Македонија
(Видеоинтервју) Георгиевски: Србите биле три пати пожестоки, па не ги нарекуваме окупатори, зошто да не им простиме и на Бугарите
За експремиерот Љубчо Георгиевски нема ништо спорно ако македонската страна ги смени во учебниците називите за Бугарите од типот окупатор, номад или фашист, затоа што, според него, Македонија ѝ ја простила на Србија окупацијата од 30 години, ѝ простила и на Турција за петте века, па зошто да не ѝ прости и на Бугарија.
Во интервјуто за „А1он“, зборувајќи за македонско-бугарските односи, уште еднаш потенцира дека Македонија треба да ја смени перцепцијата кон Бугарија и да престане со антибугарското расположение, затоа што, според него, во минатото Бугарија била најголемиот поддржувач на Македонија, особено во 19 век. Наспроти ова, Геориевски вели дека треба да ѝ се оддаде признание и почит на Бугарија.
„Ако сме им простиле на Србите, кои биле три пати пожестоки окупатори на овие простори, ако сме им простиле во поновата историја на УЧК и седат во Владата, не гледам проблем да им простиме и на Бугарите. Аршинот треба да биде ист. Ако не простуваме, не простуваме никому. Треба да ја смениме перцепцијата и да признаеме дека Бугарија била најголем поддржувач на Македонија во 19 век. Факт е дека секој ранет комита од Македонија одел на лечење во Бугарија. Секој кој бил гонет се криел во Бугарија, 90% од оружјето доаѓало од Бугарија, обуките биле таму, во Бугарија. Таа поврзаност Бугарија- Македонија била многу јака, зошто има проблемот да ја признаеме? Триесет години го зборувам ова. Ако ги утврдевме пријателските места немаше да дојдеме до ова, ако секој политичар градеше по еден чекор, ниту ќе имавме обврски, ниту ќе ја имавме оваа шокова терапија“, вели Георгиевски во интервју за „А1он“.
На прашањето за откажувањето од македонското малцинство во Бугарија, Георгиевски вели дека тоа не било ништо ново и дека Македонија и со Договорот од Преспа и со Договорот со Бугарија се откажала од малцинствата.
„Предлагам да даде гаранција дека со ништо нема да ги поддржува аспирациите на македонското малцинство во Бугарија. Повторно галама, вик, патриоти колку сакате, а не гледам зошто. Македонија во овие 30 години шест пати официјално се има откажано од малцинствата во Грција и Бугарија. Три пати во договори со Грција, уште два пати во договор со Бугарија. Ги избришале од Уставот малцинствата, веќе не знам со кои промени и конечно со последниот договор меѓу Заев и Борисов, член 11, има шест потточки со кои ние се обврзуваме дека нема да даваме никаква поддршка таму. И сега кога јас го нудам тоа, виновен сум. Ако до сега пет пати сме се откажале од нив, да се откажеме и овој пат и да им дадеме гаранција на Бугарите“, објаснува Георгиевски.
Георгиевски смета дека Македонија мора да направи компромис и со заедничките историски личности и список на кој ќе им се направат историски биографии и доколку има факти дека тие дејствувале како Бугари, тоа да стои официјално.
„Да се направи список од 15 личности и да се каже овие се општи личности, без многу елаборирања, и дискусијата да заврши. И независно од тоа да се кажат основните биографски податоци за нив, затоа што Бугарите сметаат дека македонската историографија ги крие и не ги кажува, и тие податоци да се вметнат. И да се каже дека Гоце Делчев, Даме Груев и сите други биле учители на бугарската егзархија, факт ли е тоа дека македонската историографија тој факт не го знае, зошто го крие? Биле учители, признавате, а со тоа вие ја менувате глобалната перцепција дека не биле толку лоши туку биле пријатели, но ние не го кажуваме како факт. Ние потоа ќе си објасниме под кои околности работеле тука. Сега тука се смирени и двете страни, тие ќе си толкуваат по нивно, ние по наше“, вели Георгиевски.
На бурните реакции во јавноста откако тој ги изнесе и сега потврди за „А1он“ своите гледишта, Георгиевски рече дека стои зад нив и не е проблем ако некои политичари покренат иницијатива за негово протерување од државата. Вели дека има три државјанства, покрај македонското и бугарското, но не кажа кое е третото.
