Четворица поранешни припадници на српската паравоена групација „Арканови тигри“ се осудени на казни затвор до 21 година во Шпанија, во прв ред поради припадност на злосторничка организација, соопшти во вторникот шпанското правосудство.
 

Четворица поранешни припадници на српската паравоена групација „Арканови тигри“ се осудени на казни затвор до 21 година во Шпанија, во прв ред поради припадност на злосторничка организација, соопшти во вторникот шпанското правосудство.

Владимир Милисављевиќ, веќе претходно осуден поради убиството на поранешниот српски премиер Зоран Ѓинѓиќ, Лука Бојовиќ, Владимир Мијановиќ и Синиша Петриќ беа уапсени во февруари 2012 година во Шпанија. На Бојовиќ во 2009 години му беше судено за бруталното убиство на сонародникот Милан Јуришиќ, но беше ослободен.

Сите четворица биле припадници на озлогласениот Земунски клан, мафијашка организација којашто била формирана од поранешните припадници на паравоената формација на подоцна убиениот Жељко Ражњатовиќ Аркан, позната како „Арканови тигри“.

Милисављевиќ е осуден на десет години затвор поради „поседување воено оружје“, на уште пет години поради „припадност на злосторничка организација“, три години доби поради прикривање на докази и уште три поради „поседување лажни документи“.

Тој во Србија во 2007 година во отсуство е осуден на 35 години затвор поради атентатот во кој беше убиен премиерот Ѓинѓиќ, а шпанското правосудство во 2013 година ја одобри неговата екстрадиција на Србија, но под услов првин да ја отслужи казната во Шпанија.

Бојовиќ по трите точки од обвинението е осуден на вкупно 18 години затвор, но истовремено е ослободен од обвинението за грозоморното масакрирање на Јуришиќ. Петриќ доби 15 години затвор поради „поседување воено оружје“ и „припадност на злосторничка организација“, а поради таквата „припадност“ Мијановиќ е осуден на пет години затвор./крај/мф/сн

Извор: Reuters