Русија на состанокот на Советот НАТО – Русија кој се одржа во средата во Брисел, ја предупреди Алијансата за негативните последици од нејзините воени активности во регионот на Црното Море и повторува дека во источна Украина нема никакви активности на нејзините сили, изјави рускиот амбасадор во НАТО, Алескандр Грушко.

„Зборувавме за прашањето на Црното Море. Од наша страна рековме дека сметаме оти секои зголемување на воените активности на земјите на НАТО во црноморскиот регион ја дестабилизира ситуацијата и не придонесува за безбедноста во регионот“, изјави Грушко за новинарите.

На самитот на НАТО во Варшава минатата седмица, во заедничка изјава НАТО и Украина изразија загриженост во врска со наводни планови на Русија за зголемување на своето воено присуството во регионот на Црното Море. Од своја страна Москва одговори дека нејзините планови се поврзани и претставуваат одговор на плановите на НАТО за создавање постојна флота на Алијансата во Црното Море.

Москва, пак, истакна дека како одговор на зголемените поморски сили на НАТО во Црното Море ќе стори сé за да не биде нарушена рамнотежата на силите во регионот.

Според Конвенцијата од Монтре од 1936 година, земјите што немаат излез на Црно Море не смеат на таа територија да ги задржуваат своите воени бродови подолго од 21 ден. Според тоа, постојано присуство на земји на НАТО во водите на Црното Море може да си дозволат само Бугарија, Романија и Турција. Притоа бугарските челници изјавија дека не сакаат да ѝ се приклучат на флотата на НАТО, за да не се милитаризира црноморскиот регионот, додека другите две членки Турција и Романија, како и нечленката Украина сакаа создавање ваква флота на западната алијанса.

Седиштето на руската Црноморска флота историски е во Севастопол, на полуостровот Крим кој се отцепи од Украина и се присоедини на Руската Федерација, што Западот го смета за нелегално руско анектирање на украинска територија.

За Украина

Рускиот амбасадор во НАТО, Грушко изјави дека на средбата со своите колеги од земјите членки на Алијансата истакнал оти не постои никаква воена активност на Русија во Украина и оти за решавање на кризата во оваа земја за која Москва е упорна дека претставува внатрешноукраински конфликт е неопходно да се исполнат политичките делови од договорот од Минск, кои меѓу другото подразбираат и давање специјален статус и голем степен на автономно управување на побунетиот рускојазичен региони Донбас.

„Во прв ред, неопходно е да се дојде до политичко решение врз основа на договорот од Минск. Тоа е едно од прашањата за коишто дискутиравме“, рече Грушко.

Додаде дека за тоа постојат различни механизми, вклучително и „Нормандиската четворка“ (Украина, Русија, Франција и Германија – з.р.), Контактната група (меѓу властите во Киев и во самопрогласените народни републики во Донецк и Луганск –з.р,), механизмите на ОБСЕ.

„Решението на украинската криза зависи од способноста на властите во Киев да ги исполнат оние чекори, кои беа идентификувани“, укажа рускиот дипломат.

„Во секој случај, никаква руска воена активност во Украина нема“, категоричен е Грушко.

Но посочи дека на состанокот на Советот НАТО – Русија, изразил загриженоста во врска со ситуацијата во Донбас, каде што е забележан пораст на нападите од страна на силите на Киев. Претходно во средата и рускиот претседател Владимир Путин во телефонскиот разговор со францускиот колега Франсоа Оланд и германската канцеларка Ангела Меркел изрази загриженост од секојдневните бомбардирања од страна на украинските сили врз населените места во Донбас.

„Изразивме загриженост во врска со континуираното влошување на ситуацијата во југоисточниот дел на Украина. Сведоци сме не само за продолжување на прекршувањето на прекинот на огнот, туку и на зголемување на нападите, во прв ред од страна на Украина“, рече Грушко.

Прецизираше дека најголем број од гранатирањата се регистрирани во Донецк и Луганск, што ја докажува одговорноста на властите во Киев. „Притоа укажавме дна тоа дека трајно решение не е возможно без придвижувања во двете насоки –безбедносната и политичката“, додаде амбасадорот на Русија во НАТО./крај/мф/сн

Извор: Макфакс