Партијата Левица оваа недела ќе поднесе предлог-закон за формирање инспекторат за употреба на грбот, знамето и химната на државата, како и знамињата на заедниците во земјата. Бараат да се формира инспекторат оти секојдневно сме сведоци на непочитување на државните симболи, особено за време на јавни прослави, спортски манифестации, па дури и официјални церемонии. Левицата вели дека симболите неправилно и дури и навредливо се употребуваат или, пак, ги нема онаму каде што законот пропишува дека треба да ги има. Решение гледаат во формирање инспекторат, чии инспектори ќе може да влезат и во канцелариите во кои ги има сите други знамиња од светот, освен македонското.

„МВР, генерално, реагира на сквернавење на државните симболи, но дали МВР влегува во канцелариите на градоначалниците во кои нема македонско знаме? Дали МВР влегува во канцеларии во кои имаме американско, француско, германско, сите знамиња на светот, само не македонското. Дали МВР реагира во тој случај? Не. Затоа треба инспекторат што ќе ја следи доследната примена на оваа материја и затоа сметаме дека со ова само ќе се дополни и ќе се пополни правниот вакуум, кој веќе постои“, вели пратеникот Амар Мециновиќ.

Формирањето инспекторат за државните симболи Мециновиќ смета дека е само пополнување на досегашниот правен вакуум.

„Веќе 27 години постои Закон за употреба на државното знаме и државниот грб, но овој Закон нема орган што го спроведува. Исто така, постои Закон за знамињата на заедниците и тој пропишува глоби, но нема институција што ги изрекува тие глоби. Практично, имаме мртво слово на хартија. Овој закон има цел да го исполни овој правен вакуум. Со него се превидува формирање инспекторат во рамките на Министерството за правда, со јасно дефинирани надлежности, процедура за инспекциски надзор и прекршочни мерки. Инспекторатот ќе има капацитет да врши надзор и над институции и над правни и физички лица, а ќе постои и можност граѓаните да поднесуваат инцијативи до него“, рече пратеникот Мециновиќ.

Предлог-законот за формирање инспекторат што ќе поднесат во Собранието од Левицата сметаат дека е суштински бидејќи конечно дава механизам за спроведување на веќе постојните закони и законска материја оти сега имаме законска материја за која нема инспекторат што ќе го следи нејзиното имплементирање и ќе казнува.

Очекуваат широка поддршка од парламентарните групи затоа што не се работи за политики калкулации, туку се работи за пополнување вакуум и враќање на достоинството на државните симболи по долго време нивно непочитување.

„Симболите на една држава не се декоративни елементи, ти се израз на суверенитетот, идентитетот и на колективната меморија на граѓаните кои заедно ја чувствуваат. Овој закон треба да ги зацврсти правната сигурност и еднаквоста на сите граѓани пред правниот поредок“, рече Мециновиќ.

Левицата смета дека сегашното непочитување на државните симболи партијата го нарушува достоинството на државата и на граѓаните.

Премиерот, Христијан Мицкоски, на денешниот Самит 2025 во организација на „Македонија 2025“ истакна дека првиот ден од стапување на функцијата се соочил со многу предизвици, но како што рече испорачуваат резултати за подобар живот за граѓаните.

„Нешто повеќе од 10 месеци од формирањето на новата Влада, некаде околу 1 година од завршување на изборите, период кој би рекол полн со предизвици, период во кој што сите заедно учевме работи кои за прв пат ни се случуваа, не само на нас, туку и на граѓаните во целина. Период во кој што ако треба да дадам прецизен одговор на тоа дали тоа што го затекнавме првиот работен ден беше согласно нашите очекувања, тогаш би рекол дека сме биле оптимисти. Но, не би сакал сето тоа сега да се претвори во озборување на тоа што било порано. Едноставно предизвиците беа големи, сметката на Владата беше негативна, дури би рекол во пост-конфликтна во 2002 година таа беше позитивна, овој пат се случи да биде негативна. Ако тоа го прикажеме со бројки некаде 12 милијарди денари, или 200 милиони евра и секој ден имавме нови непријатни изненадувања, за волја на вистината имаме сеуште. Но, тоа е наш проблем. Јас сум свесен дека луѓето имаат очекувања сега и веднаш за многу работи да се случат, и тоа е природно. Повеќе од 3 децении премногу ветувања, но многу малку испорака. Треба ние да работиме затоа што резултатите веќе доаѓаат“, кажа премиерот Мицкоски.

На прашањето што било најтешко со кое што се соочил од почетокот на мандатот, Мицкоски посочи дека тоа било несреќата во Кочани, за која како што рече тоа е најтешкиот ден во неговиот живот.

