Сашо Павлоски од ВМРО-ДПМНЕ денеска праша што му згрешиле Македонија и народот на Заев за вака да се одмаздува.

– Прашањето не е само реторичко. Прашањето е суштинско бидејќи хаосот што го креираат Заев и неспособните и некомпетентни кадри што ги поставува го плаќаат граѓаните. Почна со делењето функции на скапоплатените лажни револуционери и самопрогласените независни новинари, па се префрли на удомување мешетари и естрадни менаџери од Србија. Од Зоран Башановиќ, пејач и менаџер на Драгана Мирковиќ, до Цветанка Ласкова. Последен изблик во поставувањето кадри е Филип Андов, познат како Сокол. Тоа познат важи повеќе за скопските улици и подземјето отколку за некаков успех во академската или бизнис-заедницата. Сега тој Сокол ќе го плаќаат граѓаните за да го советува Заев за Скопје, изјави Павлоски.

Тој побара одговор на прашањата какви квалификации има Сокол, каде одбранил магистратура и докторат и на која тема.

– Медиумите пишуваат дека Сокол главно ѝ е познат на полицијата. Дали Владата го провери неговото досие? Дали е точно дека против советникот на Заев се поднесувани кривични пријави за сторени кривични дела? Филип Андов, наречен Сокол, е назначен за специјален советник на Зоран Заев задолжен за градот Скопје, а го нема ниту Заев ниту неговиот огромен пиар-тим да се пофали со дополнителната вредност што Сокол ѝ ја носи на Владата. Филип Андов – Сокол јавноста го памети и како човек што со џип влета во толпа граѓани што мирно протестираа, но и по неговото учество во насилни протести во кои беше вандализиран главниот град – рече Павлоски.

Тој праша дали е точно дека Сокол на почетокот на неделава удрил пешак со мотор и праша зошто МВР ја крие оваа информација.

– Надлежните молчат за случајот. Молк од МВР на Спасовски од каде што сè уште нема одговор за сообраќајната несреќа, а молк и од Владата која го ангажира Сокол со народни пари. СДС и Заев аздисаа. Креираат хаос и несигурност. За ваквото безобразно и непрофесионално однесување Зоран Заев и СДС ќе сносат политичка одговорност и на следните локални избори ќе ги стигне казната од граѓаните на Република Македонија – рече Павлоски.