Резултатите од обдукцијата покажаа дека Ким Џонг-нам, полубратот на севернокорејскиот лидер Ким Џонг-ун, умрел 15 до 20 минути по смртоносниот напад со агенсот VX, соопшти во неделата владата на Малезија, на чијашто територија се случи нападот.

Според снимките од надзорните камери Кон Џонг-нам бил отруен од две жени кои на 13-ти февруари му го испрскале лицето со хемискиот агенс на меѓународниот аеродром во малезиската престолнина Куала Лумпур, од каде што требало да отпатува во кинеската територија Макао каде што од 2001 година, по обидот да влезе во Јапонија со лажен пасош со две жени и дете, живее со семејството под заштита на властите во Пекинг.

Ким им се обратил за помош на аеродромските службеници, кои според неодамна објавените снимки го одвеле до аеродромскиот стационар, но починал на пат до болницата.

„Умел во возилото на итната медицинска помош… Мислам дека од примената на агенсот минале меѓу 15 и 20 минути“, изјави во неделата малезискиот министер за здравство С. Субраманиам.

„Дозите биле толку високи и дејствувале толку брзо во целото тело…, така што го погодиле срцето и белите дробови“, појасни Субраманиам.

Само 10 милиграми од оваа супстанција е потребно да се апсорбира за да стане смртоносна, додаде министерот кој оценува дека при труењето на Ким Џонг-нам е употребена далеку поголема доза.

Претходно беше објавено дека полицијата уапсила две жени за убиството на Ким Џонг-нам, кој некогаш беше сметан за можен лидер на Северна Кореја, 29-годишна државјанка на Виетнам и 25-годишна државјанка на Индонезија, а потоа и 26-годишен државјанин на Малезија, кој бил во врска со Индонезијката.

Според малезиските медиуми, полицијата во главниот град Куала Лумпур уапсила маж кој наводно е поврзан со убиството на Ким Џонг-нам. Во моментот на апсењето кај него е пронајден пасош на Северна Кореја. Беше истакнато во пасошот на приведениот маж имало штембили дека повеќепати престојувал во Малезија. Полицијата прецизира во соопштение дека осомничениот е идентификуван како Ри Џонг-чол, роден на 6-ти мај 1970 година. „Осомничениот е вмешан во убиството на северноорејскиот маж“, беше наведено во соопштението.

Тројца од четворица државјани на Северна Кореја за кои малезиските власти се сомневаат дека се поврзани со нападот, наводно одлетале од Џакарта во Дубаи истата вечер кога е извршен смртоносниот напад. Тие се идентификувани како Ри Џае-нам, Хонг Сонг-хак и Ри Џи-хјон, соопшти портпаролот на индонезискиот оддел за имиграција за Reuters. Во неделата беше објавено дека е осомничен и четврти маж, но за него деталите не се објавени.

Малезиската полиција во неделата соопшти дека четворица Севернокорејци осомничени за убиството одлетале од Малезија по нападот од 13-ти февруари. Малезискиот дневен весник The Star објави дека тие требало да се вратат во Пјонгјанг, преку Џакарта, Дубаи и Владивосток./крај/мф/сн