Поддржувачите на ултрарадикалната сунитска организација Исламска држава ја исмејуваат одлуката на американскиот претседател Доналд Трамп привремено да го суспендира влегувањето во САД на државјани од седум муслимански држави, тврдејќи дека тоа нема да ги запре терористичките напади во Соединетите држави и дека тој указ ќе помогне за регрутирање на нови радикализирани американски муслимани.

Во петокот американскиот претседател Доналд Трамп го потпиша указот „За заштита на земјата од влез на странски терористи“, со кој во рок од 90 дена се суспендира издавање визи за државјаните на седум муслимански држави, Иран, Ирак, Јемен, Либија, Сирија, Сомалија и Судан. Указот, исто така, го суспендира приемот на бегалци на 120 дена и на неодреден рок се суспендира прифаќањето бегалци од Сирија.

„Вашата одлука нема ништо да промени. Нападите ќе ви стасаат од Америка, од Американците родени во Америка од американски родители и дедовци и баби“, напишал еден од поборниците на Исламската држава на Telegram, апликација за испраќање пораки со енкрипција, пренесува Reuters.

Челниците на Исламската држава, која уште држи под контрола значајни територии во Сирија и во Ирак не се јавија по указот на Трамп, но тоа наместо нив го прават лица кои на социјалните мрежи се претставуваат како нејзини приврзаници и кои тврдат дека та одлука на американскиот претседател е во нивна полза.

„Трамп им забранува на муслиманите да влегуваат во САД, а ги убива во Јемен, Ирак и Сирија и им се заканува. Бедникот не знае дека е непроценлива вредноста за Исламската држава“, напишал на Twitter извесен Салем ал-Мосули.

Исламистички интернет канал на Telegram кој се нарекува „Учените од Хак“ кој го следи американската аналитичка разузнавачка агенција за следење на радикалните интернет страници SITE, го поставува прашањето за тоа дали политиките на Трамп се знак дека тој во моментов е најдобриот „повикувач на исламот“, некој кој создава нови верници.

Од првите 48 испитаници, 34 од нив одговориле дека е така, тврди SITE, кој цитира одговор на извесен Абу Магреби: „Она што го стори Трамп ја откри вистината и бруталната стварност која стои зад американската влада кон муслиманите“.

„Што ѝ прави Трамп на својата држава? Само што стана претседател, а луѓето веќе протестираат против неговите политики, а државите ширум светот го критикуваат. Трамп, ако Господ даде, ќе ја упропасти Америка“,напишал Магреби во една објава.

Исламистичките радикали, кои немаа ваква кампања во текот на мандатот на претходниот американски претседател демократот Барак Обама, иако ја одобри операцијата за ликвидација на идеологот на Ал Каеда, Осама бин Ладен во Пакистан, и ги започна воздушни интервенциите во Либија и против Исламската држава во Сирија и во Ирак каде испрати и копнени сили, сега на интернет ја исмејуваат одлуката на Трамп кој во неделата побара од своите воени советници да изготват план за поразување на џихадистите.

„Крстоносецот Трамп се претвори во непромислен фараон. Овој крстоносец кој треба да се презира, ги заборава несовесните одлуки на неговите претходници Буш помладиот и мазгата Обама. Тие не успеаја, а со Божја помош ќе му го турнеме носот вокал, како што им сторивме и на неговите претходници“, напишал на Telegram Турџман Ал Асавирти./крај/мф/сн