Министерот за здравство Фатми Меџити ги повика хирурзите од сите специјалности доброволно да оперираат за викендите за да ги намалат листите на чекање.

Тој ги повика неговите колеги, без надомест да покажат хуманост, исто како што беше примерот на кардиохирурзите од Ниш, кои од почетокот на годината во саботите и неделите оперираа пациенти.

„Дајте тоа што беше позитивна приказна во Ниш да ја повториме тука. Да ја ревидираме таа листа на чекање, на операции. Да направиме и ние такво хумано дело со цел да не чекаат толку долго пациентите. Да покажеме дека еве, сакаме да направиме нешто повеќе за општеството, како општествена одговорност. Пред сѐ, ние сме хумани лица“ изјави Меџити.

На Северна Македонија и е потребна интеграција во Европската Унија, а не изолација, jас сум рационален оптимист, верувам во целта и работам таа цел да се оствари, изјави претседателот на Владата, Димитар Ковачевски, во одговор на новинарско прашање на прес-конференцијата која се одржа се одржа под завршувањето на самитот на Европската заедница во Кишињев, Молдавија.

Тој посочи дека доколку не се случат уставните измени, државата ќе се врати во периодот од 2006 до 2016 година и наместо интеграција ќе имаме изолација.

„Видовме како изгледа изолација, без инфраструктура, заробена држава, слобода на медиуми 130 место бевме, сега сме 38-ми во светот, владеењето на правото беше окарактеризирано како хибриден режим.

Денес за една година имаме скок од 19 места во однос на слободата на медиумите. Истото се однесува и во делот на другите дела од власта.

Политичките партии и пратениците во Собранието, имаат обврска и одговорност пред граѓаните да носат одлуки кои што овозможуваат подобра иднина и подобар животен стандард на сегашните и идните генерации.

Членството во ЕУ не е цел сама за себе, членството во ЕУ е цел со која што го остваруваме она што го сакаат граѓаните“, изјави премиерот Ковачевски.

Претседателката на Молдавија, Маја Санду изјави дека на самитот на европската политичка заедница во таа земја се покажале „сила и единство“ во време кога е загрозена стабилноста на Европа.

„Денес овде го собравме целиот континент за да ги потврдиме силните меѓусебни односи, да го вратиме мирот во Европа. Покажавме сила и единство кога стабилноста на нашиот континент е загрозена“, рече Санду на прес-конференција на крајот од самитот.

На заедничката конференција со премиерите на Чешка и Шпанија, Петер Фиал и Педро Санчез, Санду рече дека Молдавија „ќе биде загрозена доколку Украина не се брани храбро“ од руската инвазија и дека Кишињев ќе остане со таа земја“.

„Покажавме дека сме обединети против најголемата агресија од Втората светска војна“, додаде Санду.

Таа рече дека лидерите разговарале и за заеднички акции кои ќе ја направат Европа посилна и побезбедна.

„Вашето присуство овде е доказ дека Молдавија не е сама, дека заедно се бориме против хибридните закани и обидите за дестабилизација на Молдавија“, рече Санду.

Премиерот на Шпанија, каде што ќе се одржи следниот самит на 5 октомври, изјави дека денешниот состанок не се одржал случајно во Молдавија и дека земјата „може да смета на европското семејство“.

„Мора да дејствуваме заедно против војната на Путин. Денеска се фокусиравме на заедништвото, инфраструктурата, енергијата и безбедноста, а пред се на хибридните закани и нуклеарната безбедност“, рече Санчез.

Премиерот на Чешка, каде се одржа претходниот, прв самит на Европската политичка унија, изјави дека Молдавија „храбро се соочува со последиците од рускиот варварски напад“.

„Испраќаме силна порака за поддршка на Молдавија и Украина“, додаде тој.

Фијала, исто така, рече дека Европската политичка заедница се покажала како „релевантен и важен форум за сите европски земји“ и повтори дека единството било демонстрирано денеска.

Европската политичка заедница е неформален дипломатски форум создаден минатата година на иницијатива на францускиот претседател Емануел Макрон. Вториот самит се одржа денеска во молдавското село Булбоака, во близина на Кишињев, на 20 километри од границата со Украина. Главните теми на разговор беа безбедноста во контекст на војната во Украина, енергијата, климатските промени и поврзаноста.

Во разговор со новинарите пред средбата, речиси сите европски лидери се осврнаа на тензиите на северот на Косово и повикаа на деескалација и мир. На самитот присуствуваше и премиерот Ковачевски.