Српскиот премиер Александар Вучиќ изјавил дека од шефовите на дипломатиите на Европската унија (ЕУ) побарал преговарачките поглавја од пристапните преговори да бидат отворени до крајот на оваа година, пренесува Танјуг.

„Направивме се што можевме“, рекол Вучиќ по собирот „Пријатели на Србија“ во Брисел на кој присуствуваа 20 министри за надворешни работи од земји членки на ЕУ и осум заменици и државни секретари.

Домаќинот на собирот, австрискиот министер за надворешни работи Себастијан Курц и честитал на Србија за позитивните и значајни реформи, но додал дека не добро тоа што Србија веќе година ипол по започнувањето на пристапните преговори, се уште нема отворено нити едно поглавје.

„Сакаме да ја поддржиме Србија на европскиот пат, а денес можевме да видиме дека во тоа имаме поддршка од колегите од ЕУ“, рекол Курц.

Министерот за надворешни работи на Италија, Паоло Џентилони изјавил дека сите ја ценат конструктивната улога на Србија во напорите за зачувувањето на мирот и стабилноста на западен Балкан, како и недогматскиот и прагматичен пристап на Белград во решавањето на проблемите.

Вучиќ исто така додал дека овој состанок бил голема прилика за Србија низ аргументи и факти да покаже што било постигнато во изминатите година ипол.

„Баравме поглавјата да се отворат пред крајот на годината. Направивме многу, а ќе направиме уште повеќе за да постигнеме резултати“, рекол Вучиќ, додавајќи дека е позитивно тоа што дури 11 министри од ЕУ се вклучиле во дискусијата на денешниот состанок./крај/мф/бс