Турските гласачи во недела, за прв пат во модерната историја на оваа земја, по директен пат ќе го изберат новиот претседател, а сегашниот премиер Реџеп Тајип Ердоган важи за најголем фаворит меѓу кандидатите.
 

Турските гласачи во недела, за прв пат во модерната историја на оваа земја, по директен пат ќе го изберат новиот претседател, а сегашниот премиер Реџеп Тајип Ердоган важи за најголем фаворит меѓу кандидатите.

Функцијата претседател во Турција во најголем дел е церемонијална, меѓутоа подразбира одредени значајни овластувања, а се очекува дека Ердоган ќе настојува, преку измени во Уставот, да ја прошири улогата на шефот на државата, пишува AFP.

Малкумина се сомневаат во тоа дека Ердоган, кој повеќе од 10 години има доминантна улога во турската политика, нема да успее да го победи својот главен противкандидат, поранешниот шеф на Организацијата за исламска соработка и академика, Екмеледин Ихсаноглу, или пак младиот курдски кандидат Селахатин Демирташ.

Победата на Ердоган би ја концентрирала власта во рацете на човекот кој го подели турското општество по светски и верски основи, и ги загрижи западните сојузници на Турција, оценува Reuters.

За време на власта на Ердоган, Турција доживеа период на економски раст и појава на нова бизнис елита, која е конзервативна и лојална кон Ердоган. Додека неговите противници ги финансираат своите предизборни собири преку донации, Ердоган своите јавни настапи, дел од кои се финансираат од државните средства, ги претвора во демонстрација на сила, започнувајќи ја кампањата многу порано од предвиденото.

Турската централна изборна комисија минатиот месец ја одби жалбата на главната опозициска партија, Републиканската народна партија (ЦХП), дека Ердоган мора да поднесе оставка на премиерското место за да може да ја води претседателската кампања.

Неколку европски делегации кои ќе учествуваат во набљудувањето на изборите во Турција изразиле загриженост поради начинот на кој Ердоган ја води својата кампања, а меѓу нив се и ОБСЕ и Советот на Европа, кои сметаат дека треба јасно да се одвојат говорите на Ердоган како премиер на земјата, од говорите кои ги држи како претседателски кандидат.

Турските изборни закони на кандидатите им забрануваат за време на кампањата да држат говори и да учествуваат на церемонијално отворање на проекти кои се финансирани од државата и општините, а исто така ја ограничуваат и употребата на државните возила, потсетува Reuters.

Прашањето на финансирањето на предизборните кампањи досега не беше толку актуелно во Турција, пред се поради фактот што претходно шефот на државата беше избиран од турскиот Парламент, а сега за прв пат народот директно ќе гласа за претседател.

Иако има најголеми шанси за победа, се уште не е извесно дали Ердоган ќе победи во првиот круг, а за ова пресудна улога би можеле да имаат резултатите на третиот кандидат, Селахатин Демирташ, кој ја има поддршката од една прокурдска партија./крај/мф/бс