Регион
Убиени двајца турски војници на југоистокот

Двајца турски војници се убиени, а уште тројца се ранети по детонација на импровизирана експлозивна направа во текот на воена операција во понеделникот во градот Нусајбин на југоисточната провинција Мардин, каде што веќе 45 дена на сила е полициски час.
Петте турски војници биле ранети кога курдските герилци ја активирале експлозивната направа која била сокриена во ров. Повредените војници биле пренесени во државната болница во Нусајбин, каде што двајца им подлегнале на повредите, пренесува електронското издание Hurriyet Daily News повикувајќи се на соопштение на турската армија.
Југоистокот на Турција, главно населен со Курди, од минатото лето е погоден од бранот жестоки секојдневни борби меѓу владините безбедносни сили и припадниците на забранетата Работничка партија на Курдистан (PKK), откако минатата година пропаднаа преговорите за постигнување примирје по непријателствата започнати со курдското востание од 1980-те во кои досеа загинаа повеќе од 40.000 луѓе.
Челникот на PKK, Чемил Бајик, за британскиот јавен сервис BBС изјави дека герилците се подготвени да ги интензивираат борбите против Турција, бидејќи Анкара сака да ги присили да се предадат. Според него, турскиот претседател Реџеп Тајип Ердоган „ја поттикнува оваа војна“. „Курдите ќе се бранат до крајот, сé додека тоа е турскиот пристап. PKK, секако, затоа ќе ја поттикнува војната“, рекол.
Од друга страна, советникот на турскиот претседател Илхур Чевик отфрли секаква можност за преговори со PKK, велејќи за BBC, дека курдските милитантни „се обидуваат да создадат одвоена држава во Турција, што всушност претставува отцепување“ у додавајќи дека во моментов не постојат никакви шанси за преговори. Според него, претседателот Ердоган ја имаа поддршката за воената кампања.
Воениот челник на PKK, Бајик, пак, тврди дека неговата организација не сака отцепување од Турција, тврдејќи дека „сакаат да живеат во рамките на турските граници на својата земја слободно“, како и дека „борбите ќе траат сé додека не бидат прифатени курдските права“.
Двегодишното примирје меѓу турските сили и PKK пропадна во јули 2015 година, по меѓусебните обвинувања за непочитување на договореното, и од тогаш судирот ескалираше. Турција, и нејзините сојузници од НАТО, ЕУ и САД, ја савија PKK на листата терористички организации. Војската во деловите со курдско мнозинство на југоистокот од Турција воведе полициски час.
Според Меѓународната криза група, повеќе од 340 припадници на турските безбедносни сили се убиени од ланскиот јули, како и најмалку 300 курдски борци и 200 цивили. Неодамна, пак, претседателот Ердоган тврдеше дека во судирите се убиени неколку илјади борци на PKK./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Eди Рама го слави четвртиот мандат, Бериша повика на отпор

