Американскиот претседател Доналд Трамп изрази длабоко незадоволство од руското бомбардирање на Украина за време на викендот, велејќи дека не е задоволен од рускиот претседател Владимир Путин.

„Не знам што му е. Што по ѓаволите му се случи? Убива многу луѓе. Не сум среќен поради тоа“, им рече Трамп на новинарите на аеродромот во Мористаун, Њу Џерси, додека се подготвуваше да се врати во Вашингтон.

Трамп ги даде овие забелешки како одговор на руските воздушни напади врз украинските градови во текот на ноќта во неделата, вклучувајќи го и главниот град Киев.

Малку подоцна, Трамп го даде истиот коментар на неговата мрежа.

„Отсекогаш сум имал многу добри односи со Владимир Путин од Русија, но нешто му се случи. Тој полудел целосно! Убива толку многу луѓе непотребно, а не зборувам само за војници. Ракети и беспилотни летала се испукуваат врз градови во Украина без причина. Секогаш велев дека ја сака ЦЕЛА Украина, а не само дел од неа, и можеби ќе се докаже дека сум во право, но ако се обиде да го стори тоа, тоа ќе доведе до пропаст на Русија!

Исто така, претседателот Зеленски не ѝ прави никаква услуга на својата земја со начинот на кој зборува. Сè што излегува од неговата уста предизвикува проблеми, не ми се допаѓа, и подобро да престане.

Ова е војна што никогаш немаше да се случи ако јас бев претседател. Ова е војната на Зеленски, Путин и Бајден, а не на Трамп. Јас само помагам во гаснењето на големи и грди пожари што беа предизвикани поради голема некомпетентност и омраза.“

Руските сили испукаа 367 дронови и ракети кон украинските градови, вклучувајќи го и главниот град Киев, во текот на ноќта во неделата, во најголемиот воздушен напад досега во војната, при што загинаа најмалку 12 лица, а десетици беа ранети.

Трамп се обидува да ги натера двете страни да се согласат на прекин на огнот во тригодишната војна во Украина, а минатата недела разговараше повеќе од два часа со Путин.

Тој ја покрена можноста за воведување дополнителни санкции врз Русија како одговор на тековните напади.

Финалниот реванш во ЕХФ купот меѓу Алкалоид и АЕК не започна. Грчките ракометари одбија да излезат на теренот во арената „Борис Трајковски“ бидејќи нивните навивачи не биле во салата.

АЕК успеа да Европската ракометна федерација (ЕХФ) да и приреди уште еден циркуз. Првиот пат во Белград, против Партизан им помина. И тогаш не излегоа на теренот, тврдеа дека нема услови да се игра. На крајот ЕХФ реши мечот да се игра на неутрален терен во Бугарија, без публика. Грчкиот тим по изведувањето пенали избори пласман во финалето.

Првиот меч во Атина, Алкалоид убедливо го доби 29:25. Се претпоставуваше дека Грците повторно ќе се обидат да исценираат нешто. Тоа и се случи, но сега ЕХФ не треба да падне на нивните финти.

„Натпреварот вечерва нема да се одигра, АЕК нема да излезе на терен. Ќе чекаме пнатамошни инструкции што со ќе биде овој натпревар. Добивме информација дека екипата на АЕК не сака да го одигра натпреварот“, рече официјалниот спикер.

„Имавме сигнали во текот на денот, уште од 10 часот кога се одржа ехничкиот состанок. Клубот и МВР донесоа одлука, бројот на влезници за гостите да биде 200. Навивачите на АЕК допатуваа во Скопје, тие им поставија ултиматум на клупските леници дека ќе трпат последици, ако излезат на теренот. Раководството на АЕК поради тоа не дозволи играчите да се појават на теренот. Ракометарите на АЕК имаа и солзи на очите, но не смееја против одлуката на управата“, рече за МРТВ претставникот на Алкалоид, Зоран Цветановски.

ЕХФ во овој случај треба експресно да реагира, а епилогот треба да биде само еден. Натпреварот да биде регистриран со службени 10:0 за Алкалоид и трофејот да им биде врачен на играчите на Кирил Лазаров.

Министерот за внатрешни работи, Панче Тошковски, реагира на обвинувањата за тендерот за униформите за припадниците на полицијата, велејќи дека постапката била предмет на задолжителна управна контрола од Бирото за јавни набавки, при што не биле најдени никакви неправилности.

По обвинувањата од опозициската СДСМ дека тендерот го добиле две фирми, од кои едната со двајца вработени, а другата отворена 20 дена пред постапката, Тошковски образложи дека нивната логика е поттикнување на конкуренцијата и фер пристап.

Премногу строги критериуми, вели Тошковски, често ги елиминираат малите и средни претпријатија, кои во Македонија се најконкурентни и често можат да понудат најдобри цени. Наша цел, додава министерот, е да добиеме најдобар квалитет по најповолна цена, а тоа го постигнуваме со овозможување на поширок круг на понудувачи.

„Законот за јавни набавки не предвидува исклучување на фирма само поради тоа што е новорегистрирана или има помал број вработени и ние целосно постапуваме согласно неговите одредби“, дециден е Тошковски.

Министерот појасни и дека МВР нема склучено договор за директна, еднократна исплата на наведената сума одеднаш, туку склучена е рамковна спогодба која претставува максимална вредност за набавки во наредните три години.  Самата рамковна спогодба, вели тој, не предизвикува директна финансиска обврска за Министерството, односно финансиски обврски се преземаат само кога ќе има реална потреба и се склучуваат посебни, поединечни договори за конкретни нарачки, со динамика на испорака според потребите.

„Наместо само на историјат на понудувачите, ние се фокусиравме на она што е најважно, реалниот квалитет на производот. Затоа, клучните услови беа задолжителна достава на мостри и лабораториски анализи. Секој понудувач мораше да достави примероци од униформите и делови од униформа, а мострите беа предмет на лабораториски анализи и испитувања од независни акредитирани лаборатории. Важно е да се нагласи и дека техничките спецификации за униформите и нивните делови се уредени со Правилник кој е јавно објавен во Службен весник. Тоа значи дека тие се стандардизирани и нема можност за какво било влијание врз нивната содржина, што обезбедува еднаков пристап за сите економски оператори“, се вели во реакцијата.

Покрај квалитетот, како што се додава, клучен фактор е и цената. Анализата покажала дека разликата помеѓу највисоката и најниската понудена цена во постапката е 14,4 отсто за дел 1 и 27,9 отсто за дел 2 од набавката, што ја потврдува конкурентноста на тендерот и добиените поволни цени.

Во врска со тоа дека обвинувањата доаѓаат од СДСМ, Тошковски рече дека токму тие што ги оставија полицајците без униформи, принудени сами да си крпат, шијат или позајмуваат делови од пензионирани колеги имаат образ да зборуваат за наводни криминални тендери.