„Во политичка смисла беше оној ужасен настан кој се случи во Кочани. Најтешкиот ден во мојот живот. Се сеќавам тоа утро некаде три ипол беше кога човек тропаше на врата во мојот дом, тоа беше човек од обезбедувањето на министерот за внатрешни работи, бидејќи не го гледав телефонот. Веднаш се со земав и прво што направив ги повикав луѓето од мојот тим да се упатиме во Кочани, некаде 5 часот наутро пристигнавме. Таму беше веќе министерот за внатрешни работи, бевме потоа и во полициската станица. Се сеќавам дека во целата таа ситуација логично е како човек да реагирате и да се создадат големи емоции, но треба да се носат одлуки. Доаѓаше помош од секаде, посебно од регионот, а знаете ние за жал немаме брилијантни односи со соседите, би рекол со еден од соседите и тогаш кога треба да носите одлука, треба да водите сметка за сите последици кои што можат да настанат. А од друга страна дел од медицинските лица ви велат, пациенти во така тешка состојба не се за транспортирање. На моето прашање добро што ни е опцијата, ни рекоа опцијата е ние да ги негуваме, и најверојатно ќе имаме и други жртви од денеска, бидејќи првите 72 часа се најкритични“, вели премиерот Мицкоски.

Мицкоски истакна дека повеќе од 200 пациенти биле транспортирани во други центри за нега, потенцирајќи дека Владата ќе продолжи со помош и поддршка на семејствата и упати благодарност до сите кои биле вклучени во помошта.

Во однос на економските политики Мицкоски нагласи дека во суштина потребно беше стабилизација на државата во оваа прва година, затоа што државата беше во слободно паѓање.

„Во суштина нас ни требаше стабилизација на државата во оваа прва година, затоа што државата беше во слободно паѓање. Кога некој ќе каже не функционираат институциите, јас би рекол немавме институции. И кога се наоѓате во една таква состојба вие прво што треба да направите е тој слободен пад да го сопрете. Не можете вие да бидете преамбициозен, нелогично и нереално доколку се соочувате со основни, суштински проблеми. Ние имаме основни суштински егзистенцијални проблеми кои што се резултат на политики и однесување со децении. И затоа нашата стратегија беше ајде да го запреме слободното паѓање, па потоа да се обидеме да дојдеме до состојба нула, па дури потоа да почнеме да размислуваме на суштински покрупни реформи кои што можат да додадат вредност. И јас мислам дека од тоа што го предвидовме, успеавме да дојдеме до состојба нула или доаѓаме до состојба нула, иако мислевме дека ќе ни треба можеби повеќе од година и половина до две, ценам дека овие перформанси и параметри кои како индикатори се појавуваат, веќе укажуваат на тоа дека доаѓаме до состојба нула, за да можеме потоа да ги развиваме сите параметри кои што планираме да ги развиваме. Главен инпут ни беше да видиме која е нашата стратешка предност, виз-а-ви околните држави, но и генерално што е стратешката предност на Македонија како држава во споредба со другите европски држави.

Сакам да кажам дека нашата економија има голем потенцијал и јас сум убеден дека и во овој момент ние сме со перформанси многу пред сите други. Ќе ве потсетам Светска банка предвидуваше за 2024 година дека ќе имаме раст на БДП од 1,8 проценти. Морам да кажам дека беа песимисти, сепак можеби требаше да дадат шанса да бидат поголеми оптимисти. Ние имавме 2,8 проценти, што не е доволно, но доволно е затоа што во третиот и четвртиот квартал бележиме стапка на раст од над 3 проценти, а за првиот квартал од оваа година имајќи ги предвид првичните индикатори, индустриското производство, туризмот и останатото, не би се изненадил ако имаме околу 3 и пол и 4 проценти, што ќе претставува раст на БДП еден од водечките во Европа“, дециден е Мицкоски.

Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ) донесе Одлука со која се врши намалување на малопродажните цени на нафтените деривати во просек за 0,21 % во однос на одлуката од 05.05.2025 година.

Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините за 0,847%, кај дизелот има намалување за 1,511%, кај екстра лесното масло исто така има намалување за 1,181% и кај мазутот намалувањето е за 2,906%.

Курсот на денарот во однос на доларот во изминатиот период по кој беа формирани цените со претходната пресметка е повисок за 0,3599%.

Малопродажната цена на ЕУРОДИЗЕЛ (Д-Е V) се намалува за 0,50 ден/лит.

Малопродажните цени на бензините ЕУРОСУПЕР БС-95 и ЕУРОСУПЕР БС-98 се зголемуваат за 0,50 ден/лит.

Малопродажната цена на Екстра лесното масло за домаќинство на (ЕЛ-1) не се менува.

Малопродажната цена на Мазутот М-1 НС се намалува за 0,592 ден/кг и сега ќе изнесува 35,450 ден/кг.

Напоменуваме дека ова се максималните цени на нафтените деривати од 00:01 часот на 13.5.2025 година. Трговците на големо и трговците на мало со нафтени деривати и горива за транспорт можат да ги формираат цените на одделни нафтени деривати и горива за транспорт и пониско од највисоките утврдени цени, велат од РКЕ.