Претседателот на Европската комисија, Жан клод Јункер изјави дека е свесен за заканата, која ја претставуваат националистичките политичари за европската солидарност, која е главна цел на ЕУ.

„Овие популисти, националисти, глупави националисти ги сакаат само своите држави. Тие не ги сакаат оние кои доаѓаат од далеку. Јас ги сакам оние кои доаѓаат од далеку… ние треба да постапуваме солидарно со оние кои се во полоша ситуација од нашата“ вели Јункер за Си-ен-ен, во пресрет на европските избори.

На прашањето дали антиевропските сили поуспешно ја мобилизираат својата база од проевропските, Јункер оценил дека секогаш е полесно да се мобилизираат негативните отколку позитивните сили.

Тронка надеж, Јункер гледа во тоа што се случуваше по одлуката Британија да ја напушти ЕУ во 2016 година.

„Од брегзит, бројот на оние кои се за ЕУ порасна бидејќи луѓето гледаат што се случува и видоа дека излегувањето од ЕУ не е толку лесно како што им било речено“ истакна тој.

Јункер вели дека сака да заврши процесот на брегзит, затоа што, како што објаснува, тој ѝ штети на општата атмосфера во Европа. Смета и дека Британците треба да го поддржат планот на премиерката Тереза Меј, кој е договорен со ЕУ.

Пратеникот од ДУИ, Артан Груби, ја поздрави одлуката за оставката на пратеникот Павле Богоевски и изрази жалење за состојбата во која е членот на неговото семејство и посака брзо закрепнување. На прашање дали очекува и други пратеници и функционери да поднесат оставка, Груби го повтори ставот за најавената проверка и дека очекува ако дел од функционерите не ги поминат филтрите, и тие да поднесат оставка.

„Се надевам дека сите ние ќе ги почитуваме сите институции на државата кога ќе поминат низ сите филтри и секако дека ќе бараме оставка од нив доколку згрешиле“, рече Груби.

Јавниот обвинител Љубомир Јовески рече дека верува оти не постојат законски или какви било пречки за да биде објавена потерницата за експремиерот Никола Груевски на листата на Интерпол.

Тој изрази очекување дека состојбата ќе биде решена многу бргу, а за тоа, како што рече, задолжена е обвинителката Вилма Русковска.

„Не ми е познато како напредува во тој дел, но верувам дека нема законски или какви било пречки за објавување на потерницата“, рече Јовески.

Јавниот обвинител по потпишувањето на меморандумот за соработка меѓу Академијата за судии и обвинители, ЈОРМ и ОБСЕ/ОДИХР беше запрашан дали до крајот на мај ќе има обвинение, на што одговори дека во оваа фаза не може да се говори за тоа.

„Во овој момент може да се говори бидејќи истражната постапка е при крај, па кога ќе заврши, ќе се знае каква одлука ќе донесе Јавното обвинителство. Дали ќе поднесе обвинение или ќе донесе друг вид јавнообвинителска одлука“, рече Јовески додавајќи дека не сака да се прејудицираат работите во моментот.