Регион
Турските власти пресретнале преписка меѓу следбениците на Ѓулен пред пучот
Турските власти пресретнале шифрирана преписка меѓу следбениците на проповедникот Фетулах Ѓулен водена пред неуспешниот обид за воен преврат ноќта на 15-ти јули, изјавил за агенцијата Reuters извор од турските власти, а претседателот Реџеп Тајип Ердоган ги отфрла обвинувањата од Западот за големите чистки и затворањето на новинари.
Според неименуваниот соговорник на агенцијата, турското разузнавање уште во мај минатата 2015 година добила преписка меѓу следбениците на Фетулах Ѓулен преку специјална апликација којашто започнале да ја користат во 2014 година. Шифрираната коресподенција со помош на други средства се водела од декември 2013 година, рекол изворот на Reuters.
Турските власти така добиле податоци за речиси 40.000 лица кои го поддржувале исламистичкиот проповедник кој од 1999 година живее во егзил во Пенсилванија, САД, и кој повеќепати изјави дека е против сменување на власта преку воен удар.
„Значителен дел од нив се директно поврзани со обидот за државен преврат“, го цитира агенцијата својот соговорник додавајќи дека меѓу нив имало 600 високи офицери.
„Податоците од (апликацијата) ByLock ни овозможија да ја следиме нивната мрежа, во крајна линија значителен дел од неа. Подоцна тие се префрлија на друга апликација, кога сфатија дека ByLock повеќе не е сигурна“, прецизирал изворот истакнувајќи дека претходно се појавија извештаи дека турските разузнавачки служби ги дознале плановите за пучот неколку часови пред неговото започнување, но тоа не им го пријавиле на властите.
Турција во саботата завори 17 новинари кои се обвинети за поврзаност со „терористичка организација“, како што се именува мрежата на следбениците на Ѓулен, а претседателот Реџеп Тајип Ердоган ги отфрла критиките од Западот.
Со овој потег, две седмици по пропаднатиот обид за пуч, треба да се „зајакне националното единство“, откако во петокот Ердоган даде до знаење дека се откажува од гонењето на оние кои се обвинети за негово навредување. Станува збор за околу две илјади лица.
Меѓутоа, големата чистка сепак продолжува, и покрај предупредувањата од Европската унија дека таа може лоши да влијае врз турската кандидатура за членство.
Повеќе од 18.000 луѓе се притворени во последните две седмици. Против десетина илјади е покренато обвинение и се притворени. Отпуштени или суспендирани од државните служби се околу 66.000 луѓе во сите министерства.
Во саботата 17 од 21 новинар кои се појавија на судот во Истанбул, добија обвинување за поврзаност со „една терористичка организација“, јави службената новинска агенција Anadolu.
Меѓу нив е Назил Иличак, позната новинарка, поранешна пратеничка на владејачката Партија на правото и развојот (AKP) и поранешни членови на редакцијата на весникот Zaman кој беше наклонет на имамот Ѓулен до март годинава која властите ја преземаа контролата над издавачот./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Сијарто: Фокусот на унгарското претседателство со ЕУ ќе биде проширувањето на Унијата на Западен Балкан
За време на претстојното претседавање со ЕУ, Унгарија планира да се фокусира на прашања кои се важни за централна Европа, како што се борбата против илегалната миграција, проширувањето на Унијата кон Западен Балкан и енергетската безбедност, изјави денеска унгарскиот министер за надворешни работи, Петер Сијарто.
Кога станува збор за проширувањето на ЕУ, Сијарто на прес-конференција со својот чешки колега Јан Липевски рече дека регионот на Западен Балкан не заслужува да чека 14 години и 11 месеци за членство, што, како што вели, го поткопува кредибилитетот на политиката на Унијата, објави унгарската агенција МТИ.
„Тоа е ситуација што треба да се реши, така што унгарското претседателство (со Унијата) има јасна агенда да им помогне на земјите од Западен Балкан да го забрзаат пристапниот процес“, рече Сијарто.
Посочи дека ефектите од миграцијата директно се чувствуваат во Централна Европа од 2015 година и неопходна е сериозна регионална соработка за да се запре мигрантскиот прилив.
„Чешката, словачката и полската полиција ни помогнаа и ни помагаат на јужните граници на Унгарија да ги задржиме илегалните мигранти кои и се закануваат на Европа надвор од границите. Потребни се континуирани заеднички напори на четворицата централноевропски премиери за да се држи под контрола прашањето за квотите и да не се дозволи илјадници или десетици илјади илегални мигранти да се шетаат неконтролирано“, додаде Сијарто.
Шефот на унгарската дипломатија нагласи дека централна Европа „ќе продолжи да се спротивставува на притисоците поврзани со квотите“. Сијарто се осврна и на енергетската безбедност, наведувајќи дека Унгарија и Чешка планираат нуклеарен развој и затоа ќе продолжат да се борат против негативната дискриминација поврзана со нуклеарната енергија во Брисел.
Нуклеарната енергија е одржлив начин за производство на енергија, тоа е безбеден, еколошки и евтин метод за производство на големи количини електрична енергија“, заклучува Сијарто.
Регион
Ана Брнабиќ за 2 јуни распиша локални избори во 66 единици на локалната самоуправа
Претседателката на српското собрание Ана Брнабиќ распиша избори за 2 јуни во 66 единици на локалната самоуправа, бидејќи Националното собрание неодамна со две третини ги усвои измените на Законот за локални избори.
Изборите во овие локални самоуправи ќе се одржат на ист ден со изборите за советници во Градското собрание на Белград, односно на 2 јуни годинава.
„Среќна сум што испративме силна порака од парламентот до сите наши граѓани дека како нивни избрани сме способни да разговараме и да постигнеме договор и покрај сите наши разлики“, рече Брнабиќ по објавата.
Регион
(Видео) Уапсени Срби во Атина, поранешни членови на „Пинк Пантер“: осомничени се за украден накит вреден 315.000 евра
Двајца Срби, кои во минатото биле членови на организацијата „Пинк Пантер“, се уапсени во Атина под сомнение дека ограбиле две познати златарници во центарот на грчката престолнина, соопшти атинската полиција.
Според соопштението на грчката полиција, уапсените оперираат најмалку од минатиот декември, а се претпоставува дека имале соодветна мрежа за канализирање на украдени предмети, бидејќи оствариле добивка од над 315.000 евра.
По претресот во нивните домови, меѓу другото, пронајден е алат користен при кражбата, три рачни часовници, накит, 190 евра, лажна возачка дозвола, три мобилни телефони, лични предмети, како и дополнителен мотоцикл и автомобил што служеле за превоз.