Министерот за правда, Никола Тупанчески, се обрати на првиот академски час на Правниот факултет „Јустинијан Први“. На идните студенти им посака да имаат среќна и успешна година, да го искористат својот потенцијал, да бидат креативни.

„Старите Римјани рекле Festinа lente. Брзајте, но бавно, пополека – кон вашата цел, а тоа е кога ќе завршите со ова поглавје, еден ден да станете истакнати правници, адвокати, судии, обвинители, новинари, професори, политолози, па и политичари. Тоа ќе го постигнете само со учење. Не учете за оцена! Учете да научите! Учете за да знаете! Знаењето никој никогаш не може да ви го одземе! А многу бргу ќе дојде времето кога кормилото ќе дојде во ваши раце и знаењето ќе треба да го примените во пракса“, им порача министерот за правда Никола Тупанчески на идните студенти.

Оваа генерација студенти се разликува од претходните. Новиот стил на живеење, рече Тупанчески, а особено условите што се наметнаа во изминатите неколку години, доведоа до тоа студентите да бидат постојано присутни и активни на социјалните мрежи, па дури и дел од процесот на образование да го следат по видеоконференциски пат.

Вработените во Германија ќе може да добиваат регреси и премии до 3.000 евра годишно, без даноци и придонеси, за полесно да ја надминат високата инфлација.
Ваква одлука донесе Бундестагот, пренесува „Капитал“.

Олеснувањето ќе важи до крајот на 2024 година. Сепак, отворено е прашањето колку работодавци воопшто ќе може да исплатат бонуси. Претседателот на синдикатот на работодавци, Рајнер Дулгер, рече дека не сите компании се во состојба да се изложат на таков трошок.

Веќе за време на пандемијата постоеше можност да се плати премија без данок. Сепак, не се знае колку фирми исплатиле и за какви суми се работи.

Предуслов за даночно ослободување е парите да се исплаќаат покрај редовната плата. Дополнително, работодавецот мора да наведе дека се работи за паушален износ, кој е поврзан со поскапувањата. Во случај на корисници на социјална помош премијата не треба да се смета како приход.

Американскиот државен секретар, Ентони Блинкен, отворено изјави дека САД и НАТО имаат мотиви да ги нападнат гасоводите „Северен тек 1“ и “Северен тек 2“, изјави портпаролката на руското Министерство за надворешни работи, Марија Захарова.

„Блинкен отворено, без двоумење, рече дека САД и нивните партнери во НАТО имаат мотиви да ги уништат гасоводите ‘Северен тек 1’ и ‘Северен тек 2’“, напиша Захарова на „Телеграм“.

Како мотив за уништувањето на „Северен тек“, Захарова ја наведува изјавата на Блинкен, кој рече дека САД го зголемиле производството на течен природен гас, кој моментно се водечки европски снабдувач, „помагајќи да се компензира секоја загуба на Европа во нафта и гас поради руската агресија врз Украина“.

Захарова нагласи дека „Украина нема никаква врска со тоа“ и дека „киевските политичари под притисок на американските власти постојано поставуваат услови на руската страна во однос на транзитот на гас, кои биле на работ на уцена“.

Блинкен рече дека тоа е „огромна можност, неверојатна можност еднаш засекогаш Европа да се ослободи од зависноста од руските енергетски извори“.

Захарова го негира и американскиот државен секретар, кој ја обвини Русија дека „ја користи енергијата како оружје“.

„Русија никогаш не ја користела енергијата како оружје. Русија, а пред неа СССР, едноставно ја снабдуваа Европа со гас. Континуирано. Во текот на 50 години. Лагата на Вашингтон само ја потврдува неговата криминална манипулација со оваа тема“, рече Захарова.

На 26 септември на „Северен тек 1“ и „Северен тек 2“ откриено е истекување гас. Како што соопшти операторската компанија „Норд стрим АГ“, дефектот е без преседан и невозможно е да се процени временската рамка за ремонт.

Властите на Германија и Данска не исклучуваат дека причина за несреќата била саботажа на гасоводите, пренесе „Ало.рс“.