Не се чувствува повикан дека ја брани бугарската страна и додаде:
„Од 1990 година откако се појавив на политичката сцена добивам етикети за кого работам и што, но никогаш не сум се повел на планот на популизмот. Во ’90 не се откажав од идејата за самостојна Македонија, кога најголемиот број беа за Југославија“, рече Георгиевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Гаши на редовна координација во новиот собраниски состав: во фокусот конституирањето на комисиите и неформалните работни тела
Претседателот на Собранието, Африм Гаши денеска ја одржа првата редовна координација во новиот собраниски состав, на која, главно, се дискутираше за конституирањето на комисиите, како и на неформалните работни тела во законодавниот дом.
На координацијата, покрај претседателот Гаши и генералната секретарка Цветанка Иванова, присуствуваа претставници на сите партии, односно коалиции кои освоија пратенички мандати на неодамнешните парламентарни избори: Никола Мицевски од коалицијата на ВМРО-ДПМНЕ, Оливер Спасовски од коалицијата на СДСМ, Блерим Беџети од Европскиот фронт на ДУИ, Халил Снопче од ВЛЕН, Бобан Карапејовски од ЗНАМ и Борис Крмов од Левица.
Гаши притоа информира дека кон крајот на оваа работна недела треба да се одржи нова седница на Собранието, со цел верификација на останатите два мандати на пратеници, кои не беа верификувани на конститутивната седница на 28 мај годинава. Државната изборна комисија, како што рече Гаши, веќе има доставено извештај за овие два мандати, така што неделава треба да се закаже седница за нивно верификување, со што ќе се комплетира новиот собраниски состав.
Во однос на формирањето на комисиите, присутните ја разгледаа можноста во наредните денови првично да се изберат претседател и членови на Законодавно правната комисија и на Комисијата за политички систем, со оглед на тоа што течат роковите за избор на новата Влада. Потоа, во најбрз можен рок, политичките партии би требало да достават предлози за претседатели, членови и заменик-членови на сите други работни тела на Собранието, согласно бројот на мандатите освоени на изборите.
Македонија
Се работи на внатрешноста на храмот „Свети рамноапостолни цар Константин и царица Елена“ во Скопје, ќе биде потребна и дополнителна помош од верниците
Од Скопската епархија, при Македонската Православна Црква – Охридска Архиепископија, информираат дека во изминативе 6 месеци интензивно се работи на внатрешноста на храмот „Свети рамноапостолни цар Константин и царица Елена“, во центарот на Скопје: се фрескоживописува и се привршува проектот за изработка на иконостасот и подот, а останува да се изведе електриката и да се уреди просторот околу храмот.
„Фрескописот и другите потребни работи се извршуваат од донации, но за целосно довршување на храмот ќе биде потребна дополнителна помош, па се очекува да помогнат и верниците, стопанствениците, приватните бизнисмени како и сите луѓе – добронамерници.
Инаку, новиот храм се гради во спомен на урнатиот од земјотресот, и е во целосна сопственост на Скопската епархија, со сите подмирени долгови од порано кон изведувачот на градежните работи, кој долгот го пријави дури по неколку години“, се истакнува во напишаното.
Скопје
Ѓорѓиевски: Финализираме со проектот за реконструкција на сите улици во Усје
Градоначалникот Орце Ѓорѓиевски денес го посети Усје. Во ова населено место, целиот изминат период интензивно се работи на обнова на патната инфраструктура. Улицата “5” е целосно реконструирана. Во моментот нов асфалт добиваат улиците “22” и краците на улицата ‘1”.
Сите тие се стари по повеќе од 30 години и откако се направени, на нив не е извршена никаква реконструктивна активност и покрај тоа што беа во катастрофална состојба. Со завршувањето на овие сообраќајници, се финализира проектот за реконструкција на сите улици во Усје. Претходно, пред две години, на почетокот од својот мандат, градоначалникот Ѓорѓиевски ја заврши секундарната фекална канализациона мрежа, со што семејствата од Усје, добиваат современи и удобни услови за живот, кои се нужни во 21 век.
– Се наоѓаме во населеното место Усје, каде работиме на последните 5000 квадратни метри од големиот проект за реконструкција на сите улици. 600 семејства кои живеат тука, три децении се соочувале со немање слух од сите мои претходници кои дозволиле улиците да стигнат до катастрофална состојба. Како што им ветив, извршивме големи реконструктивни зафати со кои ја опфативме целата патна мрежа во Усје и ќе финализираме за најмногу две седмици. На ова сакам да додадам дека претходно ја завршивме и фекалната канализација, што значи интервениравме и подземно и надземно, се со цел, нашите жители да имаат достоинствени услови за живот, а истото следува и во сите преостанати населби и населени места, изјави градоначалникот Орце Ѓорѓиевски.