Uncategorized
Во снежното невреме во Србија блокирани 10.000 луѓе
![](https://makfax.com.mk/wp-content/uploads/2017/01/srnija-sjenica.jpg)
Снежното невреме и силниот ветер предизвикаа во петокот во Србија сообраќајни несреќи со повеќе десетици повредени и застои на автопатот Ниш – Белград, додека на Пештерската висорамнина се блокирани околу десет илјади луѓе.
Најтешка е ситуацијата на југот, југоистокот и делумно на југозападот од Србија, каде што снежните врнежи се проследени со силен ветер.
Министерката за сообраќај и градежништво Зорана Михајловиќ најави дека патничкиот и товарниот сообраќај од Ниш до Лесковац ќе биде целосно запрен по многубројните судири и застои предизвикани од снегот и силниот ветер.
Во два верижни судара на автопатот кај Ниш повредени се 25 луѓе, меѓу кои најмалку шест се деца, а големи застои во сообраќајот настанаа поради силниот ветер што предизвикува високи наноси од снег.
Во првиот верижен судар кај Ниш учествувале 27 возила, а во вториот се повредени тројца државјани на Бугарија.
Сите села на Пештерската висорамнина, каде што живеат околу 10.000 луѓе, од петокот утрото се во снежна блокада. Најголеми проблеми предизвикува виулицата која создава наноси од снег високи и до четири метри. Многу села во овој сточарски крај поради снегот и солниот мраз останале без вода, па загрозени се повеќе илјади говеда и овци, јавува Радио-телевизија Србија.
Министерството за внатрешни работи ја ангажираше специјалната единица, а секторот за вонредни ситуации при министерството за внатрешни работи интервенирало на југот од Србија најмалку дваесет пати, евакуирајќи од автомобили завеани во снегот 22 лица.
Полицијата и Авто-мото сојузот на Србија апелираат, и покрај божикните празници, на пат да не се тргнува без неодложна потреба, со задолжителна зимска опрема и многу внимателно возење./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Uncategorized
Заев и Ципрас му врачија на награда на Нимиц: „Ни порача да го чуваме и целосно да го имплементираме Преспанскиот договор“
![](https://makfax.com.mk/wp-content/uploads/2024/06/417400123_1017893746366028_3755524781773534094_n.jpg)
Експремиерите Зоран Заев и Алексис Ципрас му ја врачија Наградата за мир Преспа на поранешниот медијатор Метју Нимиц, најавувајќи дека традиционално оваа награда ќе се доделува секоја година на денот кога се одбележува Преспанскиот договор.
„Нимиц имаше трпение повеќе од две децении од својот живот да посвети на барање решение за спорот за името. Со неговата поддршка и посветеност изградивме меѓусебна соработка и дојдовме до решение не само за името, туку отворивме порта за соработка за двете земји за подобра иднина на нашите народи, но и за иднината на регионот. Му благодарам на амбасадорот Метју Нимиц кој ни помогна да стигнеме до решение кое денес е модел за решавање многу спорови“, напиша Заев на социјалните мрежи.
Нимиц им порачал да го чуваат и негуваат Преспанскиот договор и целосно да го имплементираат.
Во Атина се одржа Меѓународна конференција за мир и одржлив развој, по повод шестгодишнината од потпишувањето на Преспанскиот договор.
Uncategorized
Средба на претседателот Африм Гаши со италијанскиот амбасадор Андреа Силвестри
![](https://makfax.com.mk/wp-content/uploads/2024/06/gashi-silvestri2.jpg)
Претседателот на Собранието на Република Северна Македонија, Африм Гаши, денеска оствари средба со Андреа Силвестри, амбасадор на Италијанската Репубика во РС Македонија.
Амбасадорот Силвестри му го честиташе изборот на Гаши за претседател на Собранието, како претседател избран со забележителен број гласови, посакувајќи му успешна работа и подвлекувајќи го демократскиот механизам на самиот избор. Притоа, му врачи честитка од претседателот на Италијанскиот сенат, Игнацио ла Русa, со желби за успех во натамошната работа.
Претседателот Гаши го запозна амбасадорот со тековните активности на законодавниот дом, претстојното формирање на комисиите и другите работни тела, и очекувањето за брзо формирање на новата Влада. Истакна дека како одговорен претседател ќе остане отворен за соработка со сите политички партии претставени во Собранието, бидејќи сите треба да работат за доброто на граѓаните и државата во целина. Во контекст на билатералната соработка меѓу двете земји, претседателот истакна дека високо ја вреднува соработката со пријателска Италија, земја силен поддржувач на РС Македонија на евроинтеграцискиот пат.
Амбасадорот Силвестри го информираше претседателот за постојните релации на планот на меѓупарламентарната соработка и изрази надеж дека успешната соработка ќе продолжи и во иднина по формирањето на пратеничката група во Собранието за соработка со Италијанскиот парламент. Беше споменато и неодамнешното одблежување на 30 години од воспоставените дипломатски односи меѓу Италија и Република Северна Македонија, при што амбасадорот му подари примерок од Публикацијата отпечатена по овој повод.
Двајцата соговорници разменија мислења за идната законодавна агенда, фокусот кон евроинтеграцијата на земјата и улогата на Собранието во тој процес, задржувањето на конструктивен и пријателски однос со сите соседи и градење на мостови на соработка со земјите од целот регион.
Uncategorized
Се обиделе да ограбат црква, па го нападнале клисарот: уапсени разбојници во Радовиш
![](https://makfax.com.mk/wp-content/uploads/2024/05/црква.jpg)
Вчера во 13.30 часот во Радовиш, полициски службеници од Одделението за внатрешни работи Радовиш ги лишиле од слобода С.Р.(37) од Република Хрватска и А.К.(37) од Радовиш.
Тие се сомничат дека околу 07.30 часот од црква во Радовиш се обиделе да одземат пари, а откако биле забележани од клисарот во црквата, А.К. физички го нападнала, а С.Р. му се заканил со остар предмет, по што го напуштиле местото.
Во службен разговор во Полициската станица Радовиш тие го признале делото, по што биле задржани. За настанот бил запознаен јавен обвинител од Основното јавно обвинителство Струмица и по документирање на случајот против нив ќе биде поднесена соодветна пријава.