Премиерот на Албанија, Еди Рама обезбеди четврти мандат откако неговата Социјалистичка партија победи на изборите во Албанија во неделата, покажаа вчера официјалните резултати. Опозицијата тврди дека изборите се украдени.
Со преброени 96 отсто од гласовите, Социјалистичката партија имаше 52 отсто од гласовите и 82 места во 140-члениот парламент. Нејзиниот главен опозициски ривал, централно-десничарската Демократска партија на Сали Бриша, освои 34 отсто од гласовите и 52 пратенички места.
Резултатите ќе го прошират мнозинството на Социјалистичката партија и ќе му дадат на Рама удобно водство за формирање влада. Тие, исто така, ќе му овозможат да продолжи со напорите за исполнување на ветувањето за влез на Албанија во Европската унија до 2030 година, иако многу експерти сметаат дека временската рамка е премногу оптимистичка со оглед на неопходните реформи, особено кога станува збор за искоренување на корупцијата.
„Ова е најскромното искуство во мојот живот и доаѓа во историски момент за Албанија… како идна членка на Европската унија“, изјави Рама за Политико.
Меѓународните набљудувачи се сомневаа во регуларноста на изборите, а албанското специјално обвинителство соопшти дека истражува 39 случаи поврзани со изборите, главно за купување гласови, објави Ројтерс. Не е прецизирано кои партии се под сомнеж.
Бериша, поранешен претседател и премиер, ги отфрли изборните резултати и повика на протест на 16 мај, денот кога лидерите од цела Европа треба да се соберат на самитот во Тирана.
„Никогаш нема да ги прифатиме овие избори – никогаш“, рече Бериша на вчерашната прес-конференција, на која упати обвинувања за нерегуларности, но без јавно да презентира докази.
Бериша продолжи со острата реторика карактеристична за изборната кампања, нарекувајќи го Рама „нарко-диктатор“. Во изјава за Ројтерс, партијата на Рама ги отфрли обвинувањата за изборна измама и го нарече Бериша „стар, безнадежен поранешен комунистички политичар“.
Осумдесетгодишниот Бериша тврди дека Албанија не е ни блиску до подготвеност за прием во ЕУ. Поранешниот личен лекар на покојниот диктатор Енвер Хоџа, по професија кардиолог, водеше кампања по моделот на американската, под надзор на консултанти донесени од Вашингтон Сепак, тоа не му помогна да го порази Рама.
„Да мислиш дека можеш да станеш Трамп е исто како да ангажираш фризер во Холивуд и да мислиш дека ќе станеш Бред Пит“, рече Рама.
Рама (60), познат по своето присуство на социјалните мрежи, во понеделникот објави фотографии и пораки од Европската куќа во Тирана, каде што интензивно се подготвуваат за самитот на европската политичка заедница, објави Политико.
Претседателката на Европската комисија Урсула фон дер Лајен и претседателот на Европскиот совет Антонио Коста доаѓаат во Албанија на шестото издание на самитот, иницијатива што ја покрена францускиот претседател Емануел Макрон за да ги соберат земјите од ЕУ и земјите кои не се членки на ЕУ за да разговараат за безбедноста, економската соработка и регионалната стабилност. На самитот ќе бидат и претставници на земјите кои се надеваат на членство во ЕУ, како Украина и Грузија.
„Голема чест е да го пречекаме целиот наш демократски континент во Тирана – вклучувајќи ја Украина и мојот драг пријател Володимир Зеленски“, рече Рама.
Рама, кој е на власт од 2013 година, беше фаворит на овие избори, делумно благодарение на влијателната мрежа што ја изгради за време на неговите 12 години на власт, неодамнешниот период на постојан економски раст, но и длабоко поделена опозиција, според Ројтерс.
Регион
Бебе најдено во црна кеса покрај контејнер во Атина, мајката пријавила дека било киднапирано

Бебе старо околу три месеци било пронајдено во црна кеса покрај контејнер околу 17 часот во Атина.
Се почнало кога мајка пријавила во полиција околу 15.00 часот. дека непознат маж и ја киднапирал ќерката во супермаркет во центарот на Атина. Според нејзините зборови, мажот пришол и рекол дека сака да купи нешто за детето, а потоа и го одзел бебето, пишува „Прототема“.
Полицијата почнала да трага по детето кое било пронајдено два часа подоцна. Девојчето било пронајдено во црна кеса до контејнер како плаче. Случајниот минувач кој го пронашол веднаш ги алармирал полицијата и брзата помош.
Бебето веднаш со возило на Брза помош било пренесено во болница каде и било прегледано. Според првичните информации нејзината здравствена состојба е стабилна.
Полицијата ги приведе на распит мајката и бабата на детето, додека се истражуваат сите аспекти на овој необичен случај. Се уште не се познати идентитетот и мотивите на лицето кое наводно го киднапирало детето, а надлежните не исклучуваат никаква можност.
Регион
Тинејџерка во Ровињ пријавила дека била силувана: отишла на државно натпреварување, била нападната во текот на ноќта

Хрватската полиција започна истрага откако малолетнича пријавила силување кое наводно се случило ноќта на 7 мај во станбениот комплекс во Истра каде што се одржувал државниот натпревар за средношколци.
Според „Јутарњи лист“, случајот го води Личко-Сењската полиција, со оглед на локацијата каде што е примена пријавата. Малолетничта пријавила силување во присуство на возрасен член на семејството, врз основа на што полицијата направила записник и веднаш започнала со преземање на други службени дејствија.
По анонимна дојава од загрижени родители според написите на „Јутарњи лист“ тие побарале итна истрага поради овој случај, бидејќи веруваат дека силувањето се случило поради небрежност на возрасните кои ги придружувале учениците на државниот натпревар.
Во писмото, тие ги наведуваат имињата на лицата (образовните работници) за кои сметаат дека не презеле основни мерки за заштита на малолетниците, односно ги оставиле без надзор во текот на ноќта.
Според нивните информации, настанот се случил помеѓу 00:30 и 03:30 часот, а околу 16:00 часот малолетничката се јавила кај својата пријателка и ѝ кажала што се случило.
Во тек е серија интервјуа, со оглед на големиот број луѓе кои дознале за случајот бидејќи се појавила паника и нервоза кај децата и родителите. Клучни ќе бидат наодите од гинеколошкиот преглед на жртвата, по што полицијата ќе го испраша осомничениот млад човек, пренесува медиумот.
Кога ќе заврши кривичната истрага, полицијата ќе поднесе извештај до надлежното државно обвинителство врз основа на собраните информации.