На 23 септември (сабота), со почеток во 20 часот, па сè до раните утрински часови следниот ден, ќе се одржи 13. јубилејно издание на фестивалот на нова музика ЗДРАВО, МЛАДИ, кој повторно го носи свежиот звук на светската музика во Скопје.

На 5 бини во Младинскиот културен центар ќе настапат повеќе од 20 артисти од 11 земји од Европа. Како и секоја година, програмата на фестивалот цели кон жанровска разновидност, нови и надежни артисти, како и веќе етаблирани музичари во својата музичка кариера. Надоаѓачките артисти се срцевината на фестивалот.

Во салата „25 Мај“ во МКЦ, популарно позната како Денсинг-сала, централниот настан ќе го отвори настапот на рускиот џез-панк состав „Оми“ по кој следуваат фолк-сензацијата Џутко и „Плодови земље“ од Хрватска, потоа домашниот состав „Мај тиар“ со нов состав и најава за новиот албум, хрватската психоделична банда „Немања“ за на крајот вечерта на оваа бина да се затвори со долгоочекуваниот настап на хрватскиот антирапер Војко В и „Доуп куќата“.

Киното „Фросина“ е наменето за млади надоаѓачки артисти, а некои од нив настапот на ЗДРАВО, МЛАДИ им е посебен предизвик во нивните новопечени кариери. На оваа бина ќе се проследат настапите на новата ѕвезда на српската поп-музика, Жива, Португалката маѓионичарка на уку лелето, Рита Брага, домашниот џез-фолк состав „Калата“ и францускиот рапер Јоланде Башинг.
Клубот МКЦ е резервиран за електронските артисти на фестивалот. Овде публиката ќе има можност да го чуе легендарниот рокенрол-изведувач Јан Свенониус и неговиот последен проект „Ескапизам“, францускиот електронски артист, чиј настап долго се очекува YMNK, кралевите на кумбијата, „Маускович денс бенд“, Италијанците Планет Опал и ѕвездите на вечерта, Британците од PVA, кои за многу кратко време ќе се искачат многу високо на светските топ-листи.

Џебното кино во МКЦ е резервирано за промоција на литературно-музичкиот колектив „Слово култ“, со настап на 3 електронски артисти, ЏејДи Зази, Елизабета Костадиновска и Маргарет Аноун.
На платото пред МКЦ, пак, со свој диџеј-сет ќе нè загреваат во текот на целата фестивалска вечер – резидент диџејот на Здраво Млади, диџеј Фиц заедно со поддршка од локалните диџеј уметници Ајнур Касо и Ертунч Сали.

Младинскиот културен центар ветува уште едно спектакуларно издание на фестивалот, кој оваа година е финансиран од страна на Министерството за култура и Град Скопје, како и настапите на артистите, кои се дел од програмата „Лајвјуроп“.

Билетите се по цена од 800 денари сè до денот на фестивалот. Билетите може да се набават на билетарницата на МКЦ или на онлајн-линкот за продажба на билети на МКЦ.

Заменик-претседателот на Владата, задолжен за економски прашања, координација на економските ресори и инвестиции, Фатмир Битиќи, и министерот за надворешни работи, Бујар Османи, во придружба на генералниот секретар на Владата, Методија Димовски, во седиштето на Постојаната мисија на Република Северна Македонија во Обединетите нации во Њујорк, со извршниот директор на Зелениот климатски фонд, Мафалда Дуарте, потпишаа меморандум за разбирање и договор за привилегии и имунитети, со што ќе се овозможи регионалниот програмски дијалог за земјите од Источна Европа и Централна Азија да се одржи во Северна Македонија од 18 до 22 март 2024 година, под покровителство на Зелениот климатски фонд.

Со потпишувањето на овие два документа се зацврстуваат основите за ефикасно проширување и продлабочување на соработката на Северна Македонија со Зелениот климатски фонд во насока на зајакнување на капацитетите за приспособување, ублажување и спротивставување на климатските промени.

По годинешното 78. Генерално собрание на ОН и самитот за одржлив развој и очекуваниот состанок на Зелениот климатски фонд во Германија, за финансиски заложби од развиените земји, стратегискиот поглед на светските лидери на економскиот развој ќе биде во фокусот на целите за одржлив развој и климатска акција. Во овој контекст поддршката од Зелениот климатски фонд станува значајна во напорите за приближување на Северна Македонија кон остварување на овие цели.

