Сред растечката загриженост во врска со новиот наплив на бегалци и мигранти кон Европа, УНИЦЕФ ја адаптира својата стратегија во поддршка на одговорот на властите и граѓанскиот сектор во Грција, каде се зголемуваат хуманитарните и долгорочните потреби на повеќе од 22 илјади деца, се вели во соопштението од УНИЦЕФ.

Кризата беше во фокусот на посетата на Грција од страна на Нана Мускури, реномирана пејачка, хуманитарка и амбасадорка на добрата волја на УНИЦЕФ и Мери-Пјер Поаре, специјален координатор на УНИЦЕФ за бегалско-мигрантската криза во Европа.

Говорејќи по посетата на центрите за бегалци во Атина, Мускури рече дека била многу трогната од она што го видела и од приказните на бегалците што ги чула. „Ова се многу ранливи луѓе – деца, жени, но и мажи. Тие се многу кревки. Исто така, на другата страна гледам дека грчкиот народ е секогаш многу дарежлив, и на располагање да помогне“, рече Мускури.

Во моментов, проектите поддржани од УНИЦЕФ во Атина вклучуваат прифатен центар за жени и деца-бегалци и  мигранти, кој работи во партнерство со локалната невладина организација „Фарос“, и мобилна единица за заштита на децата во пристаништето Пиреја, со која раководи уште една грчка невладина организација, „Солидарност сега“.  

По серијата состаноци со високи владини функционери, Поаре ја истакна решеноста на УНИЦЕФ да ја поддржи работата во корист на бегалците и мигрантите од страна на Владата и другите партнери, дури и во време на акутни национални мерки за штедење. 

„УНИЦЕФ е многу горд што е дел од оваа национална мобилизација. Грција прави многу, а ние сме тука за поддршка на овие напори. Нашиот фокус врз децата кои навистина се најранливи е добредојден и ценет, со ран детски развој за многу малите деца, образование, вакцинација и заштита на децата како наши приоритети“, рече Поаре. 

Таа рече дека УНИЦЕФ, исто така, особено внимание обрнува на потребите за заштита на најранливите деца и на оние кои пристигнуваат без придружба, како надополнување на работата на ЕККА, Националниот центар за социјална солидарност. Во моментов има околу 2.000 непридружувани и разделени деца-бегалци или мигранти во Грција.

„Уште многу треба да се направи“, додаде Поаре. „Фокусот врз децата треба да се премести на следното ниво.“

По посетата на прифатниот центар за бегалци „Кара Тепе“ на островот Лезбос, Поаре оддаде посебно признание за работата на локалната самоуправа и директорот на центарот, Ставрос Мирогианис, за создавањето на добро структуриран и хармоничен центар за бегалските семејства.

Повеќе од еден милион бегалци и мигранти поминале низ Грција од јануари 2015-та година, со што земјата е една од најважните точки на влез во Европа. Повеќето пристигнуваат откако преживеале опасен премин по море од Турција.

Од започнувањето на примената на новите ограничувања за премин на границите на Балканот и по неодамнешниот договор меѓу ЕУ и Турција, најмалку 54 илјади бегалци и мигранти останаа заглавени во Грција. 

Хуманитарните потреби на оваа популација на бегалци и мигранти растат, при што семејствата имаат потреба од сигурно и пристојно засолниште, основна поддршка и здравствени услуги. Многу деца-бегалци и мигранти не одат на училиште со месеци или дури со години, и бараат пристап до образование. Децата кои се без придружба или биле одделени од семејствата се во посебен ризик од експлоатација и злоупотреба./крај/мф/бс