статистички податоци и дека тоа досега го кажал десет пати.
„Тоа е потсмев, за жал, на сметка на некои во Хрватска кои не прават социјален случај, кои не можат да земат доволно европски средства, па затоа сме претпоследни. Нормално, гледаш кој е последен. Бугарија е последна, секогаш е последна (…) Хрватска е претпоследна“, рече Милановиќ.
„И тоа е факт за кој зборував десет пати. Алелуја (…) Тоа се факти за кои мора да се разговара во политиката бидејќи се многу релевантни податоци. Зошто Хрватска е претпоследна? Зошто не е петата одоздола, или петта одозгора. Зошто не е? Веројатно некој е одговорен за тоа“, додаде тој.
На крајот, како што додаде, никој не се моли Бугарија да пропадне, туку дека неговата изјава е верзија на американската шега за сојузната држава Арканзас, која „се моли на Бога Мисисипи, кој е најсиромашниот, да биде здрав и добро“, бидејќи во спротивно тоа би бил Арканзас.
„За да го знаете тоа, треба да прочитате нешто во животот, а не да се занимавате со селски скандали“, рече Милановиќ.
Регион
Земјотрес со јачина од 4,7 степени во Хрватска, почувствуван и во БиХ
Земјотрес со јачина од 4,7 степени според Рихтеровата скала утрово во 05:38 часот е регистриран во Хрватска, објави Европскиот медитерански сеизмолошки центар (ЕМСЦ).
Според информациите од Европскиот медитерански сеизмолошки центар, земјотресот бил на 92 километри јужно од главниот град Загреб и на 14 километри од границата со Босна и Херцеговина, кај Тржачка Раштела.
Земјотресот бил на длабочина од 10 километри.
Земјотресот најмногу бил почувствуван во централна Хрватска и во дел од Босна и Херцеговина со интензитет од V-VI степени според Европската макросеизмичка скала.
Засега нема извештаи за повредени лица или за предизвикана материјална штета.