По потпишувањето, вицепремиерот Битиќи и министерот Османи со Дуарте зборуваа за проектите што се финансирани и од Зелениот климатски фонд за што се обезбедува и дополнителна финансиска поддршка за нивно успешно имплементирање. Како, на пример, формирање национален фонд за енергетска ефикасност, изградба на пречистителна станица за градот Скопје, енергетска ефикасност на згради, како и за заедничките напори за одобрување на проектната апликација за национален план за адаптација. Ова се дел од проектите преку кои Фондот директно е вклучен во финансирање одговори на климатските промени и зајакнувањето на капацитетите на Северна Македонија.

Вицепремиерот Битиќи потсети дека во рамките на проектот за подготвеност е инициран процес за акредитација на Фондот за иновации и технолошки развој како национално тело за директен пристап до средства од Зелениот климатски фонд.

„Во рамките на продолжувањето на овој проект ќе почне и следната фаза во процесот на акредитација на ФИТР, преку кој ќе се очекува поголемо вклучување на приватниот секторот. Предвидено е надградување на системот ‘Е-влада’, преку кој Владата ќе има реални податоци за статусот на имплементација на целите за одржлив развој, парискиот договор, поглавјата и кластерите на ЕУ“, рече вицепремиерот Битиќи по потпишувањето на меморандумот.

„Зајакнувањето на капацитетите за ублажување и приспособување кон климатските промени останува врвен приоритет на нашата земја. Последните глобални временски непогоди, кои резултираа со голем број жртви, повторно нè потсетија дека треба сериозно да се посветиме кон постојана заштита на природата“, истакна Османи нагласувајќи дека поддршката на овој Фонд е од исклучителна важност и поради фактот дека климатските политики се високо на агендата на ЕУ, а Северна Македонија, како земја кандидат ја очекуваат суштински реформи како во усогласувањето на законодавството така и во преземањето конкретни чекори за реализација на климатските политики.

„На наше задоволство го потпишуваме договорот за привилегии и имунитети со Северна Македонија. Ова е еден важен чекор во нашето долгогодишно партнерство, кое ја отвора вратата за уште поблиска соработка со еден силен поборник на климатска акција“, рече Дуарте.

Помеѓу вицепремиерот Битиќи, министерот Османи, генералниот секретар Димовски и г-ѓа Дуарте беше дискутирано и за потенцијални нови проекти од областа на земјоделско осигурување, наводнување, земјишна реформа и отпорност на инфраструктурата кон климатски промени.

Злоупотребата на цитостатици и терапија на Клиниката за онкологија е мегакриминал со смртни последици, злосторничко здружување за кражба на лекови од пациенти со канцер за продажба на црно, истакна на денешната прес-конференција Наум Стоилковски, портпарол на ВМРО-ДПМНЕ.

Тоа, како што оценува тој, е невозможно без политичка поддршка и обезбедена неказнивост.

„Клиниката за онкологија е единствена во светот што поседува КАТО-систем за контрола на терапиите, а што 6 години не го користи. Системот за контрола за дозирање на лековите е исклучен во 2017 година со доаѓањето на СДС и поставувањето директор на Клиниката од страна на Арбен Таравари, тогаш нов министер за здравство. И сега кога грозоморниот скандал излезе во јавноста, актуелниот министер, пулен на Таравари, повторно нема одговор зошто КАТО-системот е исклучен од употреба, што доведува до логичен заклучок дека тоа е сторено за да може непречено да се спроведува криминалот со смртни последици.
И наместо оставка своја и на целата Влада, министерот за здравство во Владата на Димитар Ковачевски во обид да демантира вели: „системот не е фрлен во подрум, туку заклучен во соба“.
Морбидно, нечовечно, дно за медицинскиот систем, но врв на владеењето на СДС за опстојување на власт“, вели Стоилковски.

Додава дека злосторничкото здружување сè уште опстојува и владее на Клиниката за онкологија и по две години откога укажале на криминалот и откога медиумите пренеле сознанија.

„Сите до еден чекори во здравството во овие 7 години се политички и сите до еден се лукративно мотивирани, пред сè, за СДС да остане на власт. Креирање толкав систем за крадење цитостатици и наместо лекови, пациенти да добиваат вода, целото семејство на директорот да е на листата за цитостатици, починати пациенти сè уште да бидат на листата за лекување, фатена медицинска сестра со украдени цитостатици, па вратена на работа, медиуми за сето ова да пишуваат, опозицијата две години да алармира, државната ревизија да пишува извештаи и по сето тоа до сега, да нема никаков резултат – тоа значи политичка заштита за актерите и, веројатно, ветена неказнивост“, додава Ковачевски.

Оставките, според Стоилковски, се прв чекор што би гарантирал истрага и соодветна постапка, без да се влијае врз неа од позиција на моќ и власт.

Ова, како што вели, е преголем криминал за покривање и дефокусирање.